બારોબાર વહીવટ / 3 ગ્રામ પંચાયતોનું કૌભાંડ બહાર આવતા 67 ગામના તલાટીને TDOએ કર્યા આદેશ, કર્મચારીઓમાં ધ્રૂજારી

• વાઘોડિયા તાલુકામાં તલાટીએ અંગત ઉપયોગ માટે મસમોટી રકમ બેંકોમાંથી ઊપાડી
• TDOની તપાસ દરમિયાન નાણાંકીય ગેરરીતિ આવી સામે 
• તલાટી કમ મંત્રી પાસે ખુલાસો માંગતા કરવા લાગ્યો ગલ્લા તલ્લા

ગુજરાતમાં કૌભાંડોની હારમાળાની કઈ નવાઇની વાત નથી, કોઈ બેન્કને ચૂનો ચોપડી છટકી ગયું છે તો કોઈ સાયબર છટકબારી શોધી લોકોને છેતરી રહ્યું છે. ત્યારે વડોદરાના વાઘોડિયા તાલુકામાં તલાટીએ 3 ગામના લોકોના રૂ.21.85 લાખ ઉચાપત કરી મસમોટા કૌભાંડને અંજામ આપ્યો છે.

ગામ લોકો અને સરપંચ સાથે વિશ્વાસઘાત
તલાટી આ શબ્દ સાંભળતા જ ગામ લોકો તમામ રીતે તેના પર ભરોસો મૂકી પોતાના અંગત ડોક્યુમેન્ટ સહિત તેના પર પોતાનો વિશ્વાસ પણ મૂકી દે છે પણ કહેવાય છે ને ગામ હોય ત્યાં ઉકરડા પણ હોય, આમ  જ 3 ગામના સરપંચો સાથે વિશ્વાસઘાત કરી વાઘોડિયા તાલુકામાં તલાટીએ કૌભાંડ આચર્યું છે. કરમાલીયાપુરા, જાંબુવાડા અને અંટોલીના તલાટી અભિષેક મહેતાએ સરપંચો પાસેથી બ્લેન્ક ચેક પર સહી કરાવી હતી. તલાટી વ્યવસ્થિત રીતે હિસાબ રાખી પછી આપી દેશે તેવી ગામના સરપંચોને કૌભાંડ આચરનાર તલાટી સાથે વાત થઈ હતી. 

કેવી રીતે આચર્યું કૌભાંડ?
પણ વાત થયા મુજબ ગ્રામ પંચાયતોના સરપંચોને હિસાબ આપવાનુ કહી હિસાબ આપ્યો ન હતો. અને તલાટીએ અંગત ઉપયોગ માટે મસમોટી રકમ બેંકોમાંથી ઊપાડી લીઘી. ત્રણ ગ્રામ પંચાયતમાં રૂ.21.85 લાખ ચાઉ કરી જઈ તલાટી સરપંચોની આંખમાં ધૂળ નાખી રહ્યો હતો. પણ કહેવાય છે સત્ય કોઈના કોઈ દિવસ જરૂર બહાર આવે અને TDOની તપાસ દરમિયાન નાણાંકીય ગેરરીતિ સામે આવતા ખૂલ્યું હતું કે ત્રણ ગ્રામ પંચાયતમાં રૂ.21.85 લાખનો હિસાબ મળી રહ્યો નથી. જેની ખુલાસો આરોપી તલાટી કમ મંત્રી પાસે માંગતા તે ગલ્લા તલ્લા કરવા લાગ્યો હતો. 

કૌભાંડી તલાટીને તાત્કાલિક છૂટો કરવા મામલતદારે આપ્યો આદેશ 
ઉચાપત કરનાર તલાટી હાલ ફોન બંધ કરી ભૂગર્ભમાં ઉતરી ગયો છે. TDOએ વાઘોડિયા પોલીસમાં ફરિયાદ નોંધવા અરજી કરી છે તો બીજી તરફ કૌભાંડી તલાટીને તાત્કાલિક છૂટો કરવા મામલતદારે આદેશ પણ આપી દીધા છે. આ સમગ્ર ગેરરીતિ બહાર આવતા TDOએ અન્ય 67 ગામના તલાટીઓને રેકર્ડ મોકલવા આદેશ કર્યો છે.