ભાજપના પ્રદેશ પ્રમુખ જીતુ વાઘાણીએ રાહુલ ગાંધીને લઇને વિવાદાસ્પદ ટિપ્પણી કરી હતી. જીતુ વાઘાણીએ કોંગ્રેસ અધ્યક્ષ રાહુલ ગાંધી પર ટિપ્પણી કરતા રાજ્યના રાજકારણમાં ગરમાવો જોવા મળ્યો હતો. ભાજપ પ્રદેશ પ્રમુખ જીતુ વાઘાણીએ રાહુલ ગાંધી કમાન્ડોથી ઘેરાયેલા રહે છે તેમ કહ્યું હતું.
વાઘાણીએ ટિપ્પણી કરી હતી કે કમાન્ડોની વચ્ચે ઘેરાયેલા ઘોડિયામાં રાહુલ ગાંધીનો જન્મ થયાની ટિપ્પણી કરી હતી. આ ટિપ્પણી જીતુ વાઘાણીએ 27 જાન્યુઆરીના રોજ કરી હતી. જીતુ વાઘાણીએ રાધનપુર ખાતે ભાજપ યુવા મોરચાના સંમેલનમાં રાહુલ ગાંધી વિરુધ્ધ ટીપ્પણી કરી હતી.
જો કે ત્યારબાદ પ્રદેશ પ્રમુખ માફી માગતા જણાવ્યું હતું કે હું વીઆઇપી કલ્ચરની વાત કરી રહ્યો હતો. કોંગ્રેસ કાર્યકરોએ વિવાદ ઉભો કરવા મારી વાત ખોટી રીતે રજૂ કરી હતી. આમ જીતુ વાઘાણીના વિવાદિત નિવેદનના મામલે આજે મહિલા કોંગ્રેસ દ્વારા રાજ્યવ્યાપી વિરોધ કરવામાં આવી રહ્યો છે.
જીતુ વાઘાણીએ કોંગ્રેસ અધ્યક્ષ પર કરેલી ટિપ્પણી મામલે ભાવનગરમાં કોંગ્રેસની મહિલા કાર્યકર્તાઓએ વિરોધ નોંધાવતા તેઓની અટકાયત કરવામાં આવી હતી.
મહિલા કોંગ્રેસી કાર્યકર્તાઓએ જીતુ વાઘાણીના ઘરે વિરોધ કરવા જઈ રહી હતી તે સમયે પોલીસે 10 મહિલા કાર્યકર્તાઓની અટકાયત કરી છે. આ મામલે કોંગ્રેસના કાર્યકર્તાઓએ રાજ્યભરમાં જીતુ વાઘાણીનો વિરોધ નોંધાવ્યો હતો.
મહેસાણામાં પણ જીતુ વાઘાણીના નિવેદન મામલે મહિલા કોંગ્રેસ સમિતિએ વિરોધ નોંધાવ્યો છે. કોંગ્રેસની મહિલા કાર્યકર્તાઓએ રેલી કાઢી કલેક્ટરને આવેદનપત્ર આપ્યું હતું. આ સાથે જ ભાજપ અને જીતુ વાઘાણી વિરુદ્ધ સૂત્રોચ્ચાર કરીને આવેદનપત્ર આપવામાં આવ્યું છે. જીતુ વાઘાણીએ સ્ત્રીઓનું અપમાન કર્યું હોવાનો આક્ષેપ કર્યો છે.
રાજકોટમાં મહિલા સંગઠને વિરોધ નોઁધાવ્યો હતો. મહિલા કોંગ્રેસના કાર્યકર્તાઓએ જીતુ વાઘાણી અને ભાજપના વિરૂદ્ધમાં સૂત્રોચ્ચાર કર્યા હતા. આ દરમિયાન કોંગ્રેસના કાર્યકર્તાઓએ કલેક્ટરને આવેદન પત્ર પાઠવ્યો હતો.
ઉલ્લેખનીય છે કે પ્રદેશ ભાજપ પ્રમુખે જીતુ વાઘાણીએ રાહુલ ગાંધીને અપશબ્દો કહ્યા હતા. આ સાથે જ તેમણે કોંગ્રેસને અભાગ્યા અને લુખ્ખાઓ સાથે પણ સરખાવ્યા હતા. જ્યારે સુરતમાં પણ જિતુ વાઘાણીના નિવેદનને લઈને કોંગ્રેસમાં રોષ જોવા મળી રહ્યો હતો. સુરત જિલ્લા કોંગ્રેસના મહામંત્રીઓએ સોશિયલ મીડિયા પર પોસ્ટ કરી વાઘાણી સામે આક્રોશ વ્યકત કર્યો હતો.