તકલીફમાં વધારોઃ વડોદરામાં હાર્દિક પંડ્યાનો ફોટો સળગાવાયો માંગ ઉઠી કે માફી માંગે નહીંતર...

ક્રિકેટર હાર્દિક પંડ્યાની મહિલા વિરુદ્ધ ટિપ્પણીનો મામલે મહિલા સંગઠનમાં રોષ જોવા મળ્યો છે. આવામાં હવે વડોદરાની મહિલા સંગઠન આશ્ચર્યજનક કાર્યક્રમ આપશે તેમ જણાવાયું છે. આ મામલે મહિલા સુરક્ષા સમિતીએ હાર્દિક પંડ્યાને ચિમકી પણ આપી છે. વડોદરાના કારેલીબાગ વિસ્તારમાં હાર્દિક પંડ્યાનો ફોટો સળગાવીને વિરોધ પણ દર્શાવવામાં આવ્યો હતો. મહિલા સંગઠને પ્રતિક્રિયા આપી છે કે હાર્દિક પંડ્યા મહિલાઓ પાસેથી માફી નહીં માગે તો ફોજદારી કાર્યવાહી કરાશે. મહત્વનું છે કે એક ખાનગી ચેનલના શોમાં હાર્દિક પંડ્યા અને કે.એલ.રાહુલ પહોંચ્યા હતા.
 

કાર્યક્રમમાં હાર્દિક શું બોલ્યો હતો?

આ કાર્યક્રમમાં હાર્દિક પંડ્યાએ મહિલાઓ પર ટિપ્પણી કરી હતી કે હું જ્યારે ક્લબ જઉં છું ત્યારે છોકરીનું નામ પણ નથી પુછતો. જે ટેક્સ્ટ મેસેજ કોઈ એક છોકરીને મોકલું છું એ જ બીજી છોકરીને પણ મોકલું છું. આ મામલે BCCI દ્વારા હાર્દિક પંડ્યાને નોટિસ પણ આપવામાં આવી હતી.

પિતાએ કહ્યું કે આવી ભૂલ નહીં કરે

હાર્દિકના પિતાએ એક ઇન્ટરવ્યૂમાં જણાવ્યુ કે ''હાર્દિક આ સસ્પેન્શનથી ખૂબ જ નિરાશ છે. ટીવી શોમાં આવેલા નિવેદનોની ભૂલ તેને સમજાઇ છે. તેણે વિશ્વાસ અપાવ્યો છે કે તે આગળ પણ આ પ્રકારની ભૂલ નહી કરે. અમે પણ નક્કી કર્યુ છે કે આ વિષય પર કોઇ વાતચીત નહી કરવામાં આવે.''

આ મામલે કોહલીએ શું કહ્યું હતું?

ઓસ્ટ્રેલિયામાં એક પ્રેસ કોન્ફરન્સ દરમિયાન વિરાટ કોહલીએ કહ્યુ કે ''ભારતીય ક્રિકેટ ટીમનો ભાગ હોવા પર અને જવાબદાર ક્રિકેટર હોવાને કારણે અમે તેના નિવેદન અને વિચારોની સાથે સંબંધ નથી રાખતા તે તેમના અંગત વિચારો છે.'' 

ઉલ્લેખનીય છે કે કરણ જોહર પોતાના શોમાં ખેલાડીઓને તેમના અંગત જીવન પર કેટલાક સવાલો કર્યા હતા. આ દરમિયાના હાર્દિક પંડ્યાએ પોતાના રિલશનશિપ ડેટિંગ અને મહિલાઓ વિશે જવાબ આપીને ફેન્સને ચોંકાવી દીધા હતા.