લોકાર્પણ / આગામી 2 દિવસમાં 62 કરોડથી વધુની ભેટ મળશે ગુજરાતને, જુઓ કયા જિલ્લાને મળશે લાભ

• માર્ગ અને મકાન મંત્રી પૂર્ણેશભાઇ મોદીના હસ્તે લોકાર્પણ
• રૂપિયા 62 કરોડથી વધુના ખર્ચે 11 જેટલા વિકાસ પ્રકલ્પોનું ખાતમુહૂર્ત-લોકાર્પણ કરાશે
• આગામી તા.23 અને 24 ડિસેમ્બરના રોજ થશે ખાતમુહૂર્ત-લોકાર્પણ

માર્ગ અને મકાન મંત્રી પૂર્ણેશભાઇ મોદીના હસ્તે તા.૨૩ ડિસેમ્બરે વડોદરા ખાતે રૂપિયા ૧૪.૦૯ કરોડના ખર્ચે તૈયાર થનાર દુના જંક્શન અંડરપાસ અને ફ્લાય ઓવર બ્રિજનું ખાતમુહૂર્ત કરાશે. જ્યારે સુરત ખાતે રૂપિયા ૨૬.૭૬ કરોડના ખર્ચે ઉભેંળ જંક્શન ફ્લાયઓવર, એપ્રોચ રોડ તેમજ ડ્રેનેજનું વરસાદી ગટરની કામગીરીનું ખાતમુહૂર્ત કરાશે. નવસારી જિલ્લાના ચિખલી ખાતે કુલ રૂપિયા ૭.૭ કરોડના ખર્ચે ખુડવેલમાં બે માર્ગોનું લોકાર્પણ તેમજ સ્લેબ ડ્રેઇનનું ખાતમુહૂર્ત કરાશે. જ્યારે ડાંગ જિલ્લાના વધઇ તાલુકામાં રૂપિયા ૩.૫ કરોડના ખર્ચે માછળી બ્રિજનું ખાતમુહૂર્ત તેમજ રૂપિયા ૧.૯૮ કરોડના ખર્ચે ધવલી દોડ રસ્તાનું લોકાર્પણ કરાશે.

મંત્રીશ્રીના હસ્તે તા.૨૪ ડિસેમ્બરના રોજ રૂપિયા ૧.૬૮ કરોડના ખર્ચે ઓલપાડ-ડભારી રસ્તાનું ખાતમુહૂર્ત, રૂપિયા ૩.૧૩ કરોડના ખર્ચે ૮૪ તાલુકામાં વાઝ ખાતે ચાર રસ્તાનું ખાતમુહૂર્ત, સચિન ખાતે રેસ્ટ હાઉસનું લોકાર્પણ, રૂપિયા ૧.૭૫ કરોડના ખર્ચે બારડોલી તાલુકાના અલ્લુ ખાતે ચાર રસ્તાનું ખાતમુહૂર્ત જ્યારે રૂા.૨ કરોડના ખર્ચે માંડવી ઝાબ પાટિયા રસ્તાનું ખાતમુહૂર્ત એમ બે દિવસમાં કુલ રૂપિયા ૬૨.૫૯ કરોડના ખર્ચે ૧૧ જેટલા વિકાસ પ્રકલ્પોનું ખાતમુહૂર્ત-લોકાર્પણ કરાશે.

આ પ્રસંગે કાર્યક્રમના વિવિધ સ્થળોએ સાંસદ અને ગુજરાત પ્રદેશ ભાજપ અધ્યક્ષ સી.આર. પાટીલ, કેન્દ્રીય મંત્રી દર્શનાબેન જરદોશ, મંત્રી કનુ દેસાઈ, મંત્રી નરેશ પટેલ, મંત્રી મુકેશ પટેલ, મંત્રી જીતુ ચૌધરી, પૂર્વ મંત્રી ઈશ્વર પરમાર, ધારાસભ્ય સર્વેશ્રી મોહન ઢોડીયા, મધુ શ્રીવાસ્તવ, વી ડી ઝાલાવાડીયા, ઝંખનાબેન પટેલ, વિજય પટેલ તેમજ સાંસદ સર્વેશ્રી ડૉ. કે.સી.પટેલ, પ્રભુ વસાવા, રંજનબેન ભટ્ટ સહિત મહાનુભાવો ઉપસ્થિત રહેશે.