વડોદરાની સ્ટર્લિંગ હોસ્પિટલનાં 200 કર્મચારીઓ કરાયા છુટ્ટા લડશે લડત

વડોદરાઃ શહેરની સ્ટર્લિંગ હોસ્પિટલમાં 14 વર્ષથી કામ કરતા કર્મચારીઓને અચાનક છુટ્ટા કરી દેવામાં આવ્યાં છે. આથી કર્મચારીઓનાં પરિવારજનો મુશ્કેલીમાં મુકાયાં છે. 200 પરિવારનાં ઘરનાં ચૂલા બંધ થઇ જાય તેવી સ્થિતિનું નિર્માણ થયું છે. ગઈ કાલ સુધી સારું કામ કરતાં કર્મચારીઓને કામની ક્ષતિનાં કારણે કોન્ટ્રાક્ટ બદલવામાં આવ્યો છે તેવું કહીને છુટ્ટા કરી  
દેવામાં આવ્યાં છે.

સરકારનાં લેબરને લગતા કાયદા અને તેનું પાલન પણ કરવામાં આવતું નથી અને વર્ષોથી કામ કરતા કર્મચારીને બેકાર બનાવી દેવામાં આવ્યાં છે. 200 કર્મચારીઓનાં પરિવારનાં ગુજરાનનો અત્યારે પ્રશ્નાર્થ ઉભો થયો છે.

મહત્વનું છે કે મહેશભાઈ સોલંકી નામનાં એક કર્મચારીએ સ્ટર્લિંગમાં લાગેલી આગમાં પોતાનાં જીવનાં જોખમે દોડી જઈને તે ભીષણ આગ પર કાબુ મેળવ્યો હતો અને સમગ્ર હોસ્પિટલને હોનારતથી બચાવી હતી. ત્યારે હોસ્પિટલ મેનેજમેન્ટ દ્વારા તેમનું સન્માન કરીને તેઓને સ્ટારનો સિમ્બોલ પણ આપવામાં આવ્યો હતો.

આ જ કર્મચારીની કામગીરી બરાબર નથી તેવું કહીને તેઓને છુટ્ટા કરી દેવામાં આવતા હોસ્પિટલ મેનેજમેન્ટની દાનતનો ખ્યાલ આવી ગયો છે. કર્મચારીઓનાં હિતની ચિંતા કર્યા વગર તેમને નોકરીમાંથી હાંકી કાઢ્યાં છે. જો કે વડોદરામાં હોસ્પિટલ સ્ટાફ માટે લડત ચલાવતા રાજેશ આયરે કર્મચારીનાં હક્ક માટે લડત લડવાની જાહેરાત કરી છે.