મધ્ય ગુજરાતની સૌથી મોટી સયાજી હોસ્પિટલ છેલ્લા ઘણા સમયથી વિવાદમાં છે. થોડા દિવસ અગાઉ પગાર ન થવાના કારણે કર્મચારીઓએ હડતાલની ચીમકી ઉચ્ચારી હતી. ત્યારે આજે ફરી વધુ એક વિવાદ સામે આવ્યો છે.
વડોદરાની સયાજી હોસ્પિટલ ફરી વિવાદમાં
કોવિડ વોર્ડ બહાર કોન્ટ્રાક્ટ કર્મીઓનો વિરોધ
અચાનક જ હોસ્પિટલ કર્મીઓને ફરજમુક્ત કરાતા રોષ
કોરોના કાળમાં શરૂઆતના સમયે એક હજાર જેટલા કર્મચારીઓને કોન્ટ્રાક્ટ પર લેવામાં આવ્યા હતા. શરૂઆતથી આજ દિન સુધી તમામ કર્મચારીઓએ પોતાના જીવના જોખમે કોરોના વોર્ડમાં ફરજ બજાવી છે. હવે જ્યારે કોરોનાના કેસમાં ધીરેધીરે ઘટાડો નોંધાઈ રહ્યો છે ત્યારે સયાજી હોસ્પિટલમાં કોન્ટ્રાક્ટ પરના કર્મચારીઓને અત્યાર સુધી તબક્કાવાર 600 જેટલા કર્મચારીઓને છુટા કરી દેવામાં આવતા ભારે વિવાદ સર્જાયો છે.
આજે કોવિડ વોર્ડ બહાર છુટા કરાયેલા તમામ કર્મચારીઓ દ્વારા સૂત્રોચ્ચાર કરી વિરોધ નોંધાવામાં આવ્યો હતો. આ તમામ કર્મચારીઓએ વિરોધ પ્રદર્શન કરીને પોતાનો રોષ વ્યક્ત કર્યો હતો. સાથે સવાલ કર્યો હતો કે, શું કોરોના સંક્રમણ પૂર્ણ થઈ ગયું છે?
કોરોના વોર્ડમાં ફરજ બજાવતા કર્મચારીઓ આજે સવારે ઓફિસ પર પહોંચ્યા ત્યારે તેમને જાણ થઇ કે તમામને છૂટા કરી દેવામાં આવ્યા હતા. જેને લઇને કોવિડ વોર્ડના કર્મચારીઓએ એકત્રિત થઈને કોન્ટ્રેક્ટર વિરૂદ્ધ સૂત્રોચ્ચારો કર્યાં હતા. તો ચોથા વર્ગના કર્મચારીઓ છેલ્લા 2 મહિનાથી પગાર વિહોણા છે. તેવામાં અચાનક ફરજ પરથી છૂટા કરી દેવાતા કર્મચારીઓએ વિરોધ નોંધાવ્યો હતો. આ કર્મચારીઓએ બાકી પગાર સાથે ફરી ફરજ પર લેવા માંગ કરી હતી.