વડોદરાઃ વડોદરાની MS યુનિવર્સિટીમાં વિદ્યાર્થી સંઘની ચૂંટણી યોજવામાં આવી હતી. આ ચૂંટણીનું પરિણામ જાહેર કરવામાં આવ્યું હતું. જેમાં આર્ટસ ફેકલ્ટીમાં ABVP સમર્થક યુવા શક્તિ જૂથની જીત થઇ છે. ફેકલ્ટી જીએસ તરીકે વિજય નરીયાનીનો વિજય થયો છે.
લો ફેકલ્ટીમાં VVS સમર્થક ફેકલ્ટી GS ઉમેદવાર વિજયી બન્યા છે. લો ફેકલ્ટીમાં સિદ્વાર્થ રેલન GS બન્યા છે. MS યુનિવર્સીટીની કોમર્સ ફેકલ્ટીમાં રાકેશ પંજાબીની જીત થઇ છે. અપક્ષ ઉમેદવાર રાકેશ પંજાબીએ જીત બાદ એજ્યુકેશન બાબતે મુખ્ય ધ્યાન આપવાની વાત કરી છે.
38 ટકા જેટલું મતદાન
વડોદરાની MS યુનિવર્સિટીમાં ચૂંટણી યોજાઇ હતી. વિદ્યાર્થી સંઘની ચૂંટણીમાં અંદાજે 38 ટકા જેટલું મતદાન થયું હતું. તેમાં પણ સૌથી વધુ મતદાન કોમર્સ ફેકલ્ટીમાં થયું હતું. જ્યારે સૌથી ઓછું મતદાન સંસ્કૃત ફેકલ્ટીમાં થયું હતું.
અપક્ષ ઉમેદવારી કરેલ રાકેશ પંજાબીની જીત
સૌથી મોટી ગણાતી એવી કોમર્સ ફેકલ્ટીના પરિણામ આવ્યુ હતું. જેમાં અપક્ષ ઉમેદવારી કરેલ રાકેશ પંજાબીની જીત થઇ છે. આ ફેકલ્ટીમાં સાત ઉમેદવાર વચ્ચે ચુંટણી જંગ જામ્યો હતો. ત્યારે સૌથી રાકેશ પંજાબીએ બાજી મારી છે. જેથી તેમના પ્રશંસકોમાં ઉત્સાહનો માહોલ જોવા મળ્યો હતો.
મહત્વનું છે કે આ જીત બાદ કોમર્સ ફેકલ્ટીના પુર્વ વાઇસ પ્રેસીડેન્ટ જહા ભરવાડે પોતાની પ્રતિક્રિયા આપી હતી. જેમાં તેમણે એનએસયુઆઇના યુજીએસ અને વીપી જીતશે તેવો વિશ્વાસ બતાવ્યો હતો.
ચૂંટણી દરમિયાન થયો હતો હોબાળો
જો કે વડોદરાની એમ એસ યુનિવર્સિટીમાં વિદ્યાર્થી સંઘની ચૂંટણી દરમિયાન હોબાળો થયો હતો. VVS અને NSUIના નેતાઓ વચ્ચે બોલાચાલી થઈ હતી. ટેક્નોલોજી કેમ્પસમાં યુવકો આઈકાર્ડ વગર ફરી રહ્યા હતા. આ મામલે VVS અને NSUIના નેતાઓ વચ્ચે બોલાચાલી થઈ હતી. હોબાળો ઉગ્ર થતા ટેક્નોલોજી ફેકલ્ટીના ડીનની સમજાવટ બાદ મામલો થાળે પડ્યો હતો.
101 મતદાન બુથો
આ ચૂંટણીમાં ત્રિપાંખિયો જંગ જોવા મળ્યો હતો. 17 ફેકલ્ટીના 41 હજાર 887 મતદારો મતદાન કર્યું હતું. મતદાન માટે 101 મતદાન બુથો ઉભા કરવામાં આવ્યા હતા. ચૂંટણીની પ્રક્રિયાનું વિડીયો રેકોર્ડિંગ અને CCTVના માધ્યમથી મોનીટરીંગ કરવામાં આવ્યું હતું.
10 PI 35 PSI 400 પોલીસ જવાનો તૈનાત
આ દરમિયાન ચૂસ્ત પોલીસ બંદોબસ્ત પણ ગોઠવી દેવામાં આવ્યો હતો. તંત્ર દ્વારા યુનિવર્સિટીમાં 10 પોલીસ ઈન્સપેક્ટર 35 સબ પોલીસ ઈન્સપેક્ટર અને 400 જેટલા પોલીસ જવાન તૈનાત કરવામાં આવ્યા હતા.