PUBGના ચાહકો માટે મહત્વના સમાચાર, પોલીસે લગાવ્યો 1 મહિનાનો પ્રતિબંધ

વડોદરા: બાળકો તથા યુવાનોમાં લોકપ્રિય એવી ગેમ PUBG અને મોમો ચેલેન્જ પર વડોદરા પોલીસ કમિશ્નનરે એક મહિના માટે પ્રતિંબધ મૂકતુ જાહેરનામું બહાર પાડ્યુ છે. આ હુકમનો ભંગ કરનાર જાહેરનામા ભંગની ફરિયાદ કરવામાં આવશે.

માનસિક પીડાની ચેલેન્જ આપતી બ્લૂ વ્હેલ ગેમ પર પ્રતિબંધ મૂક્યા પછી PUBG અને મોમો ચેલેન્જ ગેમ પર પણ પ્રતિબંધ ફરમાવવામાં આવ્યો છે. આ બંને ગેમના કારણે બાળકો તથા યુવાનોમાં હિંસાનું પ્રમાણ વધતુ જોવા મળી રહ્યુ છે જેની અસર તેમના વાણી, વર્તન, વિકાસ અને ભણતર બધા પર પડી રહી છે. PUBG ગેમના વ્યસની બની ગયેલા બાળકો અને યુવાનો ઘણી વખત હિંસક પ્રવૃતિ કરવાની સાથે સાથે ગૃહત્યાગ પણ કરી રહ્યા છે. 

વડોદરા પોલીસ કમિશ્નનરે શહેરી વિસ્તારની સલમાતી તથા સુરક્ષાને ધ્યાનમાં રાખીને કાયદો તથા વ્યવસ્થાની પરિસ્થિતિ જળવાઇ રહે તે માટે 13 માર્ચથી 12 એપ્રિલ સુધી PUBG તથા મોમો ચેલેન્જ ગેમ રમવા પર પ્રતિબંધ મૂકી દીધો છે. કોઇપણ વ્યકિત જો આ ગેમ રમવાની ગતિવિધીમાં ભાગ લેતો હોવાનું નજરમાં આવે તો નજીકના પોલીસ સ્ટેશનમાં જઇને તેની જાણ કરવાનો અનુરોધ કરવામાં આવ્યો છે.

પોલીસ કમિશ્નનરે  જાહેરનામાં તેમ પણ જણાવ્યુ છે કે જે આ હુકમનો ભંગ કરશે તેઓ ઇપીકો કલમ 188 તથા ગુજરાત પોલીસ એક્ટની કલમ 135 મુજબ શિક્ષાનો પાત્ર થશે. જાહેરનામાનો ભંગ કરનાર વિરૂદ્ધ કાર્યવાહી કરવાની પણ વાત કરવામાં આવી છે અને સાથે જ તેમણે પીએસઆઇ તેમજ તેની ઉપરની કક્ષાના અધિકારીઓને આ એક્ટ હેઠળ ગુનો નોંધવા અધિકૃત પણ કર્યા છે.