વડોદરા પોલીસ ભવનમાં આધુનિક કંટ્રોલ રૂમ ઉભો કરવામાં આવ્યો છે. આ કંટ્રોલ રૂમ નવા વર્ષથી કાર્યરત થઈ જશે. નવા કંટ્રોલ રૂમ ખાતે 60 પોલીસ કર્મચારીઓ 3 શિફ્ટમાં 24 કલાક કામ કરશે.
નવા વર્ષમાં વડોદરા પોલીસની વડોદરાવાસીને ભેટ
વડોદરા પોલીસ કંટ્રોલ રૂમ સંપૂર્ણ ડિજિટલાઇઝ કરાયો
100 નંમ્બર ડાયલ કરનારને મળશે વોઇસ મેસેજ
ફોન વોઇસ મેલથી કરી શકાશે ફરિયાદ
વર્ષ 2022 પૂર્ણ થવા જઈ રહ્યું છે. આવતીકાલે એટલે કે 31મી ડિસેમ્બરે વર્ષનો છેલ્લો દિવસ છે. ત્યારે વડોદરાવાસીઓને વડોદરા પોલીસની ભેટ મળી છે. વડોદરા પોલીસે કંટ્રોલ રૂમ સંપૂર્ણ ડિજિટલાઈઝ કર્યો છે. નવો ડિજિટલ કંટ્રોલ રૂમ આવતા વર્ષ એટલે કે 1 જાન્યુઆરીથી કાર્યરત થશે.
PCR વાનનું પણ લાઈવ ટ્રેકિંગ કરાશે
હવેથી 100 નંબર ડાયલ કરનારાને વોઇસ મેસેજ મળશે. PCR વાનનું પણ લાઈવ ટ્રેકિંગ કરવામાં આવશે. ફરિયાદી ફોન વોઇસ મેલથી પણ ફરિયાદ કરી શકશે. સાથે 100 નંબરની પાંચ લાઈનોને બદલે 8 કરાઈ છે. સાથે જ કંટ્રોલ નંબર વ્યસ્ત હોય તો નાગરિકો વોઈસ મેસેજ પણ કરી શકશે. પોલીસને કોલ મળતા તરત જ PCR વાન ઘટનાસ્થળે પહોંચશે. આઉટસોર્સિંગ કોલ સેન્ટર દ્વારા પોલીસનું લોકો સાથેનું વર્તન અંગે પણ ફીડબેક લેવાશે.
કંટ્રોલ રૂમની સિસ્ટમને બદલીને ડિજિટલ કરાઈ
આ અંગે વડોદરાના ઝોન-3ના DCP યશપાલ જગનિયાએ જણાવ્યું કે, પોલીસ કમિશનરના માર્ગદર્શનથી વડોદરા પોલીસ કંટ્રોલને આધુનિક બનાવવા માટે હાલ પ્રયત્નો હાથ ધરવામાં આવ્યા છે. આખી કંટ્રોલ રૂમની સિસ્ટમને બદલીને ડિજિટલ કરવામાં આવી છે. હવેથી ફોન કોમ્પ્યુટરના માધ્યમથી કરવામાં આવશે. જેનાથી વોઈસ ક્લિયારીટી પણ સારી આવશે અને કામ પણ ખૂબ ઝડપી થશે.
આઉટ સોર્સીગ કોલ સેન્ટર દ્વારા લેવાશે ફીડબેક
DCP યશપાલ જગનિયાએ જણાવ્યું કે, અગાઉ જે પાંચ લાઈન હતી, તેમાં વધારો કરીને આઠ લાઈન કરવામાં આવી છે. તેમ છતાં જો ફોન વ્યસ્ત આવી રહ્યો હોય તો ફરિયાદી વોઈસ મેલ પણ કરી શકે છે. તુરંત એ મેસેજના આધારે કોલબેક કરવામાં આવશે. કંટ્રોલ રૂમ ખાતે 60 કર્મચારીઓ 3 શિફ્ટમાં 24 કલાક કામ કરશે. પોલીસનુ લોકો સાથે વર્તન કેવું ? તે અંગે આઉટ સોર્સીગ કોલ સેન્ટર દ્વારા ફીડબેક લેવાશે.