સલામ / સ્કૂલવાનની હડતાળ વચ્ચે વડોદરા પોલીસની સરાહનીય કામગીરી, બાળકો માટે સ્કૂલ વર્ધી

અમદાવાદમાં ચાલુ સ્કૂલવાનમાંથી ત્રણ બાળકો બહાર ફેંકાઈ ગયાની ઘટના બાદ સ્કૂલવાન કોન્ટ્રાક્ટરો સામે ટ્રાફિક વિભાગ સખત બન્યો છે. તો બીજી તરફ  પોતાના સંતાનોની સુરક્ષાની ચિંતાને લઈને વાલીઓમાં રોષ હજુ શમ્યો નથી.. બન્ને બાજુથી દબાણ વધતા સ્કૂલવાનવર્ધી એસોશિયેશને પણ પોતાની જરૂરિયાત અને તાકાત દર્શાવવા હડતાલ પાડી દીધી. જો કે, આ સ્થિતિમાં વડોદરા ટ્રાફિક પોલીસે પ્રજામિત્ર બનીને વિદ્યાર્થીઓને પોતાનાં વાહનોમાં સ્કૂલ સુધી લઈ જવાનું કામ કર્યું છે. ત્યારે જોઇએ વડોદરા ટ્રાફિક પોલીસની એક સરાહનીય કામગીરીનો આ અહેવાલ. 

સ્કૂલવાન ચાલક એશોશિયેનશની હડતાલ અને વિદ્યાર્થીઓનાં વાલીઓનાં રોષને વ્યક્ત કરી રહી છે. અમદાવાદમાં ચાલુ વાને બાળકો બહાર ફેંકાઈ ગયાની ઘટના બાદ રાજ્યના અનેક મહાનગરોમાં આવા જ દ્રશ્યો જોવા મળી રહ્યાં છે. સુરતનાં અનેક વિદ્યાર્થીઓનાં વાલીઓએ સુરતમાં સ્કૂલ રિક્ષાનાં વધારેલા ભાડા મામલે વાલીઓએ વિરોધ નોંધાવ્યો છે. એટલું જ નહી સ્કૂલ રિક્ષામાં વધુ બાળકો બેસાડવાના મામલે પણ વાલીઓ નારાજ છે.

વાલીઓએ સુરતની વનિતા વિશ્રામ સ્કૂલ પાસે સ્કૂલ બસ ચાલુ કરવાની માંગણી કરી હતી. તો બીજી બાજુ જ્યાં સ્કૂલવાન ચાલકો સામે આરટીઓ વિભાગ સખત થતાં સ્કૂલવાન વર્ધી એશોસિયેશન હવે પોતાનાં હેરાનગતિ કરાઈ રહ્યાં હોવાનું બહાનું કાઢી રહ્યાં છે. એટલું જ નહીં પોતાના વાહનો ડિટેઈન કરાતા તેઓમાં રોષ જોવાં મળી રહ્યો છે. આ માટે તેમણે વડોદરા કલેક્ટરને આવેદન પાઠવ્યું હતું.
 

ટૂંકમાં ઊઘડતા વેકેશને જ સ્કૂલવાનચાલકોની બેદરકારી અને સ્કૂલ વર્ધી એશોસિયેશનની મનમાનીનાં કારણે વાલીઓ અને વાન એસોશિયેશન વચ્ચે ગજગ્રાહ વધ્યો છે. વેકેશન ખૂલ્યાંની શરૂઆતમાં જ બાળકોને સ્કૂલે પહોંચવામાં અડચણો ઊભી થઈ રહી છે. કેમકે આરટીઓ કાયદાપાલન માટે સ્કૂલવાન માલિકો સામે જેટલાં કડક બની રહ્યાં છે તેટલાં સ્કૂલવાન સંચાલકો વાલીઓ પાસેથી વધારે ફીની માગણી કરી રહ્યાં છે. હાલ આ ગજગ્રાહ ચાલી રહ્યો છે ત્યારે વડોદરા ટ્રાફિક પોલીસનો એક પ્રજામિત્ર તરીકેનો ચહેરો જોવાં મળ્યો છે.  વડોદરામાં સ્કુલ વર્ધી એસોસિયેશને બે દિવસની હડતાળ પાડી છે. વડોદરામાં સ્કુલ વર્ધી ચાલકો બે દિવસની હડતાળ પર ઉતરતા વડોદરા ટ્રાફિક પોલીસ વાલી અને વિધાર્થીઓનાં વહારે આવી છે.  
 
વડોદરા ટ્રાફિક પોલીસે હડતાળનાં પગલે સવારથી જ વિદ્યાર્થીઓ અને વાલીઓને તેમનાં ઘરેથી સ્કુલ અને સ્કૂલથી ઘરે મૂકવાનું માનવતાભર્યુ કામ કર્યુ હતું. વડોદરા ટ્રાફિક પોલીસે  પોતાની 8 બોલેરો, 1 બસ, 21 PCR વાન અને 63 બાઈક દ્વારા વિદ્યાર્થીઓને સ્કૂલે અને ઘેર પહોંચાડવામાં મદદ કરી હતી. પોલીસે 400થી વધારે વિદ્યાર્થી અને વાલીઓને તેમના ઘરેથી સ્કુલ અને સ્કુલેથી ઘરે લઈ જવા મદદ કરી હતી. વાલીઓએ પોલીસની એક પ્રજામિત્ર તરીકેની કામગીરીને બિરદાવી હતી.

હડતાળીયાઓ બ્લેકમેલ કરી અને હડતાળ પાડે છે ત્યારે બાળકોનું ભણતર ન બગડે તે માટે પોલીસે ખુદ મેદાનમાં ઊતરીને માત્ર સુરક્ષાની જ નહીં પરંતુ શિક્ષણની પણ જવાબદારી ઓઢી લીધી છે. વડોદરા પોલીસે બાળકો માટે સ્કૂલ વર્ધી શરૂ કરી છે. પોલીસની જીપમાં શાળાએ જતા બાળકોના દ્રશ્યો ખરેખર પ્રેરણાદાયી છે. અને પોલીસનાં આ પ્રકારનાં પ્રજામિત્ર તરીકેના અભિગમથી સામાન્ય જનતામાં પોલીસની છાપ વધારે માનભરી બની છે. એક પ્રજામિત્ર તરીકે વહારે આવેલી પોલીસને વીટીવી સલામ પાઠવે છે.