વડોદરાઃ પોલીસ કોન્સ્ટેબલ દારૂનો ધંધો કરતો હોવાનો ઘટસ્ફોટ બુટલેગરે કર્યા ખુલાસા

વડોદરા: સાવલી પોલીસ મથકનો પોલીસ કોન્સ્ટેબલ દારૂનો ધંધો કરતો હોવાનો ઘટસ્ફોટ થયો છે. આ કોન્સ્ટેબલ બુટલેગરને ઇંગ્લીશ દારૂ પહોંચાડતો હતો. બુટલેગરની ધરપકડ બાદ આ ખુલાસો થયો હતો. કોન્સ્ટેબલ સંજયસિંહ રાઠોડની ધરપકડ બાદ તેને સાવલી પોલીસ મથકમાં અપાઈ વી.વી.આઈ.પી ટ્રીટમેન્ટ કોમ્પ્યુટર રૂમમાં રાત્રી દરમિયાન સુવાની સુવિધા અપાઇ હતી.

ગાંધીના ગુજરાતમાં દારૂ બંધી છે પોલીસની કાયદાનું કડક અમલીકરણ કરાવવાની જવાબદારી છે. ત્યારે વડોદરા જિલ્લાના સાવલી પોલીસ મથકનો પોલીસ કોન્સ્ટેબલ ખુદ પોતે દારૂનો ધંધો કરતો હોવાની વિગત બહાર આવતા પોલીસ બેડામાં હડકમ્પ મચી જવા પામ્યો છે. રાજ્ય સરકાર દારૂ બંધી માટે કડક કાયદાઓ બનાવી રહી છે. 

જોકે કાયદાનું પાલન કરાવવાવાળી પોલીસ ખુદ દારૂનો ધંધો કરવા માંડે તો દારૂનો ધંધો ગુજરાતમાં ક્યારે બંધ થશે તે સૌથી મોટો સવાલ છે. સાવલી પોલીસે બુટલેગર યોગેશ સોલંકીની ઈંગ્લીશ દારૂની બે પેટી સાથે ધરપકડ કરી હતી. તપાસમાં બુટલેગરે ચોંકાવનારી વિગતો પોલીસને આપી હતી. તેની પાસે પકડાયેલી 30 વહીસ્કીની બોટલ સાવલી પોલીસ મથકના પોલીસ કોન્સ્ટેબલ સંજયસિંહ રાઠોડ પાસેથી ખરીદી હતી. 10 000નો દારૂ કોન્સ્ટેબલે બુટલેગરને વેચ્યો હતો. બુટલેગર બિંદાસ પોલીસની રહેમનજર હેઠળ સાવલીમાં દારૂનું ખુલ્લેઆમ વેચાણ કરતો હતો. વડોદરા જિલ્લા એસ.પીએ તાત્કાલિક કાર્યવાહી કરી સાવલી પોલીસ મથકના કોન્સ્ટેબલ સંજયસિંહ રાઠોડની ધરપકડ કરી હતી. સાવલી કોર્ટમાં કોન્સ્ટેબલને રજુ કરી એક દિવસના રિમાન્ડ મેળવવામાં આવ્યા.

જોકે કોન્સ્ટેબલની ધરપકડ બાદ રાત્રી દરમિયાન તેને પોલીસ લોકઅપમાં રાખવાની જગ્યાએ તેને કોમ્પ્યુટર રૂમમાં પંખા નીચે સુવાની વ્યવસ્થા અપાઈ હતી. વી.વી.આઈ.પી ટ્રીટમેન્ટ સાવલી પોલીસ મથકના અધિકારીઓએ આપી હતી. તે દ્રશ્યો કેમેરામાં કેદ થયા હતા. આ મામલે જિલ્લા એસ.પીએ તપાસના આદેશ આપ્યા છે. જે અધિકારી વી.આઈ.પી ટ્રીટમેન્ટ આપવામાં સામીલ હશે તેમની સામે ખાતાકીય કાર્યવાહી કરવાના આદેશ આપ્યા છે. પ્રજાનો રક્ષક જ જ્યારે ભક્ષક બને ત્યારે સવાલ એ ઉભો થાય છે કે શું ગાંધી ના ગુજરાતમાં દારૂ બંધી ના ખોખલા વાયદા કરતી સરકાર ગુજરાતમાં દારૂ બંધી કરાવી શકશે કે નહીં તે સવાલ ઉભો થવા પામ્યો છે.