મહેસાણામાં બ્લીસ સ્વિમિંગ પુલમાં મહિલાની છેડતી થઈ હોવાનું સામે આવ્યા બાદ હવે વડોદરામાં પણ સ્વિમિંગ પુલમાં મહિલાઓનો વીડિયો ઉતારવાનું સામે આવ્યું છે. ઘટના છે વડોદરાના ગૌત્રી વિસ્તારની. જ્યાં વિલા ક્લબ હાઉસમાં સ્વિમિંગ પુલમાં સ્વિમિંગ કરતી મહિલાઓનો એક શખ્સ વીડિયો ઉતારી રહ્યો હતો. જોકે મહિલાઓની નજર તે શખ્સ પર પડતાં આ મામલે ગૌતી પોલીસ સ્ટેશનમાં ફરિયાદ નોંધાવવામાં આવી હતી.
આ મામલે ગૌત્રી પોલીસે આરોપી આકાશ પટેલની અટકાયત કરી છે. આકાશ પટેલ અગાઉ પણ વિવાદોમાં આવી ચૂક્યો છે. આકાશ પટેલનો બંગલો વિલા ક્લબ હાઉસની બાજુમાં જ આવેલો છે અને આ શખ્સ પોતાના બંગ્લોમાંથી સ્વિમિંગ પુલમાં સ્વિમિંગ કરતી મહિલાઓનો વીડિયો ઉતારતો હતો. જે આકાશ પટેલને ભારે પડ્યો છે અને હાલ આકાશ પટેલની અટકાયત કરીને તેની પાસે રહેલા ફોટો અને વીડિયો જપ્ત કરવામાં આવ્યા છે.
આ મામલે વડોદરા પોલીસે કહ્યું કે, આરોપી આકાશે તેના મોબાઇલમાંથી વીડિયો ડિલિટ કરી દીધા છે. અને પોલીસે આકાશનો મોબાઇલ પણ જપ્ત કરી અને એફએસએલમાં મોકલી દેવાયો છે. આકાશ ગેલેરીમાંથી વીડિયો ઉતારી અને મહિલાઓને વીડિયો વાયરલ કરવાની ધમકી આપતો હતો.
તો બીજી બાજુ મહેસાણામાં પણ આવો જ એક બનાવ સામે આવ્યો. મહેસાણાના ભાંડુ ગામ નજીક આવેલા બ્લીસ વોટર પાર્કમાં મહિલાની છેડતી કરાયાનો આક્ષેપ બાદ હોબાળો થયો હતો. મહિલાના પરિવારજનો અને છેડતી કરનાર શખ્સો સામ-સામે આવી ગયા હતા.