વડોદરાની મહારાજા સયાજીરાવ યુનિવર્સિટીમાં વિદ્યાર્થી સંઘની ચૂંટણીને લઈને હોબાળો થયો હતો. વિદ્યાર્થી સંઘની ચૂંટણીમાં સાયન્સ ફેકલ્ટીના ઉમેદવારનું ફોર્મ રદ્દ કરવાના મુદ્દે હોબાળો થયો હતો.
ખોટી રીતે ફોર્મ રદ્દ કરવામાં આવ્યું હોવાના આક્ષેપો સાથે ફેકલ્ટી બહાર વિદ્યાર્થીઓ દ્વારા ધરણા કરવામાં આવી રહ્યા હતા તે દરમિયાન પોલીસ દ્વારા લાઠીચાર્જ કરવામાં આવ્યો હતો. જેને લઈને વિદ્યાર્થીઓ રોષે ભરાયા હતા. જોકે સત્તાધીશોનો આક્ષેપ છે કે વિદ્યાર્થીઓ દ્વારા ખોટી રીતે હંગામો કરવામાં આવ્યો હોવાથી પોલીસ બોલાવી હતી.
આ ઘટના અંગે મળતી વિગત અનુસાર વડોદરામાં MS યુનિવર્સિટીમાં વિદ્યાર્થી સંઘની ચૂંટણીમાં ફોર્મ ભરવા મામલે હંગામો થતા પોલીસને લાઠીચાર્જ કરવાની ફરજ પડી હતી.
સાયન્સ ફેકલ્ટીના ઉમેદવારનું ફોર્મ રદ થતા ઉમેદવારોના સમર્થકોએ હોબાળો મચાવતા સ્થાનિક પોલીસ ધસી આવી હતી અને તેમણે વિદ્યાર્થીઓ પર હળવો લાઠી ચાર્જ પણ કર્યો હતો.
પોલીસ દ્વારા કરવામાં આવેલ અચાનક લાઠીચાર્જની ઘટનાને પગલે કેમ્પસમાં દોડધામ મચી જવા પામી હતી. જો કે પોલીસ દ્વારા કરવામાં આવેલ લાઠીચાર્જને લઇને ઘેરા પડઘા પડ્યા હતા અને પોલીસ દ્વારા ભરવામાં આવેલ આ પગલાને લઇને વિદ્યાર્થી સંગઠનનોમાં ભારે રોષ જોવા મળ્યો હતો.
અત્રે ઉલ્લેખનીય છે કે આગામી 24 ઓગસ્ટના રોજ વડોદરાની M.S. યુનિવર્સિટી ખાતે વિદ્યાર્થી સંઘની ચૂંટણી યોજાવાની છે.