વડોદરામાં દૈનિક અખબારના 2 પત્રકારે 40 લાખની ખંડણી માંગી વેપારી પાસેથી રૂપિયા 12.50 લાખ પડાવ્યા હોવાનો કિસ્સો સામે આવ્યો છે. જેમાં એકની ધરપકડ કરી લેવાઇ છે.
ભારે રકઝક બાદ આખરે 12.51 લાખ રૂપિયા ખંડણી આપવાનું નક્કી થયું
દૈનિક પેપરના બ્રાંચ મેનેજરે આ મામલે ક્રાઈમ બ્રાંચમાં ફરિયાદ નોંધાવી
વડોદરાના એક દૈનિક પેપરના રિપોર્ટર દ્વારા વેપારીને ‘તારે દુકાન સારી રીતે ચલાવવી હોય અને કાળાબજારીનો ધંધો કરવો હોય તો 40 લાખ આપવા પડશે’ તેવી ધમકી અપાઇ. રૂ. 12.51 લાખ પડાવતા ક્રાઈમ બ્રાંચમાં રિપોર્ટર સહિત બે લોકો વિરુદ્ધ ખંડણી અને ધમકી આપવી સહિતનો ગુનો દાખલ થયો છે. આથી, પોલીસે પત્રકાર સિદ્ધાર્થ મણિયારની ધરપકડ કરી જીતેન્દ્ર વણકરની શોધખોળ હાથ ધરી છે.
આ બાબતની કોઈને જાણ કરશો તો શહેર છોડાવી દઈશું તેવી ધાકધમકી આપી
વડોદરાના દૈનિક પેપરના પત્રકાર અને સાપ્તાહિક પેપરના પત્રકારે સસ્તા અનાજના વેપારીને ધમકી આપી રૂ. 40 લાખની ખંડણી માંગી હતી. ત્યારે ભારે રકઝક બાદ આખરે 12.51 લાખ રૂપિયા ખંડણી આપવાનું નક્કી થયું. જેમાં આરોપી પત્રકાર સિદ્ધાર્થ મણિયારે 27 જૂનના રોજ અકોટા ગાય સર્કલ પાસે વેપારી પાસેથી 5 લાખ રૂપિયા પડાવ્યા. બાદમાં 28 જૂનના રોજ રાત્રિ બજાર પાસે આરોપી પત્રકાર જીતેન્દ્ર વણકરે વેપારી પાસેથી 7.51 લાખ રૂપિયા પડાવ્યાં.
બાદમાં બંને આરોપી પત્રકારોએ વેપારીને આ બાબતની કોઈને જાણ કરશો તો વડોદરા છોડાવી દઈશું તેવી ધાકધમકી આપી હતી. આ ઉપરાંત વધુ રૂપિયાની માંગ કરતાં વેપારીએ દૈનિક પેપરની ઑફિસમાં જઈ સમગ્ર હકીકત વર્ણવી. જેને ગંભીરતાથી લઈ દૈનિક પેપરના બ્રાંચ મેનેજર શ્યામ ચૌહાણે સાપ્તાહિક અખબારનું કામ કરતા જીતેન્દ્ર ઉર્ફે જીતુ વણકર અને દૈનિક અખબારના રિપોર્ટર સિદ્ધાર્થ મણિયાર સામે ખંડણી, ખોટી ઓળખ આપવી અને ધમકી સહિતની કલમો હેઠળ ક્રાઈમ બ્રાંચમાં ફરિયાદ નોંધાવી છે. જેની તપાસ SOG પોલીસના પીઆઈ પોતે કરી રહ્યાં છે.
બંનેએ ચીફ એડિટર અને જુનિયર રિપોર્ટર તરીકેની ઓળખ આપી
અટલાદરામાં સસ્તા અનાજની દુકાન ધરાવતા વેપારી રાજેશ ખટીકે બ્રાંચ મેનેજરને જણાવ્યું કે, 27 જૂને તેમની અટલાદરા સસ્તા અનાજની દુકાન પર આવેલા બે વ્યક્તિ પૈકી સિદ્ધાર્થ અરૂણકુમાર મણિયારે પોતે શહેરના દૈનિક અખબારનો ચીફ એડિટર અને જીતેન્દ્ર ઉર્ફે જીતુ હિંમતભાઈ વણકરે દૈનિક અખબારના જુનિયર રિપોર્ટર તરીકે ઓળખ આપી ‘તમે શહેરના સૌથી મોટા કાળા બજારિયા છો, દુકાને ટેમ્પો બોલાવીને ઘઉં કાળા બજારમાં કાઢવા માટે તૈયારી કરો છો’ તેવી ધમકી આપી હતી.
આ સાથે બંને આરોપીએ માંજલપુરના જીજ્ઞાશાબેનની સસ્તા અનાજની દુકાન પુરવઠા અધિકારીને કહીને બંધ કરાવી દીધી છે. માંજલપુરની સસ્તા અનાજની દુકાનના સંચાલક પાસેથી રૂા.1.20 લાખનો તેમણે તોડ કર્યો છે, તમારે શું કરવું છે? તેવી ધમકી પણ આપી હતી. આ ઉપરાંત આરોપી સિદ્ધાર્થે વેપારીને ધમકી આપતા કહ્યું કે ‘શહેર મને યમરાજના નામે ઓળખે છે. તારે તારી દુકાન સારી રીતે ચલાવવી હોય અને કાળાબજારીનો ધંધો કરવો હોય તો તારે મને રૂ. 40 લાખ આપવા પડશે'. આથી, SOG પોલીસે આરોપી પત્રકાર સિદ્ધાર્થ મણિયારની ધરપકડ કરી છે જ્યારે આરોપી જીતેન્દ્ર વણકર હજી ફરાર છે.
પોલીસે આરોપી સિદ્ધાર્થને કોર્ટમાં રજૂ કરી 7 દિવસના રિમાન્ડની માંગ કરી
પોલીસે આરોપી સિદ્ધાર્થને કોર્ટમાં રજૂ કરી 7 દિવસના રિમાન્ડની માંગ કરી છે, જ્યારે આરોપી જીતેન્દ્ર વણકરની શોધખોળ શરૂ કરી છે. તેમજ આરોપી સિદ્ધાર્થ પાસેથી 12.51 લાખ રૂપિયા પણ રિકવર કરવા કાર્યવાહી શરૂ કરી છે. મહત્વની વાત છે કે આરોપી સિદ્ધાર્થ અને જિતેન્દ્રની સાથે પુરવઠા વિભાગના કોઈ અધિકારીની સાંઠગાંઠ છે કે કેમ તેમજ અન્ય કોઈ વેપારી પાસેથી પણ ખંડણી વસૂલી છે કે કેમ તે દિશામાં વધુ તપાસ હાથ ધરી છે.