દેવનગરમાં સવારે 10 વાગ્યા આસપાસ ગેસ સિલિન્ડર બ્લાસ્ટ થતાં 2ના મોત થયા હતા જ્યારે 4 લોકો ગંભીર રીતે ઘાયલ થયા છે.
વડોદરાના દેવનગરમાં ગેસ સિલિન્ડર ફાટવાનો મામલો
CM ભુપેન્દ્ર પટેલે ઘટના મુદ્દે દુખ વ્યક્ત કર્યુ
મૃતકના પરિવારને રૂ.2 લાખની સહાય જાહેર કરી
વડોદરાના વાસણાના દેવનગરમાં ગેસ સિલિન્ડર બ્લાસ્ટ થતા હડકંપ મચી ગયો હતો. આ દુર્ઘટનામાં 2 મહિલાઓના મોત નીપજ્યાં છે. તો 4 લોકો ગંભીર રીતે દાઝી ગયા છે. તેઓને સારવાર માટે હોસ્પિટલમાં ખસડેવામાં આવ્યા છે.આજે સવારે 10 વાગ્યા આસપાસ ઘટના ઘટી હતી.
CM ભુપેન્દ્ર પટેલે ટ્વિટ કરીને દુખ વ્યક્ત કર્યુ
ત્યારે ગેસ સિલિન્ડર ફાટવાનો મામલે CM ભુપેન્દ્ર પટેલે ઘટના મુદ્દે દુખ વ્યક્ત કર્યુ છે. મૃતકના પરિવારને રૂ.2 લાખની સહાય જાહેર કરી છે.CM ભુપેન્દ્ર પટેલે ટ્વિટ કરીને ઈજાગ્રસ્તોને જલ્દી સાજા થવા માટે પ્રાર્થના પણ કરી છે.
વડોદરાના સૈયદ વાસણા ખાતે મકાનમાં આગ લાગવાની ઘટના ખૂબ દુ:ખદ છે. દુર્ઘટનામાં જાન ગુમાવનાર મૃતકના પરિવારજનોને રાજ્ય સરકાર રૂપિયા બે લાખની સહાય આપશે. દુર્ઘટનામાં ઈજાગ્રસ્ત થનાર જલ્દીથી સાજા થાય તેવી ઈશ્વરને પ્રાર્થના કરું છું.
લોકોના ટોળે ટોળા દોડી આવ્યા
પ્રાપ્ત વિગતો અનુસાર, દેવનગરમાં આજે સવારે એક મકાનમાં સિલિન્ડર બ્લાસ્ટ થયો હતો. ગેસ સિલિન્ડર બ્લાસ્ટ થતા આખી સોસાયટીમાં કંપન અનુભવાયું હતું. આ બનાવને પગલે લોકોના ટોળે ટોળા દોડી આવ્યા હતા. તો આ દુર્ઘટનાની જાણ થતાં ત ફાયર બ્રિગેડની ટીમ પણ સ્થળ પર દોડી હતી અને બચાવ કામગીરી હાથ ધરી હતી.
ફાયરની ટીમે હાથ ધરી હતી બચાવ કામગીરી
ફાયર બ્રિગેડની ટીમ દ્વારા કાટમાળ નીચે દબાયેલા લોકોને બહાર કાઢીને હોસ્પિટલમાં ખસેડ્યા હતા. આ દુર્ઘટનામાં બે મહિલા લીલાબેન ચૌહાણ અને શકુંતલાબેન જૈનનું મોત નીપજ્યું છે. તો 4 લોકો ગંભીર રીતે દાઝી ગયા છે. તેઓને સારવાર અર્થે હોસ્પિટલમાં ખસેડવામાં આવ્યા છે. અસરગ્રસ્ત પરિવારોને કોર્પોરેટરો રૂ.25/25 હજારની સહાય આપશે. ભાજપ સંગઠન અને કોર્પોરેટરો ઘરવખરીની વ્યવસ્થા કરશે તેવી મુલાકાત દરમિયાન જાહેરાત પણ કરી હતી.
બ્લાસ્ટથી આસપાસના 6 મકાનોને નુકસાન
ગેસ સિલિન્ડર ફાટતા વાસણા વિસ્તારમાં લોકોમાં અફરાતફરીનો માહોલ સર્જાઇ ગયો હતો. જે મકાનમાં સિલિન્ડર બ્લાસ્ટ થયો છે તે મકાનને તો નુકસાન થયુ જ છે. સાથે આસપાસના 6 જેટલા મકાનોને નુકસાન થયું છે. હાલ પોલીસ દ્વારા FSLની મદદથી વધુ તપાસ શરુ કરવામાં આવી છે.