રાજ્યની વડોદરા મહાનગરપાલિકાના સૌ પ્રથમ મ્યુનિસિપલ બોન્ડ-ર૦રરનું બોમ્બે સ્ટોક એક્સચેન્જમાં લિસ્ટીંગ મુંબઇ ખાતે મુખ્યમંત્રીની ઉપસ્થિતીમાં સંપન્ન થયું.
વડોદરા કોર્પોરેશનના 100 કરોડના બોન્ડનું આજે BSEમાં લિસ્ટિંગ
મુંબઈ બી.એસ.ઇ ખાતે સી.એમ ભુપેન્દ્ર પટેલે કર્યો ઘંટનાદ
કોર્પોરેશને ડિબેન્ચરની જેમ બોન્ડ બહાર પાડી 100 કરોડનું સ્વંભંડોળ ઉભુ કર્યું
વડોદાર મનપાના 100 કારોડના બોન્ડનું આજે BSEમાં લિસ્ટિંગ થયું છે. BSE ખાતે મુખ્યમંત્રી ભુપેન્દ્ર પટેલે ઘંટનાદ કર્યો હતો. આ દરમિયાન મ્યુનિ.કમિશ્નર, મેયર કેયુર રોકડીયા સહિતના મહાનુભાવો ઉપસ્થિતિ રહ્યા હતા. કોર્પોરેશને ડિબેન્ચરની જેમ બોન્ડ બહાર પાડી 100 કરોડનું સ્વંભંડોળ ઉભુ કર્યું છે. કેન્દ્ર સરકારે બોન્ડ થકી ફંડ ઉભું કરવા 26 મનપાને માન્યતા આપી છે. સ્માર્ટ સીટી મિશન અને અમૃત યોજના હેઠળ માન્યતા અપાઇ છે. વડોદરા કોર્પોરેશનએ 100 કરોડના બોન્ડ બહાર પાડ્યા છે. જે બોન્ડ 1007 કરોડ સુધી 7.15 ટકાના દરે સબ્સ્ક્રાઇબ થયા હતા.
અર્બનાઇઝેશન હવે ચેલેન્જ નહિ, ઓર્પોચ્યુનિટી બની ગયું છેઃ મુખ્યમંત્રી ભૂપેન્દ્ર પટેલ
CM ભૂપેન્દ્ર પટેલે મુંબઇમાં આયોજિત સમારોહમાં સંબોધન કર્યું હતું. CM ભૂપેન્દ્ર પટેલે જણાવ્યું હતું કે, મહાનગરો, શહેરોમાં વસવાટ કરતા નાગરિકોની સુખાકારી માટે ઇન્ફ્રાસ્ટ્રકચર ડેવલપમેન્ટ કામો, અર્બન ઇન્ફ્રાસ્ટ્રકચર ફેસેલિટીઝ માટે મ્યુનિસિપલ બોન્ડથી ભંડોળ મેળવી લોકલ અર્બન બોડીને ગ્લોબલ ફાયનાન્સિયલ માર્કેટ સાથે જોડવાની ગુજરાતની મહાનગરપાલિકાઓએ સફળતા મેળવી છે.
ભૂપેન્દ્ર પટેલે કહ્યું કે, પ્રધાનમંત્રી નરેન્દ્ર મોદીએ દેશની અર્બન લોકલ બોડીઝ, શહેરી વિકાસ વિભાગ અને સેબીના સહયોગથી મ્યુનિસિપલ બોન્ડ ઊભા કરી લોકલ સેલ્ફ ગર્વમેન્ટ બોડીઝને પ્રૂડન્ટ ફાયનાન્સિયલ મેનેજમેન્ટની પ્રેરણા આપી છે. આવા બોન્ડના ભંડોળથી અર્બન ઇન્ફ્રાસ્ટ્રકચરના કામોની વૃદ્ધિ સાથે લોક સહભાગીતાને પણ સાંકળી સૌના સાથ, સૌના વિકાસ અને સૌના વિશ્વાસની નેમ તેમણે પાર પાડી છે તેમ મુખ્યમંત્રીએ ઉમેર્યુ હતું.
મુખ્યમંત્રીએ જણાવ્યું કે, ગુજરાતમાં અમદાવાદ અને સુરત મહાનગર પછી વડોદરા ત્રીજી મહાનગરપાલિકા છે જેણે આવા બોન્ડથી શહેરી સુખાકારીના કામોને નવી દિશા આપી છે. તેમણે કહ્યું કે, અર્બનાઇઝેશન હવે ચેલેન્જ નહિ, ઓર્પોચ્યુનિટી બની ગયું છે અને વર્લ્ડ કલાસ ઇન્ફ્રાસ્ટ્રકચરથી શહેરો લવેબલ, લિવેબલ બનવા લાગ્યા છે. શહેરી સુખાકારીની વ્યાખ્યા લાઇટ, પાણી, ગટર રસ્તાથી વિસ્તરીને ઇઝ ઓફ લિવીંગ સુધી પહોંચી છે.
ભૂપેન્દ્ર પટેલે વિશ્વાસ વ્યકત કર્યો કે, પ્રધાનમંત્રી નરેન્દ્રભાઇ મોદીની પ્રેરણાથી આ વર્ષ આઝાદીના અમૃત મહોત્સવ વર્ષ તરીકે દેશમાં ઉજવાય છે ત્યારે ‘અમૃત’ મિશન માટે કેન્દ્રીય સહાય ઉપરાંત આ બોન્ડથી મળેલી જનભાગીદારી વડોદરા મહાનગરના વિકાસને આવનારા સમયનો અમૃત કાળ બનાવશે.
ભૂપેન્દ્ર પટેલે ઉમેર્યુ કે, આવા બોન્ડથી મહાનગરપાલિકાઓના નાણાકીય વ્યવસ્થાપનમાં આત્મનિર્ભરતા આવશે. શહેરી વિકાસ અને અર્બન ઇન્ફ્રાસ્ટ્રકચર ડેવલપમેન્ટ ક્ષેત્રે ગુજરાતને આત્મનિર્ભર બનાવવામાં આવા બોન્ડ મહત્વપૂર્ણ બનશે અને આત્મનિર્ભર શહેરો, આત્મનિર્ભર ગુજરાતથી આત્મનિર્ભર ભારતની નેમ સાકાર થશે તેવી અપેક્ષા મુખ્યમંત્રીએ દર્શાવી હતી.
૧૦૦ કરોડનું ફંડ ખૂબ જ ઓછા દરે બોન્ડ થકી મળ્યું છેઃ મેયર કેયુર રોકડીયા
આ પ્રસંગે વડોદરા શહેરના મેયર કેયુર રોકડીયાએ જણાવ્યું હતું કે, વડોદરા મહાનગપાલિકાએ પ્રથમ બોન્ડનું લિસ્ટિંગ કર્યું છે. રૂ. ૧૦૦ કરોડનું ફંડ ખૂબ જ ઓછા દરે બોન્ડ થકી મળ્યું છે, જે વડોદરાના શહેરીજનોના પીવાના પાણી સહિતના વિકાસ પ્રોજેક્ટ માટે ઉપયોગમાં લેવાશે.
વડોદરાના વિકાસ માટે આ ભંડોળ આશીર્વાદરૂપ બનશેઃ BSEના MD અને CEO આશિષકુમાર
BSEના એમ.ડી. અને સી.ઈ.ઓ. આશિષકુમારે વડોદરા મહાનગરપાલિકાને અભિનંદન પાઠવી, વડોદરાના વિકાસ માટે આ ભંડોળ આશીર્વાદરૂપ બનશે તેમ જણાવ્યું હતું. અર્બન લોકલ બોડી આવા ફંડ દ્વારા હકારાત્મક અભિગમ સાથે નાગરિકોની સુવિધામાં ઉમેરો કરી શકે છે તેમ પણ તેમણે ઉમેર્યું હતું.
ગુજરાત સરકારનો શહેરી વિકાસનો આ અભિગમ અન્ય માટે પ્રેરણારૂપ બન્યો: ભારત સરકારના સંયુક્ત સચિવ કૂણાલકુમાર
સ્માર્ટ સિટી મિશન ડાયરેક્ટર અને ભારત સરકારના સંયુક્ત સચિવ કૂણાલકુમારે જણાવ્યું કે, ગુજરાત સરકારનો શહેરી વિકાસનો આ અભિગમ અન્ય માટે પ્રેરણારૂપ બન્યો છે. ભારત સરકાર અને બોમ્બે સ્ટોક એક્સ્ચેંજના સહિયારા પ્રયાસોથી દેશના શહેરોમાં ઇન્ફાસ્ટ્રક્ચર ઉભું કરવાનું નવું પ્લેટફોર્મ તૈયાર થયું છે.
ગુજરાત સરકારના નાણાં વિભાગના અગ્ર સચિવ જે. પી. ગુપ્તાએ જણાવ્યું હતું કે, આ ફંડ શહેરી વિકાસના કામોનું ચાલક બળ બનશે. અમદાવાદ બાદ સુરત અને હવે વડોદરા મહાનગરપાલિકાએ ભંડોળ ઉભું કરી નાગરિકોની સુખાકારી માટે વિકાસની આ નવતર કેડી કંડારી છે.
યુ.એસ.ટ્રેઝરર બીલ બ્લોકે ગુજરાત સરકાર અને વડોદરા મહાનગરપાલિકાને બોન્ડ થકી ફંડ એકત્ર કરવાની સારી કામગીરી બદલ અભિનંદન પાઠવ્યા હતા. આવું વધુ ફંડ મેળવી લોકહિતના કાર્યો કરવાનો તેમણે અનુરોધ પણ કર્યો હતો. આ પ્રસંગે વડોદરા મહાનગરપાલિકાના કમિશનર શાલિની અગ્રવાલ, ઉપમેયર નંદાબેન જોશી સહિતના અગ્રણીઓ ઉપસ્થિત રહ્યા હતા.
મુંબઈ ખાતે રાજ્યની વડોદરા મહાનગરપાલિકાના સૌ પ્રથમ મ્યુનિસિપલ બોન્ડ-ર૦રરનું બોમ્બે સ્ટોક એક્સચેન્જમાં લીસ્ટીંગ થયું હતું.’અમૃત’ મિશન હેઠળ મહાનગરપાલિકાએ આપવા પાત્ર ફાળાની રૂ. ૧૦૦ કરોડની રકમ મ્યુનિસિપલ બોન્ડના માધ્યમથી ઉભી કરવાની સફળતા વડોદરાએ મેળવી છે. pic.twitter.com/B3zZnMmyAy