વડોદરાની મહારાજા સયાજીરાવ યુનિવર્સિટીમાં વિદ્યાર્થી સંઘની ચૂંટણીની જાહેરાત થઈ છે. આગામી 10 ઓગસ્ટના રોજ યુનિવર્સિટીમાં વિદ્યાર્થી સંઘની ચૂંટણી યોજાશે. 31 જૂલાઈથી ઉમેદવારી ફોર્મ ભરવાની શરૂઆત થશે.
ત્યારબાદ 2 ઓગસ્ટ સુધી ઉમેદવાર ફોર્મ પરત ખેંચી શકશે. આ ચૂંટણીના તારીખો જાહેર થતા વિદ્યાર્થી ગ્રુપો સક્રિય થયા છે. આ ચૂંટણીમાં ABVP અને NSUI વિદ્યાર્થી વચ્ચે ટક્કર જોવા મળશે. જય હો, SSG ગ્રુપ અને ક્રિષ્ના ગ્રુપ પણ ચૂંટણીના મેદાને છે.
એમ.એસ. યુનિવર્સિટીના રજિસ્ટાર એન.કે. ઓઝાએ જણાવ્યું હતું કે, વિદ્યાર્થી સંઘની ચૂંટણી આગામી 10 ઓગસ્ટના રોજ યોજાશે. જે અંગ જાહેરનામું પ્રસિદ્ધ કરવામાં આવ્યું હતું. જેમાં 31 જૂલાઇથી ઉમેદવારી પત્રો ભરવાની શરૂઆત થશે. 2 ઓગસ્ટના રોજ ઉમેદવારી પત્રો પર ખેંચવાની અંતિમ તારીખ છે. જ્યારે 10 ઓગસ્ટના રોજ સવારે 10થી 2 વાગ્યા સુધી મતદાનનો રહેશે. એમ.એસ. યુનિવર્સિટી દ્વારા વિદ્યાર્થી સંઘની ચૂંટણીની તમામ તૈયારી કરી દેવામાં આવી છે.
યુનિવર્સિટીની ચૂંટણી જાહેર થતાં કેમ્પસમાં ગરમાવો આવી ગયો હતો. આ વર્ષેના નવા વિદ્યાર્થીઓમાં ચૂંટણીને લઇને ભારે ઉત્સાહ જોવા મળ્યો હતો. મહત્વનું છે કે, વિદ્યાર્થી સંઘની ચૂંટણીને લઇને વિદ્યાર્થી અગ્રણીઓ અને યુનિ.ના વિવિધ સંગઠનો દ્વારા નવા શૈક્ષણિક સત્રની શરૂઆત સાથે કેમ્પસમાં નવા વિદ્યાર્થીઓને આવકારતા હોર્ડિંગ્સો લગાવીને પોતાનો પ્રચાર પ્રસાર શરૂ કરી દીધો હતો.
અત્રે ઉલ્લેખનીય છે કે, એમ.એસ.યુનિવર્સિટીમાં 14 ફેકલ્ટીમાં અને 3 કોલેજોમાં ચૂંટણી યોજાશે. યુનિવર્સિટીની ચૂંટણીની જાહેરાત થતા જ ચૂંટણી પ્રચારનો ધમધમાટ શરૂ થઇ ચૂક્યો છે.