વડોદરા જિલ્લામાં ખનિજ વિભાગે ખનિજ ચોર સામે લાલ આંખ કરી છે. મહીસાગર નદીમાં ખનિજ ચોરી બેફામ થતા માફિયાઓ સામે ખનિજ વિભાગની ત્રણ ટીમે સપાટો બોલાવ્યો છે.
મળતી માહિતી અનુસાર ગઇ કાલે મોડી સાંજે ખનીજ વિભાગની અલગ અલગ ટીમે મહીસાગર નદીમાંથી જે રેતીની ચોરી થઇ રહી છે ત્યાં દરોડા પાડ્યા હતા અને કાર્યવાહી હાથ ધરી હતી. તંત્રએ 1 કરોડનો મુદ્દામાલ જપ્ત કર્યો છે. ગાંધીનગર આણંદ વડોદરાની ટીમે સંયુક્ત ઓપરેશન હાથ ધર્યુ છે.
નોંધનીય છે કે છેલ્લા ઘણા સમયથી અહીંયા રેતીની ચોરી કરવામાં આવતી હતી એવી બાતમી મળી હતી. આ બાતમીના આધારે આ કાર્યવાહી હાથ ધરવામાં આવી છે. આ કાર્યવાહીને લઇને મધ્ય ગુજરાતમાં જે નદીઓ છે ત્યાંથી રેતી ચોરી કરનાર માફિયાઓમાં ફફડાટ ફેલાઇ ગયો છે.