Crime / વડોદરાની યુવતીને એક્સ ફિયાન્સે જાહેરમાં ફટકારી, પોલીસે ગુનો નોંધી તપાસ હાથ ધરી

• પોલીસે આરીફખાન સામે IPC 323, 354, 504 મુજબ ફરિયાદ નોંધી
• .યુવતીની રિક્ષાનો કર્યો પીછો
• યુવક કામધંધો ન કરતો હોવાને કારણે તુટી ગઈ હતી સગાઈ

વડોદરામાં PG તરીકે રહેતી 28 વર્ષીય યુવતી ખાનગી ન્યૂઝ ચેનલમાં નોકરી કરે છે. દોઢ વર્ષ પહેલાં આરીફખાન નામના યુવક સાથે તેની સગાઇ થઇ હતી. થોડા સમય બાદ જાણ થઈ હતી કે આરીફખાન કોઇ કામધંધો કરતો નથી, જેથી યુવતીએ સગાઇ તોડી નાખી હતી, જોકે સગાઈ તૂટી ગયા બાદ યુવકે અદાવત રાખીને તેને પરેશાન કરવાનું શરૂ કર્યું હતું.

એક્સ ફિયાન્સે કર્યો પીછો
બે દિવસ પહેલાં યુવતીની મોટી બહેન ગર્ભવતી હોવાથી તે હોસ્પિટલ જવા માટે અમદાવાદ આવી હતી. ત્યારબાદ યુવતી  હોસ્પિટલથી બરોડા એક્પ્રેસ-વે જતી હતી ત્યારે આરીફખાન તેની ‌રિક્ષાનો પીછો કરતો આવ્યો હતો. 

રસ્તા વચ્ચે જ યુવતીને ફટકારી
ખોખરા સર્કલ પાસે યુવતીએ કંટાળીને ‌રિક્ષા ઊભી રખાવી હતી અને પૂર્વ મંગેતર તેની સાથે વાત કરવા દબાણ કરતો હતો, પરંતુ યુવતીએ કોઇ વાત ન કરતાં આરીફે તેનો હાથ પકડીને તેને હોટલમાં જવા માટે દબાણ કર્યું હતું. યુવતીએ આવું કરવાની ના પાડતાં, તેણે રસ્તા પર જ યુવતીને માર માર્યો હતો.

પોલીસે તપાસ હાથ ધરી
યુવતીએ આ મામલે ખોખરા પોલીસને જાણ કરી હતી. પોલીસે આરીફખાન સામે IPC 323, 354, 504 મુજબ ફરિયાદ નોંધી તપાસ હાથ ધરી છે