કોન્ટ્રાક્ટ / વડોદરાવાસીઓ માટે ગુડ ન્યૂઝ: VMCની સભામાં મેયર કેયુર રોકડીયાની મોટી જાહેરાત, સફર થશે શાનદાર

• વડોદરા કોર્પોરેશનની સામાન્ય સભામાં મેયર કેયુર રોકડીયાની મોટી જાહેરાત
• વડોદરા શહેરમાં કોર્પોરેશન રોડ પર દોડાવશે 200 ઇલેક્ટ્રીક બસ
• ગવર્મેન્ટ ઓફ ઇન્ડિયાની CESL કંપની સાથે કોર્પોરેશને કર્યો કોન્ટ્રાક્ટ

વડોદરા કોર્પોરેશનની સામાન્ય સભામાં મેયર કેયુર રોકડીયા દ્વારા મોટી જાહેરાત કરવામાં આવી છે. અમદાવાદ, રાજકોટ અને હવે વડોદરામાં પણ રાજમાર્ગો પર ઇલેટ્રીનિક બસો દોડાવવામાં આવશે. આ માટે વડોદરા કોર્પોરેશન દ્વારા ગવર્મેન્ટ ઓફ ઇન્ડિયાની CESL કંપની સાથે કોન્ટ્રાક્ટ પણ કરી લેવામાં છે. જેમાં ગવર્મેન્ટ ઓફ ઇન્ડિયાની CESL કંપનીને રજીસ્ટ્રેશન પેટે કંપનીને રૂ. 10 લાખ એડવાન્સમાં  ચૂકવવામાં આવ્યા છે. છ મહિનાથી લઈ દોઢ વર્ષમાં નાગરિકોને એસી અને નોન એસી 200 ઇલેક્ટ્રીક બસોની સુવિધા મળશે.

4 ડેપો અને 8 ચાર્જિંગ સ્ટેશન ઉભા કરવામાં આવશે

કોર્પોરેશનની સામાન્ય સભામાં મેયર કેયુર રોકડીયા જાહેરાત કરતા જણાવ્યું હતું કે, વડોદરા શહેરમાં 200 ઇલેક્ટ્રીક બસ દોડાવવામાં આવશે. ઇલેક્ટ્રીક બસ માટે 60 કરોડ રૂપિયાના ખર્ચે શહેરમાં 4 ડેપો અને 8 ચાર્જિંગ સ્ટેશન ઉભા કરવામાં આવશે. વધુમાં જણાવ્યું હતું કે કોર્પોરેશન દ્વારા બસ ભાડાનુ કલેક્શન કરશે. તેમજ બસ સેવા પાછળ ગવર્મેન્ટ ઓફ ગુજરાત કિલોમીટર દીઠ રૂપિયા 25ની ગ્રાન્ટ આપશે.

સિટી બસનો કોન્ટ્રાક્ટ 31 જાન્યુઆરીએ પૂર્ણ

બીજી તરફ વડોદરામાં સિટી બસનો કોન્ટ્રાક્ટ 31 જાન્યુઆરીએ પૂર્ણ થઈ રહ્યો છે. ત્યારે કોન્ટ્રાક્ટ ચાલુ રાખવો કે કેમ તે સ્માર્ટ સિટી બોર્ડ દ્વારા નિર્ણય કરવામાં આવશે. કોન્ટ્રાકટરે વારંવાર લેખિતમાં જાણ કરી તેમ છતાં હજુ સુધી નિર્ણય લેવાયો નથી. આ મામલે ડેપ્યુટી મ્યુનિ. કમિશનર અને સિટી એન્જિનિયર સામે આક્ષેપ પણ થઈ રહયા છે. જેમાં આ બંને અધિકારીઓના હેરાનગતિથી સિટી બસ સેવા બંધ કરવી પડી રહી છે. તેવું કોન્ટ્રાક્ટરે જણાવ્યું છે.