રાજ્યભરમાં વાદળછાયા વાતાવરણ સાથે વરસાદી માહોલ યથાવત છે. રાજ્યમાં ક્યાંક ઝરમર ઝરમર તો ક્યાંક ધોધમાર વરસાદ વરસી રહ્યો છે. વડોદરામાં ભારે વરસાદને લઈને છેલ્લા 36 કલાકથી પરેશાની થઈ રહી છે. હાલમાં પણ અનેક વિસ્તારમાં પાણી ભરાયા છે. બચાવ કામગીરી માટે NDRFની ટીમ કામે લાગી છે. જ્યારે હવામાન વિભાગે હજુ 3 દિવસ સુધી ભારે વરસાદની આગાહી કરી છે.
અપર એર સાયક્લોનિક સિસ્ટમ સક્રિય થતા શુક્રવાર, શનિવાર અને રવિવારે સાર્વત્રિક વરસાદની આગાહી કરવામાં આવી છે. જેમાં અમદાવાદમાં ભારે વરસાદની શક્યતા હવામાન વિભાગે વ્યક્ત કરી છે. તો વડોદરામાં 14 કલાકમાં 20 ઇંચ વરસાદ ખાબકતાં પુરની સ્થિતિ સર્જાઇ છે. જેના પાણી હજુ ઓસર્યા નથી ત્યારે ફરી અતિભારે વરસાદ થઇ શકે છે.
જ્યારે હવામાન વિભાગ દ્વારા ઉત્તર ગુજરાત અને મધ્ય ગુજરાતમાં ભારે વરસાદની આગાહી કરવામાં આવી છે. જેમાં આણંદ, પાટણ અને બનાસકાંઠામાં ભારે વરસાદની શક્યતા છે. આજથી એક સપ્તાહ સુધી ગુજરાતમાં સારા વરસાદની આગાહી હવામાન વિભાગ દ્વારા કરાઇ છે.
તો આ તરફ નવસારી જિલ્લામાં અને ઉપરવાસમાં થયેલા ભારે વરસાદના કારણે જિલ્લાના તમામ નદી નાળા છલકાઈ ગયા છે. નવસારી જિલ્લાની નદીઓનું જળસ્તર સતત વધી રહ્યું છે. નવસારીની પૂર્ણા નદી 12 ફૂટે વહી રહી છે. તો અંબિકા નદીની જળસપાટી પણ 12 ફૂટે પહોંચી છે. તો બીજી તરફ કાવેરી નદીની જળસપાટી 9 ફૂટે પહોંચી છે. જો હજુ પણ વધુ વરસાદ થાય તો નદીઓના પાણી નીચાણવાળા વિસ્તારો માટે આફત બની શકે છે.
જ્યારે આ બાજુ વલસાડ જિલ્લામાં સાર્વત્રિક વરસાદી માહોલ છે. સવારથી જિલ્લાના તમામ તાલુકામાં વરસાદ પડી રહ્યો છે. ઉમરગામમાં 2.32 ઇંચ, કપરાડામાં 1.76 ઇંચ, ધરમપુરમાં 1.24 ઈંચ વરસાદ પડ્યો છે. જ્યારે પારડીમાં એક ઇંચ વરસાદ પડ્યો છે. તો વાપીમાં છેલ્લા 24 કલાકમાં 1.56 ઇંચ વરસાદ પડ્યો છે. ત્યારે સતત વરસાદના કારણે નીચાણવાળા વિસ્તારોમાં પાણી ભરાઇ ગયા છે.