રાજ્યમાં અકસ્માતની ઘટનાઓમાં ફરી વધારો થઇ રહ્યો છે. રાજ્યમાં બુધવારે 4 અલગ અલગ ઘટનાઓમાં 7 લોકોના મૃત્યુ થયા છે. જેમાં વડોદરા, સાબરકાંઠા, દીવ અને નવસારીમાં અકસ્માત સર્જાયા હતા.
વડોદરામાં હીટ એન્ડ રનમાં ત્રણ યુવકના નિધન
સાબરકાંઠામાં અકસ્માતમાં બે લોકોના મૃત્યુ
અલગ અલગ ઘટનાઓમાં 7 લોકોના મૃત્યુ
વડોદરામાં હીટ એન્ડ રનનો બનાવ બન્યો હતો. જે અકસ્માતમાં 3ના મોત થયા છે. કરજણ કંડારી ગામ નજીક JCT પાસે અજાણ્યા વાહન ચાલકે બાઇક ચાલકને ટક્કર મારી હતી. જાણ્યા વાહનચાલકે બાઈકને ટક્કર મારી ફરાર થઇ ગયો હતો. ત્રણેય યુવક પાદરાના હોવાનું સામે આવ્યું છે. જોકે આ ગમખ્વાર અકસ્માત બાદ રોડ પર લોકોના ટોળા ઉમટી પડ્યા હતા અને પોલીસને જાણ થતા જ પોલીસ કાફલો ઘટના સ્થળે પહોંચી ગયો હતો અને ત્રણે મૃતકોના મૃતદેહોને પીએમ માટે મોકલી દેવાયા હતા.
સાબરકાંઠામાં અકસ્માતમાં બે લોકોના મૃત્યુ
સાબરકાંઠાના શામળાજી-હિંમતનગર નેશનલ હાઈવે પર અકસ્માત સર્જાયો હતો. કરણપુર ગામ પાસે અજાણ્યા વાહન ચાલકે બાઇકચાલક દંપતીને અડફેટે લીધા હતા. આ અકસ્માતમાં બાઇકચાલક પુરૂષ અને મહિલાનું ઘટનાસ્થળે મૃત્યુ થયું હતું. અજાણ્યો વાહનચાલક અકસ્માત કરી ફરાર થયો હતો.
આલીપોર હાઈવે પર કારનું ટાયર ફાટતા એક વ્યક્તિનું મોત
નવસારીમાં નેશનલ હાઈવે 48 પર અકસ્માત થયો હતો. આલીપોર હાઈવે પાસેના ઓવરબ્રિજ પાસે અકસ્માત થયો હતો. વલસાડથી સુરત જતી કારનું ટાયર ફાટતા અકસ્માત થયો હતો. આ અકસ્માતમાં એક વ્યક્તિનું કરૂણ મોત થયું. જ્યારે કારમાં સવાર બે વ્યક્તિ ઈજાગ્રસ્ત થયા. જ્યારે ઈજાગ્રસ્તોને સારવાર અર્થે હોસ્પિટલમાં દાખલ કરાયા છે.
દીવમાં કારના અકસ્માતની ઘટના સામે આવી હતી. સફાઈકર્મી મહિલાને કાર ચાલકે અડફેટે લીધી હતી. દારૂના નશામાં ધૂત કાર ચાલકે મહિલાકર્મીને અડફેટે લીધી હતી. આ ઘટનામાં સફાઈકર્મીનું સારવાર દરમિયાન મૃત્યુ થયું છે. અકસ્માતની સમગ્ર ઘટના CCTVમાં કેદ થઈ. સ્થાનિકોએ કાર ચાલકને ઝડપીને પોલીસને સોંપ્યો હતો.