વડોદરા શહેરમાં વહેલી સવારથી વરસાદી માહોલ જોવા મળ્યો હતો. હવામાન વિભાગની વરસાદની આગાહી છે. ત્યારે શહેરના મોટાભાગના વિસ્તારમાં ઝરમર વરસાદ પડ્યો હતો. 10 દિવસના વિરામ બાદ વડોદરામાં વરસાદે ફરી એન્ટ્રી મારી છે. જેમાં રાજમહેલ રોડ, રાવપુરા, માંજલપુર, મકરપુરા, સમા વિસ્તાર, ફતેહગંજ અને કારેલીબાગ વિસ્તારમાં વરસાદી માહોલ સર્જાયો છે.
વડોદરામાં મેઘ મહેર
વડોદરા શહેરમાં ફરી એકવાર ધોધમાર વરસાદ શરૂ થયો છે. વડોદરા શહેરમાં રાજમહેલ રોડ પર પાણી ભરાયા છે. તો કોઠી, SSG હોસ્પિટલની આસપાસ પાણી ભરાવાનું શરૂ થયું છે. આ તરફ લહેરીપુર વિસ્તારમાં પણ પાણી ભરાઈ રહ્યા છે.
નીચાણવાળા વિસ્તારમાં પાણી ભરાયા
વડોદરાના ડભોઈ પંથકમાં ધીમીધારે વરસાદનું આગમન થયું છે. 6 દિવસના વિરામ બાદ ડભોઈમાં ફરી એક વખત વરસાદનું આગમન થયુ છે. જિલ્લામાં છેલ્લા 2 કલાકથી વરસાદ વરસી રહ્યો છે. વરસાદ થતા નીચાણવાળા વિસ્તારમાં પાણી ભરાયા છે.
હવામાન વિભાગની આગાહી
ઉલ્લેખનીય છે કે હવામાન વિભાગ દ્વારા આજથી રાજ્યમાં 4 દિવસ સુધી ભારે વરસાદની આગાહી કરવામાં આવી છે. આમ છેલ્લા થોડા સમયથી રાજ્યમાં વિરામ બાદ ફરી હવામાન વિભાગ દ્વારા ભારે વરસાદની આગાહી કરવામાં આવી છે. જેમાં આજે ઉત્તર, દક્ષિણ અને મધ્ય ભાગમાં વરસાદની શક્યતા જણાવવામાં આવી છે.
જેમાં અમદાવાદ, ખેડા, વડોદરા, દાહોદ અને છોટા ઉદેપુરમાં પણ વરસાદ પડે તેવી સંભાવના વ્યક્ત કરવામાં આવી છે. જ્યારે ઉત્તર ગુજરાતના મહેસાણા, બનાસકાંઠા અને સાબરકાંઠાના અનેક વિસ્તારમાં વરસાદની શક્યતા છે. જ્યારે સૌરાષ્ટ્રની વાત કરીએ તો ભાવનગર, બોટાદ અને સુરેન્દ્રનગરમાં વરસાદ પડી શકે છે. દક્ષિણ ગુજરાતના સુરત, નવસારી અને વલસાડમાં મધ્યથી ભારે વરસાદની આગાહી કરવામાં આવી છે.