વડોદરાના દુમાડ ચોકડી પાસે બે જૂથો વચ્ચે અથડામણમાં 5 રાઉન્ડ ફાયરિંગ થતાં હડકંપ મચી જવા પામ્યો છે. ફાયરિંગમાં 2 વ્યક્તિઓને ઈજા થઈ છે. કઈ રીતે બની ફાયરિંગની જાણો આખો ઘટના ક્રમ
લોકોએ પોલીસ વિરુદ્ધ સૂત્રોચ્ચાર કર્યા
ફાયરિંગ કરનાર આયુબ પઠાણની લાયસન્સ વાળી રિવોલ્વર છે
પોલીસની સામે જ ફાયરિંગ ની ઘટના બનતા પોલીસ પર અનેક સવાલો ઉઠી રહ્યા છે
વડોદરામાં પણ સુરતના સૂર્યા મરાઠીની ગેંગ જેવો આતંક ફેલાઈ રહ્યો છે. સરેઆમ ગોળીબાર કરીને લોકોને પોલીસની સામે બેફામ ડરાવવા ધમકાવવાની કોશિશ થઈ રહી છે.
ઈંટોના ભઠ્ઠાના બે મજૂરો છકડામાં બેસી એક લાખ રૂપિયા લઈને દુમાડ ચોકડી પાસે આવ્યા. તે દરમિયાન રૂપિયા ગાયબ થઈ જતાં છકડા ચાલક અને દંપતી વચ્ચે બબાલ થઈ. તેમાં દુમાડ ચોકડી પાસે બેસી રહેતા કેટલાક લોકો છોડાવવા વચ્ચે પડ્યા જોત જોતામાં મામલો વધુ બિચકતા કેટલાક શખ્સો કારમાં આવ્યા, તેમને કારમાંથી ઉતરી સીધું જ 5 રાઉન્ડ ફાયરિંગ કર્યું જેમાં વજુ ભરવાડ અને દેવસિંહ ભરવાડ ઈજાગ્રસ્ત થયા. જેમને સારવાર માટે હોસ્પિટલ ખસેડ્યા. જ્યારે ફાયરિંગ કરનાર આયુબ પઠાણ સહિત 4 વ્યક્તિઓને પણ અથડામણમાં ઈજા થઈ છે જેમને પણ સારવાર માટે હોસ્પિટલમાં ખસેડાયા છે. પોલીસે હાલમાં સામસામે ગુનો દાખલ કરી તપાસ શરૂ કરી છે.
લોકોએ પોલીસ વિરુદ્ધ સૂત્રોચ્ચાર કર્યા
ફાયરિંગની ઘટના બાદ દુમાડ ચોકડી પાસેના હાઇવે પર મોટી સંખ્યામાં લોકોના ટોળા ભેગા થયા. લોકોએ પોલીસ વિરુદ્ધ સૂત્રોચ્ચાર કર્યા સાથે જ 24 કલાકમાં આરોપીને પકડી પાડવાની માંગ સાથે હાઇવે પર ચક્કાજામ કર્યો. પોલીસ અને લોકો વચ્ચે બોલાચાલી પણ થઈ પરંતુ પોલીસે આરોપીઓને 24 કલાકમાં જ પકડી પાડવાનું આશ્વાસન આપતાં લોકો માન્યા.
ફાયરિંગ કરનાર આયુબ પઠાણની લાયસન્સ વાળી રિવોલ્વર છે
મહત્વની વાત છે ફાયરિંગ કરનાર આયુબ પઠાણની લાયસન્સ વાળી રિવોલ્વર છે. આયુબ ઉત્તરપ્રદેશ સરકાર પાસેથી રિવોલ્વર નું લાયસન્સ લીધું હોવાનો દાવો કરી રહ્યો છે જે દિશામાં પણ પોલીસે તપાસ શરૂ કરી છે. ફાયરિંગ કર્યા બાદ આરોપી આયુબ પોતાના ઘરે જાય છે ત્યારે તેના ઘરના બહારના સીસીટીવી ફૂટેજ સામે આવ્યા. જેમાં આરોપી અને તેના સાગરિતોને કોઈ જ પ્રકારની ઈજા ન થઈ હોવાનું સ્પષ્ટ દેખાય છે. તેમ છતાં આરોપી હોસ્પિટલમાં જઈ દાખલ થઈ ગયા છે ત્યારે હાઇવે પર ચક્કાજામ કરનારા લોકોએ આરોપીઓ સામે કાર્યવાહી નહી થાય તો આવતીકાલે વડોદરાના રસ્તા ચક્કાજામ કરવાની ચીમકી ઉચ્ચારી છે.
પોલીસની સામે જ ફાયરિંગ ની ઘટના બનતા પોલીસ પર અનેક સવાલો ઉઠી રહ્યા છે
મહત્વની વાત છે કે વડોદરામાં છેલ્લા બે માસમાં જૂથ અથડામણ ની ઘટનામાં વધારો થયો છે જે પોલીસ પર અનેક સવાલો ઉઠાવી રહ્યું છે. ટ્રાફિક થી ધમધમતા અને 24 કલાક પોલીસથી સજ્જ દુમાડ ચોકડી પર પોલીસની સામે જ ફાયરિંગ ની ઘટના બનતા પોલીસ પર અનેક સવાલો ઉઠી રહ્યા છે.