વડોદરા પાસે આજવા ખાતે એક વન્ડરલેન્ડ પાર્ક બનાવવામાં આવ્યો છે. આ વન્ડરલેન્ડ પાર્કમાં 800 રૂપિયા જેટલી જંગી ફી લઇને પણ સારી સુવિધા અપાતી હોવાનો આરોપ લાગ્યો છે. સોશિયલ મીડિયા પર ફરતી થયેલી તસ્વીરો મારફતે દાવો કરવામાં આવ્યો છે કે વન્ડરલેન્ડમાં મોટાભાગની રાઇડ્સ બંધ હાલતમાં છે. વાયરલ થયેલી તસ્વીરો અંગે અમે તપાસ શરૂ કરી અને શું પરિણામ આવ્યું જુઓ વાયરલ ટ્રુથના આ રિપોર્ટમાં.
વડોદરા પાસે આવેલા આતાપી વન્ડરલેન્ડ પાર્કના ઉદઘાટનને માંડ એક મહિનો પણ નથી થયો ત્યારે સોશિયલ મીડિયા પર કેટલીક ચોંકાવનારી તસ્વીરો વાયરલ થઇ છે. વાયરલ થયેલી આ તસ્વીરો સાથે દાવો કરવામાં આવ્યો છે કે આતાપી વન્ડરલેન્ડ પાર્કમાં સુવિધાના નામે શૂન્ય વ્યવસ્થા છે. ન તો રાઇડ્સના ઠેકાણા છે ન તો પર્યટકોના કોઇ વ્યક્તિ સવાલ આપવા માટે તૈયાર છે. એક વ્યક્તિ દિઠ 800 રૂપિયા જેટલી જંગી ફી ભર્યા બાદ પણ તમામ રાઇડ્સમાં બેસવાનો મોકો મળતો નથી.
આતાપી વન્ડરલેન્ડ પાર્કનું ઉદઘાટન મુખ્યમંત્રીના હસ્તે થયું હતું. વળી અમદાવાદ તરફથી જો સ્ટેચ્યુ ઓફ યુનિટી તરફ લોકો જવા ઇચ્છે તો સાથે આજવા ખાતે આતાપી વન્ડરલેન્ડ પાર્કની મુલાકાત પણ લઇ શકે તે પણ એક ઉદ્દેશ હતો. તો પછી સવાલ ઉભો થાય છે કે શું માત્ર એક જ મહિનામાં કરાબ વહિવટની પોલ ખુલી ગઇ? આપાતી વન્ડરલેન્ડ પાર્કમાં લોકો માટે કોઇ જ સુવિધા નથી? ટિકિટ લીધા બાદ પણ કેમ નથી આપવામાં આવતી સુવીધા?
વાયરલ થયેલી તસ્વીરો કેટલાક દર્શકો દ્વારા અમારા સુધી પહોંચી એટલે વાયરલ તસ્વીર દ્વારા જે દાવો કરવામાં આવ્યો છે તે સાચો છે કે ખોટો તે જાણવા માટે ગ્રાઉન્ડ ઝીરો પર પહોંચવા જરૂરી હતું. માટે અમારા સંવાદદાતા જપ્તવ્ય યાજ્ઞિક આતાપી વન્ડરલેન્ડ પાર્ક પહોંચ્યા.
આતાપી વન્ડરલેન્ડ પાર્ક પહોંચી અમારી ટીમના કેમેરામાં જે દ્રશ્યો કેદ થયા તે એકદમ ચોંકાવનારા હતા. કારણ કે આતાપી વન્ડરલેન્ડ પાર્કમાં તમામ રાઇડ્સ સારી રીતે ચાલી રહી હતી અને ફરવા માટે આવેલા તમામ લોકો પણ ઉત્સાહભેર મોજ માણી રહ્યા હતા. અમને ન તો કોઇ રાઇડ બંધ હાલતમાં જોવા મળી ન તો ફરવા માટે આવેલા કોઇ વ્યક્તિની ફરીયાદ સાંભળવા મળી. આ નજારો જોઇને વધુ મુજવણભરી સ્થિતિ ઉભી થઇ. એટલે આખરે વાયરલ થયેલા મેસેજ અંગે આતાપી વન્ડરલેન્ડ પાર્કના સિક્યોરિટી હેડ જીગ્નેશ ચૌહાણનો સંપર્ક કરવામાં આવ્યો. તેમને વાયરલ થયેલી તસ્વીરો બતાવવામાં આવી અને પછી તસ્વીર અંગે જે સવાલ ઉઠ્યા હતા તે અંગે પણ સિક્યુરિટી હેડને જણાવ્યું.
આતાપી વન્ડરલેન્ડ પાર્કના સિક્યોરિટી હેડની વાત સાંભળ્યા બાદ અંદાજો લગાવી શકાય છે કે જે દિવસે પાર્ક બંધ હશે તે દિવસની વાયરલ તસ્વીરો હોઇ શકે છે અને પાર્ક બંધ હોવાના કારણે સર્જાયેલી અવ્યવસ્થાને કોઇએ કાયમી અવ્યવસ્થા માની લીધી હશે. એટલે કહી શકાય કે વડોદરા પાસેના આતાપી વન્ડરલેન્ડ પાર્કમાં સુવિધાનો અભાવ હોવાનો વાયરલ તસ્વીર દ્વારા થયેલો દાવો ખોટો સાબિત થાય છે.