ઓનલાઈન ફ્રોડથી છેતરાયેલા 200થી વધારે ફરિયાદીઓને વડોદરા સાયબર ક્રાઈમ પોલીસે 59 લાખ જેટલી માતબર રકમ પરત અપાવી એક ઉમદા કાર્ય કર્યું છે. સાયબર ક્રાઈમ દ્વારા બહુ જ ઓછા સમયમાં આ પ્રકારની કામગીરી કરીને ભોગ બનનાર વ્યક્તિઓને રોકડ રકમ પરત અપાવી છે.
ડિજિટલ યુગમાં વધી રહેલી ટેકનોલોજીની સાથે ઓનલાઇન ફ્રોડ કરતી ભેજાબોજની ટોળકીઓ પણ સક્રીય બની છે. ઓનલાઇન ફ્રોડનો સૌથી વધુ ભોગ મહિલાઓ, વૃદ્ધો, બેંકિંગ પ્રક્રિયાથી અજાણ તેમજ સોશીયલ મિડીયાનુ પુરતુ જ્ઞાન ન ધરાવતા લોકો ભેજાબાજ ટોળકીના સોફટ ટાર્ગેટ બને છે. મોબાઇલ પર સંપર્ક કરી ઓ.ટી.પી નંબર મેળવી, બેન્ક ખાતાની વિગતો તેમજ એ.ટી.એમ પીન મેળવી રૂપિયા પડાવી લીધા હોવાના અસંખ્ય ફરીયાદો સાયબર ક્રાઇમને મળી હતી. જે સંદર્ભે છેલ્લા 6 મહિનામાં શહેરના 217 ઉપરાંત લોકો આ પ્રકારે છેતરાયા હોવાની ફરીયાદ સાયબર ક્રાઇમમાં નોંધાઇ હતી. આ અંગે ટેકનિકલ સોર્સના આધારે તપાસ હાથ ધરી ક્રાઇમ બ્રાન્ચની સાયબર ટીમે કુલ 59,21,966ની રકમ પરત અપાવી છે.
26 હજાર ચૂકવી દીધા અને મોબાઇલની ડિલિવરી ન મળી
વડોદરાના વાઘોડિયા રોડ પર રહેતાં એક યુવકે પોતાની ઓળખ છુપી રાખીને વાત કરતાં જણાવ્યું હતું કે ઓનલાઈન મોબાઈલ ખરીદી માટે તેને 26 હજાર જેટલી રકમની ચુકવણી કરી હતી. સમય વિત્યા બાદ તેને મોબાઈલની ડિલિવરી મળી ન હતી અને તે ઓનલાઈન છેતરપિંડીનો ભોગ બન્યો હોય તેમ લાગ્યું હતું. આ બાબતે તેને સાયબર ક્રાઇમ પોલીસ મથકે ફરિયાદ નોંધાવી હતી અને સાયબર ક્રાઈમ દ્વારા ટેક્નિકલ સોર્સની મદદથી આ ભોગ બનનાર યુવકના રૂપિયા પરત અપાવ્યા હતાં.
આ પ્રકારે આચરવામાં આવે છે છેતરપિંડી
ઓનલાઈન છેતરપીંડી કરનાર તત્વો સ્માર્ટ હોવાથી તેઓની મોડ્સ ઓપરેન્ડીમાં કેટલાક લોકો આવી જતા હોય છે અને નાણાકીય વ્યવહાર કરી નાખતા હોય છે. આ અંગે એ.સી.પી.સાયબર ક્રાઇમના ભરત રાઠોડે વાત કરતાં જણાવ્યું હતું કે ઠગબાજો કંપનીના ઇ-મેઇલ હેક કરી, ફોન ઉપર બેન્ક અધિકારીની ખોટી ઓળખ આપી, એટીએમ કાર્ડ ફ્રોડ, ક્રેટીડ કાર્ડ, લોટરી કાર્ડ, નોકરી ફ્રોડ, શોપીંગ ફ્રોડ, બજાજ કાર્ડ અને ઓએલએક્સ દ્વારા છેતરપિંડી કરવામાં આવતી હોય છે. લોકોએ સાવચેત રહેવું ખૂબ જરૂરી છે.
પોલીસ પરથી ભરોસો ઉઠી ગયો તેને પણ વિશ્વાસ જાગ્યો
સાયબર ક્રાઇમના કર્મચારીઓ દ્વારા અથાગ મહેનત બાદ છેલ્લા છ મહિનામાં 217 જેટલા લોકો સાથે થયેલી છેતરપીંડીના નાણાં રૂ. 59,21,966 સાઈબર ક્રાઈમે પરત અપાવ્યા છે. જેના કારણે પોલીસ પરથી ભરોસો ઉઠી ગયો છે તેવા લોકોને પણ વિશ્વાસ જાગ્યો છે અને ખરી મહેનતની પુંજી પરત મળી છે તેનો આનંદ છે.