લોકસભાની ચૂંટણી પહેલા મતદારોને આકર્ષવા વડોદરા કોર્પોરેશને ઘડ્યો પ્લાન

લોકસભાની ચૂંટણીના પગરવ સંભળાઈ રહ્યા છે આ  વાતની સાબિતી માત્ર નેતાઓના ભાષણોમાં જ નથી મળતી, પરંતુ નગર-મહાનગરોની કોર્પોરેશન દ્વારા લેવાતાં પગલાઓથી પણ મળી રહે છે. લોકસભાની ચૂંટણીની તારીખો ગમે ત્યારે જાહેર થઈ શકે છે. ત્યારે વડોદરા કોર્પોરેશને ચૂંટણી પહેલા મતદારોને આકર્ષવા મોટી લહાણી કરી છે. ત્યારે કઈ રીતે મતદારોને આકર્ષવા કોર્પોરેશને ઘડયો છે પ્લાન તે જુવો આ રિપોર્ટમાં.   

વડોદરા કોર્પોરેશનમાં સામાન્ય રીતે ગુરુવારે સ્ટેન્ડીંગ કમિટીની બેઠક મળે છે, પરંતુ લોકસભાની ચૂંટણીને લઈ કોર્પોરેશનમાં સ્ટેન્ડીંગ કમિટીની બેઠક ગુરુવારના બદલે મંગળવારે જ બોલાવવામાં આવી. સ્ટેન્ડીંગ કમિટીની બેઠકમાં 46 કામોની દરખાસ્ત લાવવામાં આવી જેને માત્ર એક કલાકમાં જ ચર્ચા કરી મંજૂરી આપી દેવામાં આવી.

કોર્પોરેશને લોકસભાની ચૂંટણી પહેલા 350 કરોડથી વધુના વિકાસના કામોને માત્ર ગણતરીની મિનિટોમાં જ  મંજૂરી આપી દીધી અને આ રીતે મતદારોને આકર્ષવાની કોશિશ કરી છે. આટલું જ નહી સ્માર્ટ સિટી અંતર્ગત પણ સ્માર્ટ સિટી કંપનીએ કરોડો રૂપિયાના કામો મંજુર કર્યા છે. કોર્પોરેશનના આ પગલાને વિપક્ષે ચૂંટણીલક્ષી અને નાગરિકોને ચૂંટણી માટે રિઝવનારું ગણાવ્યું છે.

સ્ટેન્ડીંગ કમિટીએ જે જે કામો મંજુર કર્યા તેની વાત કરીએ તો ડ્રેનેજ અને વરસાદી ગટરના 135 કરોડના પ્રોજેકટ, વુડા વિસ્તારમાં આવેલા ભાયલીમાં સ્ટ્રીટ લાઈટ માટે 3.10 કરોડનો પ્રોજેકટ, આર.સી.સી બાંકડા પાછળ 1.60 કરોડ રૂપિયા, રોડ પ્રોજેકટ શાખા માટે 13.28 કરોડ રૂપિયા, એફોર્ડેબલ હાઉસીંગ માટે 151.84 કરોડ રૂપિયા, પાણી પુરવઠા, આરોગ્ય શાખા તેમજ અન્ય કરોડોના વિકાસના કામો અને શહેરમાં ટાઉન વેન્ડીંગ સમિતીને પણ મંજુરી આપવામાં આવી છે.

સ્ટેન્ડીંગ કમિટીની બેઠકમાં કરોડો રૂપિયાના કામો મંજુર કરી દેવાતા વિપક્ષ લાલઘુમ થયો છે. કોર્પોરેશનના વિપક્ષના નેતાએ 350 કરોડના વિકાસના કામો મંજુર કરી દેવાતા સવાલો ઉઠાવ્યા છે સાથે જ શહેરીજનોને મૂર્ખ બનાવવાનો શાસકોનો પ્રયાસ હોવાનો આક્ષેપ કર્યો છે. વિપક્ષનું કહેવું છે કે, ભંડોળના અભાવે બાકી રહેલા ભૂતકાળના કામો હવે એક સાથે ભેગા કરીને મંજૂર કરી દઈને મોટું ચિત્ર ઊભું કરવામાં આવી રહ્યું છે. 

મહત્વની વાત છે કે કોર્પોરેશનની સ્ટેન્ડીંગ કમિટીએ કરોડોના કામોને મંજુરી આપી વિપક્ષ પાસેથી વિકાસના કામો નથી થતા તે મુદ્દો જ છીનવી લીધો છે. સાથે જ મધ્યમવર્ગ અને ગરીબોને ખુશ કરવાનો પ્રયાસ કર્યો છે. ત્યારે લોકસભા ચૂંટણી પહેલા કોર્પોરેશનના શાસકોનો આ પેતરો ચૂંટણીમાં કેટલો ફાયદો પહોચાડે છે તે જોવું રહ્યું.