પરિવારવાદ / વડોદરા કોર્પોરેશનની ચૂંટણી લડવા ભાજપમાં રાફડો ફાટ્યો: જુઓ MLA એ કોની માટે ટિકિટ માંગી

• ભાજપમાં ટિકિટ માટે નેતાઓ આવ્યા મેદાને 
• વડોદરામાં MLAએ પોતાના પરિવારજનો માટે ટિકિટ માગી
• પુત્રો, પત્ની અને સગાઓ માટે ટિકિટની માગ 

હાલ રાજ્યમાં સ્થાનિક સ્વરાજ્યની ચૂંટણીનો માહોલ જોવા મળી રહ્યો છે. ત્યારે રાજ્યમાં કોંગ્રેસ અને ભાજપ દ્વારા ઉમેદવારોના નામની પસંદગીને મડાગાંઠ જોવા મળી રહી છે. 

વડોદરા કોર્પોરેશનની ચૂંટણી લડવા ભાજપમાં રાફડો ફાટ્યો છે. ભાજપમાં વડોદરા કોર્પોરેશનની ચૂંટણીને લઇને MLA દ્વારા પોતાના પરિવારજનો માટે ટિકિટની માંગણીઓ કરવામાં આવી રહી છે. 

ભાજપના MLA દ્વારા પુત્રો, પત્ની અને સગાઓ માટે ટિકિટની માગણી કરવામાં આવી છે. આમ પરિવારવારવાદનો વિરોધ કરતી પાર્ટીમાં પરિજનો માટે લોબિંગ કરાતું જોવા મળી રહ્યું છે. 

ભાજપના નેતા મધુ શ્રીવાસ્તવે પુત્ર, પત્ની અને પુત્ર માટે ટિકિટ માગી હોવાનું સૂત્રો પાસેથી જાણવા મળ્યું છે. જેમાં શ્રીવાસ્તવે પત્ની માટે જિલ્લા પંચાયતની 3 બેઠકો પરથી ટિકિટ માગી છે. જ્યારે પુત્ર દિપક, પુત્રી નીલમ માટે જિલ્લા પંચાયતની ટિકિટ માગી છે. 

જ્યારે ડભોઇના MLA શૈલેષ મહેતાએ પુત્ર ધુમિલ માટે ટિકિટ માગી છે. તો સંખેડાના MLA અભેસિંહ તડવીએ પુત્ર દિવ્યાંગ માટે ટિકિટ માંગી છે. 

જ્યારે ભાજપના મેમ્બર ઓફ પાર્લામેન્ટ રંજન ભટ્ટે બહેનની પન્ના દેશાઇને રિપિટ કરવા ભલામણ કરી છે. આ સાથે પૂર્વ સાંસદ રામસિંહ રાઠવાએ પુત્રી માટે ટિકિટ માંગી છે. તો પૂર્વ મેયર સુનિલ સોલંકીએ પોતાના જમાઇ માટે ટિકિટ માગી છે. 

વડોદરા કોર્પોરેશનની ચૂંટણીમાં જીતની શક્યતાઓ વધુ જણાતા દાવેદારોના રાફડો ફાટેલો જોવા મળ્યો છે. 76 બેઠકો માટે 1451 લોકોએ ટિકિટ માગી છે. મેયર પદ મેળવવા વોર્ડ નં. 15માંથી ST બેઠક પર 27 દાવેદારો સામે આવ્યાં છે. જેમાં રોટેશન પ્રમાણે મેયર માટે ST ઉમેદવાર સુચિત છે.