વડોદરા રેલવે સ્ટેશન પર રહેલા ટ્રેનમાં કોવિડ કોચમાં ધૂળ જામી ગઈ, હાલ શહેરીજનો માગ કરી રહ્યા છે કે આ કોચને ખોલી દેવા જોઈએ
દેશમાં સ્થિતિ બની રહી છે નાજુક
ટ્રેનમાં કોવિડ કોચની વધી માગ
વડોદરામાં ધૂળ ખાતો કોવિડ કોચ
ગુજરાત જ નહીં પરંતુ હવે આખા દેશમાં સ્થિતિ ખૂબ જ ખતરનાક બની રહી છે. મહારાષ્ટ્રમાં તો સ્થિતિ કંટ્રોલ બહાર છે. આ સિવાય દેશના અન્ય રાજ્યોના પણ હાલ બેહાલ છે. જેમાં આપણું ગુજરાત પણ છે. હોસ્પિટલો દર્દીઓથી ઉભરાઈ રહી છે. બેડ ખાલી રહ્યા નથી. સારવાર માટે દવાઓ ખુટવા આવી છે. દર્દીઓ કે પછી મૃતદેહો માટે એમ્બ્યુલન્સની અછત વર્તાઈ રહી છે. ત્યારે કેટલીક જગ્યાએ માગ ઉઠી છે કે રેલવેમાં તૈયાર કરાયેલા આઈસોલેશન વોર્ડ ખોલી દેવામાં આવે છે. અને તેમાં દર્દીઓને સારવાર અપાય.
જ્યારે ચીન અને ઈટલીમાં કોરોના બેકાબૂ બન્યો હતો. ત્યારે ભારત સરકારે સાવધાનીના ભાગ રૂપે રેલવેમાં સ્પેશિયલ કોવિડ કોચ તૈયાર કરાવ્યા હતા. કહેવામાં આવી રહ્યું હતું કે, આ કોચમાં એ તમામ સુવિધા તૈયાર કરાઈ છે જે એક ICUમાં હોય. રેલવે દ્વારા યુદ્ધના ધોરણે અનેક કોચને કોવિડ કોચમાં પરિવર્તન કરવામાં આવ્યા હતા. જોકે એ સમયે દેશમાં આની જરૂર ન પડી.
પહેલી લહેરમાં કેસ ઓછા હોવાના કારણે હોસ્પિટલમાં જ જગ્યા મળી રહી હતી. પરંતુ હાલ ચાલી રહેલી બીજી લહેર ખૂબ જ ઘાતક નીવડી રહી છે. દેશભરમાંથી આ કોવિડ કોચમાં દર્દીઓને સારવાર આપવા માટે માગ ઉઠી રહી છે. કારણ કે હોસ્પિટલો દિનપ્રતિદિન ફુલ થઈ રહી છે. દર્દીઓથી તે ઉભરાઈ રહી છે. ખાનગી કે સરકારી. ક્યાંય બેડ નથી. બધુ જ ફુલ છે.
વડોદરામાં કોરોનાએ વિકરાળ રૂપ લીધું છે. શહેરની હોસ્પિટલો અને કોવિડ કેર સેન્ટરો કોરોના દર્દીઓથી ઉભરાવા લાગ્યા છે. પરંતુ એક વર્ષ પહેલા જે ટ્રેનમાં જે કોવિડ કોચ તૈયાર કરાયા હતા તે હાલ ધૂળ ખાઈ રહ્યા છે. વીટીવીની ટીમે જ્યારે આ કોચની મુલાકાત લીધી. ત્યારે જોવા મળ્યું કે વડોદરા રેલવે સ્ટેશન પર રહેલા આ કોચમાં ધૂળ જામી ગયેલી છે. ત્યારે હાલ શહેરીજનો માગ કરી રહ્યા છે કે આ કોચને શહેરીજનો માટે ખોલી દેવામાં આવે. કારણ કે હોસ્પિટલો તો ફુલ થઈ ગઈ છે.