જેલમાંથી મોબાઈલ પકડાવવાની વાત હવે નવી નથી રહી. સવાલ એમ થાય કે જ્યાં ચકલું ન ફરકી શકે તેવી સિક્યોરીટીની ગુલબાંગો પોકારાતી હોય એવી જેલમાં મોબાઈલ કેમના પહોંચી જતા હશે એટલુ જ નહીં પરંતુ ત્યાંથી તેઓ વાતચીત કરે અને જેલ પ્રશાસનને કંઈ ખબર જ ન પડે એવું બને ખરૂં? જેલમાં જે જામર લગાવ્યા છે તે કામ નથી કરતા કે પછી સ્પેશ્યલ જામર છે જે કેદીઓને નેટવર્ક વાપરવા દે છે?
5 વર્ષમાં 100થી વધુ મોબાઇલ કેદીઓ પાસેથી મળ્યા
જેલમાં જામરનો લાખોનો ખર્ચ ગયો વ્યર્થ
જેલતંત્રના નાક નીચે વપરાય છે મોબાઈલ
વડોદરાની મધ્યસ્થ જેલના હાલ પણ કંઈક આવા જ છે જ્યાં વરસે દહાડે કેટલાય મોબાઈલ પકડાય છે. સુરક્ષાતંત્રના નાક નીચે કેદીઓ આરામથી મોબાઈલ વાપરે છે. હવે મોબાઈલ વાપરતા હોય નેટ વાપરતા હોય તો તેમની કેદ કંઈ કેદ કહેવાય? વળી કેટલાક ગુનેગારો તો જેલમાં બેઠા બેઠા બહારનું તંત્ર ફોન ઉપરથી સંભાળતા હોય છે. ત્યારે પ્રશ્ન થાય કે જેલ દેખાવની છે કે સજા માટે છે?
4G, 3G મોબાઈલ જામર તો નંખાવ્યા પણ નકામા
વડોદરાની જેલમાં જામર તો લગાવવામાં આવે છે પણ જેલમાં જામર માત્ર શોભાના ગાઠિયા હોય તેવુ લાગી રહ્યુ છે. જેલમાં કેદીઓ ખુલ્લેઆમ મોબાઈલ પર વાત કરી રહ્યા છે. છેલ્લા પાંચ વર્ષમાં જેલમાંથી કેદીઓ પાસેથી 100થી વધુ મોબાઈલ મળી આવ્યા છે. જેથી તંત્ર દ્વારા લાખો રૂપિયાના ખર્ચે લગાવવામાં આવેલા જામરનો ખર્ચો પાણીમાં ગયો હોય તેવુ લાગી રહ્યુ છે. 4G, 3G મોબાઈલ જામર તો નંખાવ્યા પણ નકામા છે. કેમ કે, જામરને તો આ લોકો જે નેટવર્ક વાપરે છે તેની ખબર જ નથી હોતી.