હાલ ગુજરાતમાં કોરોના વાયરસ રોજ નવા રેકોર્ડ બ્રેક કેસ લગાવી રહ્યા છે. ત્યારે હાલમાં વડોદરાથી માનવતાને મહેકાવતા સારા સમાચાર સામે આવ્યા છે.
વડોદરામાં BAPS આવ્યું તંત્રની વ્હારે
યજ્ઞપુરુષ સભા સ્થળે ઉભી કરાશે 500 બેડની હોસ્પિટલ
500 બેડની ઓક્સિજન સાથેની કોવિડ કેર થશે શરૂ
વડોદરા શહેરમાં પણ કોરોનાના કેસ કૂદકે ને ભૂસકે વધી રહ્યાં છે. તંત્ર દ્વારા કોરોનાને અંકુશમાં લેવા માટે અથાગ પ્રયાસ કરવામાં આવી રહ્યાં છે..એવામાં કેટલીક સામાજિક સંસ્થાઓ પણ તંત્રની વ્હારે આવી રહી છે. BAPS પણ તંત્રની મદદ માટે આગળ આવ્યું છે. અને દર્દીઓને મુશ્કેલી ન પડે તે માટે યજ્ઞપુરુષ સભા સ્થળે 500 બેડની હોસ્પિટલ ઉભી કરવાનો નિર્ણય લેવામાં આવ્યો છે.
500 બેડ સાથે ઓક્સિજનની પણ સુવિધા ઉપલબ્ધ હશે
માત્ર બે દિવસની અંદર જ આ હોસ્પિટલ ઉભી કરી દેવામાં આવશે. આ હોસ્પિટલમાં 500 બેડ સાથે ઓક્સિજનની પણ સુવિધા ઉપલબ્ધ હશે. સાથે સાથે હોસ્પિટલમાં દાખલ દર્દીઓને કોઇ તકલીફ ન પડે તે માટે જમવા અને રહેવા સહિતની સુવિધાઓ આપશે.
અત્યાર સુધી 57 હોસ્પિટલોમાં 2168 ઇન્જેક્શન ફાળવાયા
વડોદરા રેમડેસિવિર ઇન્જેક્શનની માંગમાં વધારો છે. ત્યારે હવે સરકાર દ્વારા વડોદરાને વધુ 3 હજાર ઈન્જેક્શન ફાળવાયા છે. કાલે સાંજે 37 ખાનગી હોસ્પિટલને 1960 ઇન્જેક્શન અપાયા. પહેલા તબક્કામાં 776, બીજા તબક્કામાં 1184 ઇન્જેક્શન અપાયા છે. આજે વધુ એક હજાર ઈન્જેકશન વડોદરાને મળશે. અત્યાર સુધી 57 હોસ્પિટલોમાં 2168 ઇન્જેક્શન ફાળવાયા.
2 દિવસમાં 3500 બેડની સુવિધા ઉભી કરાશે
વડોદરાના OSD વિનોદ રાવની VTV સાથે ખાસ વાતચીત કરી હતી. જેમાં વિનોદ રાવે જણાવ્યું હતુ કે, રેમડેસિવિરની અછત દૂર કરવા કામ કરી રહ્યાં છે. રેમડેસિવિર માટે કલેક્ટરને નોડલ ઓફિસરની જવાબદારી છે. OSD રાવે જણાવ્યુ હતુ કે, 2 દિવસમાં 3500 બેડની સુવિધા ઉભી કરાશે. વડોદરા શહેર બહાર 1900 બેડની સુવિધા કરી છે. વડોદરા શહેરમાં હજી પણ 2 હજાર બેડ ખાલી છે. સાવલીમાં ખાનગી હોસ્પિટલોમાં 200 બેડની સુવિધા છે. પાયોનિયર હોસ્પિટલમાં ઓક્સિજન ટેંક ઉભી કરાઈ છે. 20 હજાર લીટરની ક્ષમતાવાળી ઓક્સિનજન ટેંક પણ તૈયાર કરાઈ છે.