ન્યાય / વડોદરામાં પાર્કિંગ મુદ્દે બબાલ બાદ મર્ડર કેસમાં ચિકન શૉપના માલિક સહિત પરિવારના 5ને આજીવન કેદની સજા

• વડોદરામાં એક જ પરિવારના 5 સભ્યોને જન્મટીપની સજા
• વડોદરાના તાંદલજામાં જુલાઈ 2018માં બન્યો હતો બનાવ 
• એડિશનલ ડિસ્ટ્રિક્ટ એન્ડ સેશન્સ જજ દ્વારા કરાયો હુકમ 

વડોદરાના તાંદલજામાં વર્ષ 2018માં થયેલા રિક્ષા પાર્ક કરવાના ઝઘડામાં હત્યાના કેસમાં એક જ પરિવારના 5 લોકોને આજીવન કેદની આકરી સજા સંભળાવવામાં આવી છે. સામાન્ય ઝઘડા બાદ સ્થિતિ વણસતા એક શખ્સ પર પરિવારના સભ્યો તૂટી પડ્યા હતા. જેમાં પીડિતને સારવાર માટે હોસ્પિટલમાં લઈ જવાયો ત્યારે ડૉક્ટરો દ્વારા તેને મૃત જાહેર કરવામાં આવ્યો હતો. હત્યા કેસમાં એક જ પરિવારના પાંચને આજીવન કેદની સજા સંભળાવવામાં આવી છે તેમાં એક મહિલાનો પણ સમાવેશ થાય છે.

તાંદલજામાં આમિર કોમ્પલેક્સમાં જુલાઈ 2018 માં બન્યો હતો બનાવ 

આ બનાવની વિગત એવી છે કે, તા. 22/07/2018 ના રોજ રીક્ષા ડ્રાઇવીંગ કરતા યાસીનભાઇ મેમણે  નોંધાવેલી ફરિયાદ અનુસાર તેઓ તાંદલજા વિસ્તારમાં પરિવાર સાથે રહે છે.  એક મહિના પહેલા રીક્ષા ડ્રાઇવીંગ કરતા પુત્ર ઇલ્યાસ  અને કબીર ચીકન શોપ વાળા ફારૂક ભાઇ તથા તેના ભાઇ મુન્નાભાઇ અને ફારૂકના દિકરા ફરહાન સાથે દુકાને આવતા ગ્રાહકોને વાહનો વ્યવસ્થિત પાર્ક કરાવવા બાબતે બોલાચાલી થઇ હતી. 

રીક્ષાના પાર્કિંગ મુદ્દે સામાન્ય બોલાચાલીમાં હત્યા કરાઈ 

દરમિયાન, ઇલ્યાસ અને સલીમભાઇની દિકરી મુસ્કાન તથા અન્ય પરિજનો તરસાલી ખાતે આવેલ સ્વજનના ઘરે ગયા હતા. જ્યાંથી સાંજે 6 વાગ્યે પરત આવ્યા હતા. દરમિયાન આમીર કોમ્પલેક્ષમાં પાર્કિંગ એરીયામાં રીક્ષા મુકવા માટે જગ્યા નહિ હોવાને કારણે કબીર ચીકન શોપ ધરાવનારા ફારૂક, મુન્નાભાઇ તથા ફરહાનને તેમના ગ્રાહકોને વાહનો વ્યવસ્થિત પાર્ક કરાવવા માટે જણાવ્યું હતું. જે મામલે બંને વચ્ચે ઝગડો થયો હતો. અને ઝગડો વધારે ન વધે તે માટે મુસ્કાન અને ફિરોજાબેન ફારૂકને પકડીને ઘરમાં લઇ ગઇ હતી. સાંજે 7 વાગ્યાની આસપાસ ઈલ્યાસ કે જેનો ઝઘડો ફારુક સાથે થયો હતો તે પડીકી ખાવા માટે નીચે આવ્યો હતો, આ દરમિયાન ફારુકે ઈલ્યાસને ચાકુ બતાવીને રસ્તામાં આંતર્યો હતો.

એડિશનલ ડિસ્ટ્રિક્ટ એન્ડ સેશન્સ જજ દ્વારા કરાયો હુકમ

રીક્ષા પાર્કિગવાળા ઝઘડાના લીધે આવેશમાં આવી ગયેલા ફારુકે ઈલ્યાસ સાથે બોલાચાલી કરી હતી અને તણાવ વધતા બૂમાબૂમ થવા લાગી હતી, આ દરમિયાન ફારુકે તેની પાસે રહેલું ચાકુ ઈલ્યાસની છાતીમાં મારી દીધું હતું. આ દરમિયાન ફારુકના દીકરા ફરહાન અને મુન્નાએ ત્યાં આવીને ઈલ્યાસને માર માર્યો હતો. મુન્નાએ ઈલ્યાસના માથામાં ઈંટ મારી દીધી હતી. જ્યારે અન્યએ ઈલ્યાસને મુક્કા માર્યા હતા. ફારુક અને દીકરાઓએ કરેલા હુમલામાં ગંભીર રીતે ઘાયલ થયેલો ઈલ્યાસ રેતીના ઢગલામાં ઢળી પડ્યો હતો. અહીં પણ તેના પર ફારુકના પરિવારના સભ્યોએ ઈલ્યાસ પર હુમલાના પ્રયાસ ચાલુ રાખ્યા હતા. આ પછી ઘટના સ્થળ પર લોકોના ટોળા એકઠા થઈ ગયા હતા અને ઈલ્યાસને હોસ્પિટલમાં લઈ જવામાં આવ્યો હતો. જોકે, ડૉક્ટરોએ તેને મૃત જાહેર કર્યો હતો.