વડોદરાઃ વુડાનું વર્ષ 2019-20નું 314.51 કરોડનું બજેટ પાસ

વડોદરા કોર્પોરેશન બાદ વુડાનું વર્ષ 2019-20નું 314.51 કરોડનું બજેટ વુડાની બોર્ડ બેઠકમાં સર્વાનુમતે મંજુર કરાયું છે. વુડાના બજેટમાં વડોદરા ફરતે 75 મીટરનો રીંગરોડ બનાવવાની મોટી જાહેરાત કરવામાં આવી છે. 

જેથી શહેરમાં ટ્રાફીકની સમસ્યાનો હલ કરવામાં આવશે. જેમાં વુડા વિસ્તારમાં પાણી ડ્રેનેજ સોલિડ વેસ્ટ એસટીપી નવીન રોડ આવાસો સહિતના કામો પર વધુ ભાર મુકાયુ છે. 

વુડાના ચેરમેન અજય ભાદુએ બજેટ પર માહિતી આપતા કહ્યું કે પ્રથમવાર વડોદરા ફરતે 65 કિલોમીટર લાંબો 75 મીટર રીંગરોડ બનાવાશે. જેમાં ચાલુ વર્ષે માત્ર ડીપીઆર તૈયાર કરવામાં આવશે. 

આ સાથે જ ડ્રાફટ ટીપી બનાવી જમીન કબજે કરવામાં આવશે ત્યારબાદ રીંગરોડનું કામકાજ શરૂ કરવામાં આવશે. રીંગરોડ બનવાથી વડોદરામાં ટ્રાફીકની સમસ્યાનું નિરાકરણ આવશે. 

બજેટમાં બીજી મોટી જાહેરાત છે કે વુડા વિસ્તારમાં કન્વેનશન સેન્ટર બનાવવામાં આવશે આ સાથે જ ખુલ્લો વિશાળ મેદાન બનાવાશે જેમાં મોટા મોટા જાહેર કાર્યક્રમો શહેરીજનો કરી શકશે. 

આ ઉપરાંત વુડા વિસ્તારમાં બે નવી ટીપી સ્કીમો 24-એ અને 24-બી બહાર પાડવામાં આવી છે. જેના માટે બ્લુ પ્રિન્ટ તૈયાર કરી જમીન કબજે લેવાની કાર્યવાહી કરવામાં આવશે. 

આ ઉપરાંત પૂર્વના 11 ગામોની 53 સોસાયટીઓમાં સિંધરોટથી મહીસાગર નદીનું પીવાનું પાણી આપવામાં આવશે. વુડાની બેઠકમાં જિલ્લા પંચાયત પ્રમુખ DDO કોર્પોરેશનના સ્થાયી સમિતી ચેરમેન સહિતના હોદ્દેદારો અને અધિકારીઓ હાજર રહ્યાં હતાં.