દુર્ઘટના / પતંગ ચગાવવામાં મશગૂલ વડોદરાના યુવકનું 7માં માળેથી પટકાતા મોત, ભરૂચ અને અંકલેશ્વરમાં પણ બે બાળકો પટકાયા

• ઉત્તરાયણનો પર્વ શોકમાં ગરકાવ થયો
• વડોદરામાં પતંગ ચગાવતા યુવક સાતમાં માળેથી પટકાતા મોત
• મક્તમપુર રોડ પર બાઈક ચાલકને ઈજા પહોંચી હતી

ભરૂચમાં ઉત્તરાયણ પર્વની ઉજવણી દરમિયાન અકસ્માત સર્જાયો છે. નારાયણનગરમાં 10 વર્ષીય બાળકી ધાબા પરથી પટકાઈ હતી. અંકલેશ્વરમાં 10 વર્ષનો બાળક ધાબા પરથી પટકાયો હતો. બીજી તરફ વડોદરામાં પતંગ ચગાવતા યુવક સાતમાં માળેથી પટકાતા મોતને ભેટ્યો. મક્તમપુર રોડ પર બાઈક ચાલકને ઈજા પહોંચી હતી. દોરીથી યુવકનું ગળુ કપાતા સારવાર અર્થે ખસેડાયો હતો. ઝઘડિયાના નાના સાંજા ગામમાં યુવતીને કરંટ લાગ્યો છે. ડી.જે. સ્પીકર ચાલુ કરવા જતાં યુવકીને કરંટ લાગ્યો છે. 

વડોદરામાં સાતમાં માળેથી નીચે પટકાતા યુવકનું મોત

વડોદરાના ખોડીયાર નગર સયાજીપુરા પાણીની ટાંકી પાસે મુખ્યમંત્રી આવાસ આવેલા છે. મુખ્યમંત્રી આવાસના બસંધીર હાઇટ્સમાં રહેતા કરણ રાઠોડ પતંગ ચગાવી રહ્યો હતો. આ દરમિયાન એકાએક નીચે પટકાતા માથામાં ગંભીર ઇજા પહોંચી હતી. જેને તાત્કાલિક હોસ્પિટલ ખસેડાયો હતો. જોકે, તબીબોએ સારવાર આપતા પહેલાં જ તેને મૃત જાહેર કર્યો હતો. આ બનાવ બનતા જ પરિવારમાં ગમગીની ફેલાઇ ગઇ હતી અને ઉત્તરાયણનો પર્વ શોકમાં ગરકાવ થઇ ગયો હતો.

સુરતમાં બાળકનું પતંગની દોરીથી ગળુ કપાયુ

સુરતમાં પતંગની દોરીથી બાળક ઇજાગ્રસ્ત થયાની ઘટના બની છે. બાળકને પતંગની દોરી ગળામાં વાગી જતાં તાબડતોબ હોસ્પિટલ લઇ જવાયો હતો.બાઇક પર મંદિરે દર્શન કરવા જઇ રહેલા પરિવાર સાથે પતંગની દોરીના કારણે દુર્ધટના ઘટી હતી. દુર્ઘટના ઘટતાં પોલીસ હેડ કવાટર્સના કોન્સ્ટેબલ પરિવારની મદદે આવ્યા હતા અને તાત્કાલિક બાળકને સારવાર અર્થે હોસ્પિટલ પહોંચાડ્યો હતો.