અમરેલીઃ સ્વચ્છ ભારત અભિયાન અંતર્ગત યોજાતા અનેક કાર્યક્રમો યોજાતા રહે છે. જેમાં મોટાભાગના કાર્યક્રમો જાણે કે ફોટોસેશન માટે જ ગોઠવાતા હોય તેવા દ્રશ્યો પણ જોવા મળે છે. પરંતુ આજે અમે આપને એક એવું ગામ બતાવવા જઈ રહ્યા છીએ. ત્યાં આખું ગામ છેલ્લા પંદર દિવસથી પોતાના ગામને સ્વચ્છ બનાવવા મહેનત કરી રહ્યા છે. નવાઈની વાત તો એ છે કે આ સ્વચ્છતા અભિયાનમાં ગામના પુરુષો કરતા મહિલાઓ વધુ જોડાઈ છે.
દરરોજ સવારે ૨ કલાક સફાઇ...
અમરેલીથી માત્ર ૧૨ કીલોમીટરના અંતરે આવેલું વડેરા ગામ વધુ એકવાર અનોખું કાર્ય કરવા જઇ રહ્યું છે. આ ગામના મહિલા સરપંચની આગેવાનીમાં છેલ્લા પંદર દિવસથી જબરદસ્ત સફાઈ અભિયાન ચાલી રહ્યું છે. જેમાં ગામની મહિલાઓ પુરુષો અને હાઇસ્કુલના વિદ્યાર્થીઓ પણ જોડાય છે. દરરોજ સવારે ૨ કલાક આ મહિલાઓ સમગ્ર ગામને ચોખું ચણાક બનાવવા માટે હાથમાં સાવરણા લઈને નીકળી પડે છે. તો બીજી તરફ ગામના પુરુષો દ્વારા ગામની આસપાસ અને ગામની અંદર રહેલા ગાંડા બાવળો દુર કરવામાં આવે છે.
એક લાખથી વધુનો લોકફાળો...
વડેરા ગામની ગણના અમરેલી જીલ્લાના પ્રગતિશીલ ગામોમાં થાય છે. ત્યારે અવારનવાર આ પ્રકારના કર્યો ગ્રામજનો દ્વારા કરવામાં આવી રહ્યા છે. આ સફાઈ અભિયાન માટે વડેરા ગામના લોકો દ્વારા શ્રમદાનની સાથે સાથે ધન દાન પણ આપ્યું છે. વડેરા ગામની આસપાસ આવેલા તળાવ અને ચેકડેમમાં ઉગી નીકળેલા ગાંડા બાવળ અને નડતર રૂપ થતા બીજા જાડી જાખરા હટાવવા માટે ગ્રામજનો દ્વારા લગભગ એક લાખથી વધુનો લોકફાળો એકઠો કરવામાં આવ્યો. સામે તેટલી જ રકમ ગ્રામ પંચાયતના સ્વભંડોળમાંથી ઉમેરવામાં આવી અને આ સ્વચ્છતા અભિયાન ઉપાડવામાં આવ્યું છે. આ અભિયાનમાં જોડવા માટે મૂળ વડેરા ગામના અને હાલ સુરત સ્થિત ઉદ્યોગપતિ પણ ખાસ પોતાના વતન આવ્યા છે જેઓ પણ હોશે હોશે સફાઈ કરતા નજરે પડ્યા.
વડેરા ગામમાં તમામ પ્રાથમિક સુવિધાઓ છે જેમાં ફ્રી વાયફાય...
છેલ્લા કેટલાક સમયથી વકરી રહેલો રોગચાળો વડેરા ગામમાં ન પ્રવેશે તેની તકેદારીના ભાગરૂપે અને ગામ રળીયામણું બની રહે તેવા ઉદ્દેશ સાથે આરંભવામાં આવેલ આ સ્વચ્છતા અભિયાન આગામી પંદર દિવસ સુધી ચલાવવામાં આવશે. ગામને જીલ્લાનું સૌ પ્રથમ સંપૂર્ણ સ્વચ્છ ગામ બનાવીને જ જંપીશું તેઓ સુર ગ્રામજનો માંથી સાંભળવા મળી રહ્યો છે. અત્રે ઉલ્લેખનીય છે કે વડેરા ગામમાં તમામ પ્રાથમિક સુવિધાઓ છે જેમાં ફ્રી વાયફાયનો પણ સમાવેશ થાય છે.