વેક્સિન / તો દેશના આ રાજ્યમાં ડિસેમ્બર અંત પહેલાં જ રસીકરણ શરૂ થઈ જશે, અધિકારીઓ-કર્મચારીઓની રજાઓ રદ્દ

• ઉત્તર પ્રદેશમાં રસીકરણ કાર્યક્રમમાટેની તૈયારીઓ પૂર્ણ 
• સરકારી કર્મચારીઓની રજાઓને રદ્દ કરવામાં આવી 
• વેકસિન મળી જાય તો ડિસેમ્બરથી જ થઈ શકે છે રસીકરણ

રાજ્યના કુટુંબ કલ્યાણ વિભાગ દ્વારા બુધવારે જાહેર કરાયેલા એક આદેશમાં કહેવામાં આવ્યું છે કે, "કોરોના અટકાવવાના પ્રયત્નો કરવામાં આવી રહ્યા છે, ડિસેમ્બર અને જાન્યુઆરીમાં કોરોના વાયરસની રસી આવવાનો પ્રસ્તાવ છે, જેમાં તમામ અધિકારીઓ અને કર્મચારીઓના સહયોગની જરૂર છે. તેથી, તે નક્કી કરવામાં આવ્યું છે કે બધી રજાઓ રદ્દ કરવામાં આવે.

વેક્સિન સ્ટોરેજની તૈયારી પૂર્ણ 

યુપી, બિહાર, રાજસ્થાન સહિત વિવિધ રાજ્યોની સરકાર કોરોના રસી અને રસીકરણ અંગે તેમના સ્તરે તૈયારીઓ કરી રહી છે. જેમાં કોલ્ડ ચેન, સ્ટોરેજ પોઇન્ટની વ્યવસ્થા કરવામાં આવી રહી છે. યુપીમાં પણ, રસીકરણ અંગેની બેઠકમાં, મુખ્ય સચિવે બે દિવસમાં તમામ જિલ્લાઓમાં રસીકરણ સંગ્રહ અને રસીકરણ માટે સલામતી જળવાય તે માટે એક પ્લાન આપવા જણાવ્યું છે. યુપી સરકાર તમામ 75 જિલ્લાઓમાં કોરોના રસીનો સંગ્રહ કરવાની તૈયારી કરી રહી છે.

મહત્વનું છે કે તાજેતરમાં યુપીના મુખ્ય પ્રધાન યોગી આદિત્યનાથે કહ્યું હતું કે પલ્સ પોલિયો રસી માટે બનાવેલી કોલ્ડ ચેઇનની તર્જ પર કોરોન રસી માટે કોલ્ડ ચેઇન તૈયાર કરવી જોઈએ. અધિક મુખ્ય સચિવ (આરોગ્ય) એ જણાવ્યું હતું કે રાજ્યમાં હાલમાં કોલ્ડ સ્ટોરેજની ક્ષમતા 90 હજાર લિટર છે, જેને હવે વધારીને 2 લાખ 30 હજાર લિટર કરવાની જરૂર છે. જેને 15 ડિસેમ્બર સુધીમાં પૂર્ણ કરવાનો પ્રયાસ કરવામાં આવી રહ્યો છે.

ભારતમાં શું છે વેક્સિનની સ્થિતિ

કેન્દ્રીય આરોગ્ય પ્રધાનના જણાવ્યા અનુસાર ભારતમાં કુલ 8 અલગ અલગ રીતના કોરોના વેક્સિન ના પ્રોજેક્ટસ પર કામ ચાલી રહ્યું છે જેમાં ત્રણ વેક્સિન સ્વદેશી છે, જો કે મંજૂરીની રેસમાં હાલમાં ત્રણ વેક્સિન કેન્ડીડેટની અરજી DCGI ને મળી ચૂકી છે, તેમાં સીરમની કોવિશિલ્ડ, ફાઈજરની કોરોના વેક્સિન અને ભારત બાયોટેકની કોવાકસીન સામેલ છે.