રસીકરણ / સોફ્ટવેર આધારિત વેક્સિનેશનઃ સિનિયર સિટીઝનનો વારો માર્ચમાં

• કુલ ૨૦૫૮ હેલ્થ વર્કર્સ કોરોનાની વેક્સિન લઈ તેનાથી સુરક્ષિત બન્યા
• વેક્સિન માટે ૩૪૫ સાઇટ તૈયાર કરી હોવા છતાં તેને ઉપયોગમાં લઈ શકાતી નથી
• તંત્રના રેકોર્ડમાં ૨૦૦૦ લાભાર્થીના લક્ષ્યાંકના બદલે શનિવારે ૧૧૧૫ લાભાર્થીને વેક્સિન અપાઈ

ગત શનિવારથી મ્યુનિ. કોર્પોરેશનના સત્તાવાળાઓ દ્વારા શહેરમાં કોરોના વેક્સિનેશન શરૂ કરાયું છે. મુખ્યપ્રધાન વિજય રૂપાણી અને નાયબ મુખ્યપ્રધાન નીતિન પટેલ દ્વારા સિવિલ હોસ્પિટલ ખાતે વેક્સિનેશનનો પ્રારંભ કરાવાયો હતો. સિવિલમાં ડો. કેતન દેસાઈ અને ડો. નવીન ઠાકરે વેક્સિનનો પહેલો ડોઝ મુકાવ્યા બાદ મ્યુનિ. હેલ્થ વિભાગના અનેક મોટા ડોક્ટરોએ વેક્સિન મુકાવતાં લોકોમાં વેક્સિન પ્રત્યેનો વિશ્વાસ વધ્યો છે. 

અમદાવાદમાં વેક્સિનની આડઅસરની કોઈ ગંભીર ઘટના પ્રકાશમાં આવી નથી

હજુ સુધી અમદાવાદમાં વેક્સિનની આડઅસરની કોઈ ગંભીર ઘટના પ્રકાશમાં આવી નથી. હાલમાં કોરોનાના દર્દીની સારવાર સાથે સંકળાયેલા ડોક્ટર, પેરામેડિકલ સ્ટાફ એટલે કે હેલ્થ વર્કર્સને વેક્સિનેશનના પૂર્વનિર્ધારિત કાર્યક્રમ મુજબના ફર્સ્ટ ફેઝ હેઠળ વેક્સિન અપાઈ રહી છે. શહેરમાં વેક્સિનેશનનો આજે ત્રીજો દિવસ છે એટલે સ્વાભાવિકપણે સિનિયર સિટીઝનમાં તેમને વેક્સિન ક્યારે મુકાશે તેવી ઉત્સુકતા જોવા મળી રહી છે, જોકે સમગ્ર કોરોના વેક્સિનેશનનો કાર્યક્રમ તેમના સોફ્ટવેર આધારિત હોઈ સિનિયર સિટીઝનનો વારો માર્ચના પહેલા અઠવાડિયામાં આવે તેમ જાણવા મળ્યું છે.

તંત્રના રેકોર્ડમાં ૨૦૦૦ લાભાર્થીના લક્ષ્યાંકના બદલે શનિવારે ૧૧૧૫ લાભાર્થીને વેક્સિન અપાઈ

શનિવારના કોરોના વેક્સિનેશનના પહેલા દિવસે શહેરની ૨૦ સાઇટ પર હેલ્થ વર્કર્સને વેક્સિન મુકાઈ હતી. પ્રત્યેક સાઇટ પર ૧૦૦ લાભાર્થીને વેક્સિન આપવી તેવા લક્ષ્યાંક સાથે સોફ્ટવેર આધારિત જે તે લાભાર્થીને વેક્સિન લેવા માટે મોબાઇલ દ્વારા મેસેજ મોકલાવાયા હતા, પરંતુ તંત્રના રેકોર્ડમાં ૨૦૦૦ લાભાર્થીના લક્ષ્યાંકના બદલે શનિવારે ૧૧૧૫ લાભાર્થીને વેક્સિન અપાઈ હતી, જ્યારે રવિવાર અને સોમવારે સોફ્ટવેરમાં ખામી સર્જાતાં વેક્સિનેશન બંધ રહ્યું હતું. 

કુલ ૨૦૫૮ હેલ્થ વર્કર્સ કોરોનાની વેક્સિન લઈ તેનાથી સુરક્ષિત બન્યા

ગયા મંગળવારથી અઠવાડિયામાં ત્રણ દિવસ વેક્સિનેશન શરૂ કરાયું છે, પરંતુ મંગળવારે પણ તંત્રનો ૨૦૦૦ લાભાર્થીનો લક્ષ્યાંક અધૂરો જ રહ્યો હતો. મંગળવારે તો શનિવારના લાભાર્થી કરતાં પણ ઓછા એટલે કે ૯૪૩ લાભાર્થી તંત્રના ચોપડે નોંધાયા હતા એટલે કે અત્યાર સુધીમાં કુલ ૨૦૫૮ હેલ્થ વર્કર્સ કોરોનાની વેક્સિન લઈ તેનાથી સુરક્ષિત બન્યા છે, જોકે શહેરમાં કુલ ૫૫,૮૧૫ હેલ્થ વર્કર્સ નોંધાયા છે.

વેક્સિન માટે ૩૪૫ સાઇટ તૈયાર કરી હોવા છતાં તેને ઉપયોગમાં લઈ શકાતી નથી

ફર્સ્ટ ફેઝના હેલ્થ વર્કર્સના વેક્સિનેશનમાં ઝડપ આવી નથી તેનું એક કારણ કેટલાક હેલ્થ વર્કર્સ તેમના નામના મોબાઇલ મેસેજ મેળવ્યા બાદ પણ વેક્સિનની આડઅસર થવાની બીકથી સાઇટ પર જતા નથી. ઉપરાંત મ્યુનિ. તંત્ર પાસે કોરોના વેક્સિનના ૫૫ હજાર ડોઝ હોવા છતાં કેન્દ્ર સરકારનું કોવિન સોફ્ટવેર હાલમાં ૨૦થી વધુ સાઇટ લેતું નથી. પરિણામે મ્યુનિ. સત્તાવાળાઓએ વેક્સિન માટે ૩૪૫ સાઇટ તૈયાર કરી હોવા છતાં તેને ઉપયોગમાં લઈ શકાતી નથી તે પણ  વેક્સિનેશનની ધીમી ઝડપ માટેનું બીજું કારણ છે. હેલ્થ વર્કર્સ બાદ સેકન્ડ ફેઝમાં પોલીસ, હોમગાર્ડ્સ સહિતના ૩૭,૫૧૮ ફ્રન્ટલાઇન વોરિયર્સનું વેક્સિનેશન કરાશે અને થર્ડ ફેઝમાં શહેરના ૭,૩૦,૧૧૬ સિનિયર સિટીઝનનો વેક્સિન લેવાનો વારો આવશે.

જોકે હેલ્થ વર્કર્સ માટેનો નિર્ધારિત રોજના ૨૦૦૦ લાભાર્થીનો લક્ષ્યાંક આજે પણ પૂરો થશે કે કેમ તે મોટો પ્રશ્ન છે એટલે હજુ હેલ્થ વર્કર્સમાં વેક્સિનેશન પાછળ હાલની ઝડપને જોતાં બે-ત્રણ અઠવાડિયાં લાગશે. ત્યાર બાદ ફ્રન્ટલાઇન વોરિયર્સ માટે બીજા ૧૫ દિવસ લાગશે, જેના કારણે સિનિયર સિટીઝનોએ વેક્સિનેશન માટે ઓછામાં ઓછા સવા મહિના માટે તો રાહ જોવી પડશે.

સોફ્ટવેર વધુ ને વધુ સેન્ટરને સ્વીકારે અને કેન્દ્ર સરકાર દ્વારા નવા ૧૦ લાખ વેક્સિનના ડોઝ અપાય

બીજી તરફ હેલ્થ વિભાગનાં સૂત્રોનો એવો દાવો છે કે જો સોફ્ટવેર વધુ ને વધુ સેન્ટરને સ્વીકારે અને કેન્દ્ર સરકાર દ્વારા નવા ૧૦ લાખ વેક્સિનના ડોઝ અપાય તો વેક્સિનેશનની કામગીરીનું અત્યારનું ચિત્ર રાતોરાત બદલાઈ પણ શકે છે, જોકે કોરોના વેક્સિનની કામગીરી આવા 'જો' અને 'તો'ના હિસાબથી આગળ વધે તો સિનિયર સિટીઝન પછી ૨૨,૯૦૫ કોમોર્બિડ વ્યક્તિ પણ ઝડપથી વેક્સિન મેળવી કોરોનામુક્ત બની શકે છે પણ વચ્ચે તોંતેર મણનો 'તો' આવે છે.