ગુજરાતમાં ઉત્તરાયણનાં પર્વની ધામધુમથી ઉજવણી કરવામાં આવે છે. ઉત્તરાયણનાં પર્વને હવે ગણતરીનાં કલાકો જ બાકી રહ્યાં છે. ત્યારે હવે બજારોમાં ભીડ જોવાં મળી રહી છે. ઉત્તરાયણ પર્વને ગણતરીનાં જ કલાકો બાકી રહેતાં પતંગરસિકોમાં ઉત્તરાયણનાં પર્વને લઇને અનેરો ઉત્સાહ જોવાં મળી રહ્યો છે.રાજ્યનાં મહેસાણામાં પણ બજારોમાં વિવિધ પ્રકારનાં અવનવી ડિઝાઇનવાળાં પતંગો તેમજ વિવિધ માંઝાએ ખૂબ આકર્ષણ જમાવ્યું છે.
પતંગ અને દોરી ખરીદવાં માટે લોકો ઉત્સુક જોવાં મળી રહ્યાં છે તેમજ રંગબેરંગી માંઝો પીવડાવવા માટે પણ પતંગરસિકોની ખૂબ લાંબી લાઇનો લાગેલી જોવાં મળી રહી છે. ત્યારે મહત્વનું છે કે આ વર્ષે પતંગમાં 20 ટકા અને દોરીનાં ભાવમાં પણ 10 ટકાનો વધારો થયો છે. ભાવ વધારો થયાં બાદ પણ મોટી સંખ્યામાં લોકો ખરીદી કરવા માટે બજારમાં પહોંચ્યાં છે.
બજારમાં પતંગનાં ભાવ 10 રૂપિયાથી લઈને 80 રૂપિયા અને દોરીનાં ભાવ 50 રૂપિયાથી લઈને 550 સુધી છે. શહેરનાં બજારોમાં રાજકીય પતંગો બાળકો માટે કાર્ટૂન વાળી પતંગોએ ખૂબ ધૂમ મચાવી છે. બજારોમાં નરેન્દ્ર મોદી રાહુલ ગાંધી સ્ટેસ્યૂ ઓફ યુનિટીનાં પતંગોનું ખૂબ મોટા પ્રમાણમાં વેચાણ થઈ રહ્યું છે. આ સાથે જ બાળકો છોટા ભીમ જેઠાલાલ તારક મહેતા મોટું-પતલુ એન્ગ્રીબર્ડ સહિતની પતંગો ખરીદી રહ્યાં છે.
આ વર્ષે કાચા મટીરીયલ તેમજ કંપનીનાં કોટન દોરામાં ભાવ વધતાં પતંગનાં વેપારીઓ દ્વારા 10 ટકા જેટલો ભાવ વધારો કરાયો છે. જે મામલે પતંગ-દોરાનાં વેપારીએ જણાવ્યું કે ગત વર્ષ કરતાં દોરી પતંગની કિમતોમાં અંદાજે 10 ટકાનો વધારો નોંધાયો છે. પતંગોમાં 300થી 400 સુધીમાં 100 જેટલાં નંગો ઉપલબ્ધ છે. ત્યારે જરૂરી છે કે પંતગની સાઇઝ મુજબ ભાવ અલગ-અલગ હોઇ શકે છે.