દેશભરમાં આજે ધૂમધામથી કોરોના મહામારીની વચ્ચે ગાઈડલાઇનનાપાલન સાથે મકર સંક્રાંતિનું પવન પર્વ ઉજવાઈ રહ્યુ છે, ત્યારે ઉત્સવપ્રેમી ગુજરાતની જનતાએ પણ આ પર્વને વધાવી લીધું હતું. રાજકોટ, વડોદરા, અમદાવાદ, સુરત સહિતના શહેરોમાં જનતાએ અલગ અલગ રીતે આ પર્વની ઉજવણી કરી હતી.
કોરોના મહામારી પણ આ ઉત્સાહને ન હરાવી શકી
રાજ્યના સિનિયર સિટીઝનના જુસ્સાને સલામ
સેલેબ્સ સહિત સામાન્ય જનતા પર્વની ઉજવણીમાં મશગૂલ
અમુક જગ્યાએ લોકોએ ઊંધિયું લેવા માટે ઘસારો કર્યો હતો તો બીજી બાજુ ગુજરાતના જાણીતા કલાકારોએ પણ અલગ અલગ શહેરોમાં ઉત્તરાયણની મોજ માણી હતી.
જાણીતા કલાકારોએ પણ ઉજવ્યું સંક્રાંતિનું પર્વ
લોકગાયિકા ગીતા રબારીએ આજે પરિવારની સાથે ગાર્ડનમાં પતંગ ચગાવીને મકરસંક્રાંતિની ઉજવણી કરી હતી. જો કે આ દરમિયાન પણ સામાજિક અંતરના નિયમોનું પાલન કરીને આ પર્વની ઉજવણી કરી હતી.
સુરત અને વડોદરા જેવા શહેરોમાં લોકોએ ઊંધિયું ખાવા માટે ઘણી જગ્યાએ દુકાનોમાં ધસારો પણ કર્યો હતો, જો કે તેની સાથે જ સુરતના લોકોએ આજે આર્મી ડેની થીમ પર ઉત્તરાયણની ઉજવણી કરી હતી અને ગીતોનાં તાલે ડાન્સ પણ કર્યો હતો. તો વડોદરાની ઉત્સવપ્રિય પ્રજાએ આ વખતે કોરોના ગાઈડલાઇનના નિયમ મુજબ ડીજે વગર જ તહેવારને ઉજવ્યો હતો. આ વખતે ડીજેની જગ્યાએ ઢોલ નગારા સાથે ઉત્તરાયણને આવકાર્યું હતું.
આ સિવાય હાસ્ય કલાકાર સાઈરામ દવે એ પણ ઉત્તરાયણ નિમિત્તે પરિવાર સાથે પતંગ ચગાવીને પર્વની મજા માણી હતી, લોકગાયિકા કિરણ ગજેરાએ પોતાની ટીમ સાથે સુરતમાં ઉજવણી કરી હતી, અરવિંદ વેગડા અને અવનિ મોદી જેવા કલાકારોએ પણ ખૂબ જ ઉત્સાહ ભેર ઉત્તરાયણ પર્વની ઉજવણી કરી હતી.
અમદાવાદની પોળમાં વૃદ્ધ વડીલોએ પતંગ ચગાવી તો પોલીસે તેની જવાબદારી નિભાવી
અમદાવાદની પોળ જેના માટે વખણાય છે તે ઉત્સવપ્રિયતાનો રંગ સિનિયર સિટિઝનમાં પણ જોવા મળયો હતો, દેસાઈની પોળમાં 72 વર્ષના કુસુમ બહેને, અને 64 વર્ષના વંદના બહેને પણ ખૂબ જ ઉત્સાહ અને ઉમંગ સાથે ઉત્તરાયણને ઉજવી હતી. આ પ્રંસગે આ લોકોએ કહ્યું હતું કે કોરોનાની મહામારી પણ અમારો ઉત્સાહ નહીં ઘટાડી શકે, મહત્વનું છે કે આ વિસ્તારમાં 10 દિવસ પૂર્વે જ ઉત્તરાયણની તૈયારીઓ થતી હોય છે.
જો કે આ બધાની સાથે જ આજે અમદાવાદની પોલીસ પણ ચુસ્ત પણે તેની કામગીરીમાં જોડાયેલી હોય તેવું જોવા મળ્યું હતું, નોંધનીય છે કે આ વખતે અમુક નિયમોની સાથે ઉત્તરાયણના તહેવારની મંજૂરી આપવામાં આવી છે, માટે અમદાવાદ પોલીસ દ્વારા આ નિયમોના પાલન માટે અને કોઈ પણ અનિચ્છનીય ઘટના ન બને તે માટે પોળના વિસ્તારમાં સર્ચ ઓપરેશન હાથ ધર્યું હતું અને ધાબા ઉપર ચેકીંગ પોઇન્ટ પણ બનાવ્યા હતા. ખાસ તો ડ્રોનના માધ્યમથી લોકો ઉપર નજર રખાઈ રહી છે.