શિયાળો / ઉત્તરાખંડમાં બરફ વર્ષાએ રપ વર્ષનો રેકોર્ડ તોડ્યોઃ દિલ્હીમાં આજે સવારે ૭ ડિગ્રી ઠંડી

• ઉતરાખંડમાં જબરદસ્ત હિમવર્ષા
• છેલ્લા ૨૫ વર્ષનો રેકોર્ડ તોડ્યો
• સ્થાનિક લોકોની મુશ્કેલીઓ વધી

ઉત્તરાખંડમાં આ વખતે જબરદસ્ત બરફ વર્ષા થઇ રહી છે. આ વખતની બરફ વર્ષાએ છેલ્લા રપ વર્ષનો રેકોર્ડ તોડી નાખ્યો છે. મોસમ વિભાગના જણાવ્યા મુજબ છેલ્લા કેટલાંય વર્ષોની તુલનામાં આ વર્ષે સૌથી વધુ બરફ વર્ષા જોવા મળી છે. કુમાઉથી લઇને ગઢવાલ સુધીના ઊંચાઇવાળા વિસ્તારોમાં બરફની સફેદ ચાદરની સાથે સાથે નીચાણવાળા વિસ્તારોમાં પણ બરફ વર્ષા થઇ છે. પહાડોમાં બરફ વર્ષા અને મેદાનોમાં વરસાદ પડવાથી ઉત્તરાખંડમાં સખત ઠંડી પડી રહી છે.

આ વર્ષે જે બરફ વર્ષા થઇ તેણે છેલ્લા અનેક વર્ષોનો રેકોર્ડ તોડી નાખ્યો છે. આ પ્રકારનો હિમ પ્રપાત ઘણા લાંબા સમય બાદ જોવા મળ્યો છે. મોસમ વિભાગના ડિરેકટર વિક્રમસિંહનું કહેવું છે કે આ વખતે બરફ વર્ષાથી સારી ખેતી થશે.જોકે અત્યારે મેદાનમાં ધુમ્મસની સાથે આવેલી ઠંડી લોકોને ધ્રુજાવી રહી છે. ૬થી૮ જાન્યુઆરી સુધી ઓછી ઊંચાઇવાળા વિસ્તારોમાં પણ બરફ વર્ષા થઇ છે. ટિહરી, ઉત્તર કાશી, ચકરાતા, જોશીમઠ કે અંદરના જિલ્લાઓમાં પણ ભારે બરફ વર્ષા થઇ છે. મુક્તેશ્વરમાં સારી એવી બરફ વર્ષા જોવા મળી છે.

ભારે વરસાદના કારણે સ્થાનિક લોકોની મુશ્કેલીઓ વધી છે. કેટલીયે જગ્યાએ પાણી જામી ગયું છે. તો કયાંક વીજળી પણ ગુલ થઇ છે.દિલ્હી, યુપી, બિહાર સહિત ઉત્તર ભારતના કેટલાક ભાગમાં આ અઠવાડિયે થયેલા વરસાદ બાદ ઠંડી ઘણી વધી ગઇ છે. પંજાબ, હરિયાણા અને દિલ્હી સહિત ઉત્તર ભારતના અન્ય મેદાની વિસ્તારોમાં ગઇ કાલે તાપમાનમાં ઘટાડાની સાથે ઠંડીએ ફરી એક વાર જોર પકડયું છે. 

મોસમ વિભાગે પંજાબ, હરિયાણા, દિલ્હી અને ઉત્તર પ્રદેશ તથા રાજસ્થાનના પશ્ચિમ અને પૂર્વ વિસ્તારમાં કેટલાક સ્થાનો પર શીતલહેરની ચેતવણી જારી કરી છે. આજે દિલ્હીનું ન્યૂનતમ તાપમાન ૭ ડિગ્રી સેલ્શિયસ નોંધાયું હતું.