ઉત્તર પ્રદેશમાં ખાનગી શાળાઓની મુશ્કેલીમાં વધારો થયો છે. હવેથી ખાનગી શાળાઓ પણ RTI નાં દાયરામાં આવશે અને તમામ માહિતી આપવી પડશે.
રાજ્યના માહિતી અધિકાર ખાતાનો મોટો નિર્ણય
RTI કરીને મેળવી શકાશે અનિવાર્ય જાણકારી
સ્કૂલની ફી, સંચાલન ખર્ચ અને તમામ ખર્ચની જાણકારી મળી શકશે
ખાનગી શાળાઓ વિદ્યાર્થીઓ પાસેથી જાતજાતની ફીના નામે ઢગલો નાણાં ખંખેરતી હોવાની ફરિયાદ વાલીઓ કરતાં રહે છે. ઉત્તર પ્રદેશમાં ખાનગી શાળાઓને લઈ મોટા સમાચાર આવ્યા છે. હવેથી ઉત્તર પ્રદેશમાં શાળાઓ પાસેથી ખર્ચ સહિત તમામ માહિતી મેળવી શકશે.
રાજ્યના માહિતી ખાતાએ આપી જાણકારી
સંજય શર્મા નામના શખ્સે લખનૌની બે જાણીતી શાળાઓ સામે અપીલ કરી હતી. ત્યાર બાડ રાજ્યના માહિતી ખાતાએ આ બંને સ્કૂલોને આદેશ આપ્યો હતો કે તેઓ માહિતી અધિકારીઓની નિમણૂક કરે. કારણકે માહિતી અધિકાર અધિનિયમ 2005 અનુસાર લોકોને આ પ્રકારની માહિતી મેળવવાનો હક છે.
આ અગાઉ ખાનગી શાળાઓ એમ કહીને ગલ્લાં તલ્લાં કરતી હતી કે રાજ્ય સરકાર તરફથી એમને કોઈ ફંડ નથી મળી રહ્યું માટે આ માહિતી માહિતી અધિકાર અધિનિયમ હેઠળ નથી આવતી.
સુપ્રીમે શું કહ્યું હતું?
આ મામલે સુપ્રીમ કોર્ટે ચુકાદો આપ્યો હતો કે જો કોઈ શહેરી વિકાસ બોર્ડ દ્વારા કોઈ સ્કૂલને ઓછા ભાવે જમીન આપવામાં આવી હશે તો આ સ્કૂલને પણ ગ્રાન્ટેડ સ્કૂલ ગણવામાં આવશે.
ત્યાર બાદ રાજ્યના માહિતી ખાતાએ પણ એવો જ ચુકાદો આપ્યો હતો કે જોન શિક્ષણાધિકારીની માગણી પર ફોર્મમાં જેનો ઉલ્લેખ છે એવી તમામ માહિતી શાળાએ આપવાની રહેશે
વાલીઓ મોટેભાગે ફરિયાદ કરતાં હોય છે કે શાળાઓ તેમની પાસેથી વિવિધ ફી ના નામે લૂંટ ચલાવી રહી છે. પરંતુ હવે આ નિયમન અમલીકરણ બાદ વાલીઓની સમસ્યામાં ઘટાડો થવાની સંભાવના છે.