ઉત્તરપ્રદેશ / એક સાથે 25 શાળામાં જોડાઇને શિક્ષિકાએ મેળવ્યો 1 કરોડ રૂપિયા પગાર, ધરપકડ કરાઇ

•  સરકારી શાળામાં શિક્ષિકા અલગ અલગ જિલ્લાની 25 શાળાઓમાં નોકરી કરતા હતા
• છેલ્લા એક વર્ષમાં પગાર તરીકે તેમણે અધધ 1 કરોડ રૂપિયા પગાર તરીકે મેળવ્યા

શિક્ષણ વિભાગે અનામિકા શુક્લાને નોટિસ મોકલી હતી. પંરતુ શિક્ષિકાની તરફથી કોઇ જવાબ નહોતો આવ્યો. ત્યારબાદ કાર્યવાહી કરતા વિભાગે શિક્ષિકાનું વેતન તાત્કાલિક રોકી દીધું હતું. જોકે, હવે શિક્ષિકાની આ મામલે ધરપકડ કરવામાં આવી છે. 

ઉત્તરપ્રદેશમાં કસ્તુરબા ગાંધી બાલિકા વિદ્યાલયમાં કાર્યરત એક શિક્ષિકા અલગ-અલગ જિલ્લાની 25 શાળાઓમાં એક સાથે નોકરી કરી રહ્યા હતા. છેલ્લા એક વર્ષમાં પગાર તરીકે તેમણે અધધ 1 કરોડ રૂપિયા પગાર તરીકે મેળવ્યા હતા. આ ઘટના બહાર આવતા અધિકારીઓએ શિક્ષિકાનો ડેટાબેઝ તપાસ્યો હતો. તેની સામે ફરિયાદ નોંધવામાં આવી હતી.

13 મહિનામાં શિક્ષણ ખાતા પાસેથી 1 કરોડ જેટલો પગાર લઇ લીધો

અત્યારે UP શિક્ષકોનો ડિજિટલ ડેટાબેઝ બનાવવામાં આવ્યો હતો, જેમાં જાણવા મળ્યું કે આ શિક્ષિકા 25 શાળાઓમાં નોકરી કરીને પગાર લઇ રહ્યા છે. અનામિકા શુકલા KBGV શાળામાં શિક્ષક તરીકે ફરજ બજાવી રહ્યા હતા. તેઓ આ સાથે અમેઠી, આંબેડકરનગર, રાયબરેલી, પ્રયાગરાજ, અલીગઢ જેવા જિલ્લાઓની અલગ અલગ 25 શાળાઓમાં શિક્ષક તરીકે નોંધાયેલા હતા. આમ તેમણે આ વર્ષના ફેબ્રુઆરી સુધી 13 મહિનામાં શિક્ષણ ખાતા પાસેથી 1 કરોડ જેટલો પગાર લઇ લીધો હતો. 

UPના શિક્ષણ મંત્રીએ એફઆઇઆર નોંધાવાના આપ્યા હતા આદેશ

અનામિકા મેનપુરી જિલ્લાના છે. આ અંગે ડિપાર્ટમેન્ટે અરજી પાઠવી છે જેનો શિક્ષકે કોઈ જવાબ વાળ્યો નથી. તેમનો પગાર તાત્કાલિક અસરોથી પાછો ખેંચી લેવામાં આવ્યો છે અને તેમના બેન્ક એકાઉન્ટને પણ ટ્રેક કરવામાં આવી રહ્યું છે. UPના શિક્ષણ મંત્રી ડો સતીશ દ્વિવેદીએ કહ્યું છે કે જો આ આક્ષેપો પુરવાર થશે તો શિક્ષક સામે કડક પગલાં ભરવામાં આવશે. આ માટે જ ડિજિટલ ડેટાબેઝ બનાવવામાં આવ્યો છે જેથી શિક્ષકોની પારદર્શકતા જળવાયેલી રહે. આ શાળાઓમાં કોન્ટ્રાકટ બેઝ ભરતી કરવામાં આવે છે. આ અંગે થયેલા ગોટાળાની સઘન તપાસ કરવામાં આવશે.