દુનિયાની દુર્લભ બીમારીઓમાંથી એક હંટર સિન્ડ્રોમથી ઇટાવાનો છ વર્ષીય દેવ પીડાઇ રહ્યો છે. બાળકના ઇલાજ માટે ૧.૯ર કરોડનાં વેક્સિનની જરૂર છે. જે માત્ર અમેરિકા કે કોરિયામાં જ મળે છે. દેવના પિતા જગરામ પોતાની જમીન વેચીને રૂ.૭૦ લાખ ખર્ચી ચૂકયા છે, પરંતુ તેના કરતાં ઘણા વધુ પૈસાની જરૂર છે.
બે લાખ બાળકોમાંથી એક બાળકને થતી આ બીમારીથી પીડાતો દેવ ઉત્તર પ્રદેશનો એક માત્ર દર્દી છે. બે વર્ષ પહેલાં દિલ્હીની એઇમ્સ હોસ્પિટલે દેવની અા બીમારી અંગે જણાવ્યું હતું. ઇટાવા જિલ્લાના સરૈયા ગામના ખેડૂત જગરામનો છ વર્ષનો પુત્ર દેવ બે વર્ષથી બીમાર છે. શરૂઆતમાં સામાન્ય બીમારી સમજીને પરિવારે ઇટાવામાં તેનો ઇલાજ કરાવ્યો, પરંતુ હાલતમાં કોઇ સુધારો ન થયો. ડોકટરોએ તેને એઇમ્સમાં લઇ જવાની સલાહ આપી.
ર૦૧૭માં જગતરામ દેવને એઇમ્સના પીડિયાટ્રિક વિભાગમાં લઇ ગયા અને ડો.નીરજ ગુપ્તાને બતાવ્યું. તપાસ બાદ તેમણે હંટર સિન્ડ્રોમ હોવાનું જણાવ્યું. એઇમ્સમાં ઇલાજનો કુલ ખર્ચ રૂ.એક કરોડ બાણુ લાખ જણાવવામાં આવ્યો. આ બીમારીમાં લાગતું વેક્સિન વિદેશથી આવશે.
લગભગ બે કરોડ ખર્ચ્યા બાદ પણ દેવની ઠીક થવાની કોઇ ગેરંટી નથી. કેમકે ડોકટરોએ સ્પષ્ટ કહ્યું છે કે ઇલેટ્રેસ વેક્સિન હંમેશાં માટે નહીં, પરંતુ એક વર્ષથી પાંચ વર્ષ સુધી કામ કરે છે. વેક્સિન અમેરિકા કે કોરિયાથી મંગાવવું પડે છે. અત્યાર સુધી ઇલાજમાં લગભગ રૂ.૭૦ લાખનો ખર્ચ થઇ ચૂકયો છે.
દેવના પિતાએ બાપ-દાદાની જમીન પણ વેચી દીધી છે. . તેના પિતાએ મુખ્યપ્રધાન કાર્યાલયમાં અરજી કરી છે, પરંતુ ત્યાંથી માત્ર રૂ.પાંચ લાખ જ મળી શકયા છે. હંટર સિન્ડ્રોમ આનુવાંશિક બીમારી છે. જે માતા દ્વારા બાળકમાં પ્રવેશે છે. આ બીમારી ફીમેલ જિનને પ્રભાવિત કરી શકતી નથી તેથી તેનાં લક્ષણ માત્ર છોકરાઓમાં જ જોવા મળે છે.