કામની વાત / સોનું એક લાખને પાર, તમે ખરીદેલું ગોલ્ડ અસલી છે કે નકલી? ઘરે બેઠા આ રીતે ચેક કરો

Gold Identify : સોનાનો ભાવ વધીને પ્રતિ 10 પર ગ્રામ 1 લાખ રૂપિયાને પાર કરી ગયો છે. મંગળવાર, 22 એપ્રિલ 2025ના રોજ સોનાએ આ ઐતિહાસિક આંકડો પાર કર્યો છે. તો મલ્ટી કોમોડિટી એક્સચેન્જ (MCX) પર તે વધારા સાથે 99,358 ના હાઈ લેવલ પર ટ્રેડ થઈ રહ્યો હતો. લાખો રૂપિયાનું સોનું ખરીદવું હવે સૌથી મોંઘા સોદાઓમાંનું એક બની ગયું છે, તેથી સોનું ખરીદતી વખતે અસલી અને નકલી સોનું ઓળખવું ખૂબ જ મહત્વનું બની જાય છે.

• ગોલ્ડે રચ્યો ઇતિહાસ
  ઘરેલુ માર્કેટમાં 24 કેરેટ સોનાના 10 ગ્રામનો ભાવ મંગળવારે 99100 રૂપિયા પ્રતિ 10 ગ્રામ પર પહોંચી ગયો છે. આ કિંમત GST અને મેકિંગ ચાર્જ વગરની છે. હવે જો આપણે 3% GST અને જ્વેલર્સ દ્વારા લેવામાં આવતા મેકિંગ ચાર્જ ઉમેરીએ તો 10 ગ્રામ 24 કેરેટ સોનાનો દર એક લાખ રૂપિયાથી વધુ થાય છે.

ઉલ્લેખનીય છે કે, અત્યારે 24 કેરેટ સોનાનો ભાવ 99,100 રૂપિયા છે. 22 કેરેટ સોનાનો ભાવ  96,720 રૂપિયા છે. 20 કેરેટ સોનાનો ભાવ  88,200 રૂપિયા છે. 18 કેરેટ સોનાનો ભાવ 80270 રૂપિયા છે. તો 14 કેરેટ સોનાનો ભાવ 63920 રૂપિયા છે. આ ભાવ 10 ગ્રામનો છે.

• BIS કેર એપથી જાણો શુદ્ધતા
  જો તમે આટલું મોંઘુ સોનું ખરીદી રહ્યા હોવ  તો સોનાના ઘરેણાં ખરીદતી વખતે તમારે ધ્યાનમાં રાખવું પડશે કે તમારી સાથે છેતરપિંડી તો નથી થઈ રહી ને. એટલે કે તમે જે સોનું ખરીદી રહ્યા છો તે અસલી છે કે નકલી તે જાણવું જરૂરી હોય છે. આ કિસ્સામાં સૌ પ્રથમ તમારે ઘરેણાં પરના હોલમાર્ક પર નજર નાખવી જોઈએ, આ હોલમાર્ક સાઈન સોનાની શુદ્ધતાનો પુરાવો હોય છે. તમે BIS કેર એપ દ્વારા તેની ગુણવત્તા સહિતની તમામ વિગતો જાણી શકો છો. એના માટે તમારે આ એપ ફોનમાં ડાઉનલોડ કરવી પડશે અને તેને ખોલ્યા બાદ તમારે ઘરેણાં પર રહેલ 6 અંકનો હોલમાર્ક નંબર દાખલ કરવો પડશે, પછી તરત જ તેનાથી સંબંધિત દરેક માહિતી તમારા મોબાઇલ ફોન પર ઉપલબ્ધ થઈ જશે.

• ચુંબકથી અસલી કે નકલીની કરો ઓળખ

ડિજિટલ રીતે વાસ્તવિક કે નકલી સોનાની ઓળખ કર્યા બાદ જૂની પદ્ધતિ વિશે વાત કરવી હોય તો તો તમે ચુંબકનો ઉપયોગ પણ કરી શકો છો. તેનો આધાર પણ ખૂબ જ સરળ હોય છે.  તમારે ફક્ત એટલું જ કરવાનું હોય છે કે તમે જે સોનું ખરીદી રહ્યા હોવ તેને ચુંબકના સંપર્કમાં લાવો. જો સોનું ચુંબક સાથે ચોંટી જાય તો તે નકલી છે, જ્યારે જો સોનું ચુંબક સાથે ચોંટી ન જાય તો તે અસલી હોય છે.

• વિનેગરને અજમાવી જુઓ

સોનાની શુદ્ધતા ઓળખવાની ત્રીજી રીતમાં વિનેગરનો ઉપયોગ કરી શકાય છે. એના માટે તમે જે સોનાના દાગીના ખરીદી રહ્યા છો તેના પર વિનેગરના થોડા ટીપાં નાખો અને થોડીવાર તેને ધ્યાનથી જોતા રહો, જો તમારા હાથમાં રહેલા સોનાના દાગીનાના રંગમાં કોઈ ફેરફાર દેખાય તો માની લો કે તે સોનું ખોટું છે. જ્યારે જો સોનાનો રંગ બદલાતો નથી તો તમારું સોનું અસલી છે.

• કેરેટના હિસાબે શુદ્ધતાની તપાસ

મોટાભાગે 22 કેરેટ સોનાનો ઉપયોગ ઘરેણાં બનાવવા માટે થાય છે. કેટલાક લોકો ઘરેણાંમાં 18 કેરેટ સોનાનો પણ ઉપયોગ કરે છે. કેરેટ પ્રમાણે ઘરેણાં પર હોલમાર્ક બનાવવામાં આવે છે.જેમ કે, 24 કેરેટના સોનાના દાગીના પર 999 લખેલું હોય છે. જ્યારે 23 કેરેટ પર 958, 22 કેરેટ પર 916, 21 કેરેટ પર 875 અને 18 કેરેટ પર 750 લખેલું હોય છે.

વધુ વાંચો : થોડા જ સમયમાં લાખોનું થઈ ગયું સોનું, આ પરિબળોને કારણે સોનાનો ભાવ આસમાને પહોંચ્યો

• ફ્રોડ અંગે તમે અહીં કરી શકો છો ફરિયાદ

જો તમને ઉપરોક્ત પદ્ધતિઓ દ્વારા સોનું ખરીદતી વખતે કોઈપણ પ્રકારની છેતરપિંડીનો અનુભવ થાય તો તમે તેના વિશે ફરિયાદ પણ કરી શકો છો. એના માટે તમે BIS કેર એપનો ઉપયોગ કરી શકો છો. તમે બ્યુરો ઓફ સ્ટાન્ડર્ડ્સની વેબસાઇટ WWW.BIS.ORG.IN પર લોગ ઇન કરીને અને વિજિલન્સ પોર્ટલ પર જઈને પણ તમારી ફરિયાદ કરી શકો છો. અહીં તમારે Register Complaint પર ક્લિક કરવાનું રહેશે અને પછી તમારો મોબાઈલ નંબર અને અન્ય જરૂરી વિગતો દાખલ કરવી પડશે, તમને તમારી ફરિયાદ પર કરવામાં આવેલી કાર્યવાહી વિશે જાણ પણ કરવામાં આવશે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ