થલતેજમાં પૈસાની લેતી-દેતીના મામલે ઘરમાં ઘૂસીને તોડફોડ કરી કિશોરનું અપહરણ કરી ત્રણ શખસોએ તેને ધારિયા-તલવાર જેવાં ઘાતક હથિયારો બતાવી અલગ અલગ જગ્યાએ લઇ જઈ માર માર્યો હોવાની ઘટના બનતાં સમગ્ર વિસ્તારમાં ચકચાર મચી જવા પામી છે.
કિશોરના પિતાને દેવું થઇ જતાં અને ઉઘરાણી કરતા લોકો ઘરે આવતા હોવાથી તેઓ ઘર છોડીને જતા રહ્યા છે, જેથી ઉઘરાણી કરતા ત્રણ શખ્સોએ પૈસા બાબતે કિશોરનું અપહરણ કરતાં સોલા પોલીસ સ્ટેશનમાં તેમની સામે ફરિયાદ નોંધાઇ છે.
થલતેજ વિસ્તારમાં આવેલ વાણિયાવાડ ખડકીમાં રહેતાં નીલમબહેન પટેલે ત્રણ શખ્સ વિરુદ્ધમાં સોલા પોલીસ સ્ટેશનમાં ફરિયાદ નોંધાવી છે. ફરિયાદમાં જણાવ્યા મુજબ નીલમબહેન નાના ભાઈ મનોજ અને ભત્રીજા (૧૬ વર્ષ) જય પટેલ સાથે સંયુક્ત પરિવારમાં રહે છે.
નીલમબહેનના નાના ભાઈ મનોજ પટેલને કોઈક કારણસર દેવું થઇ જતાં ઘરે બધા ઉઘરાણી માટે આવતા હતા, જેથી મનોજભાઈ ઘર છોડીને જતા રહ્યા છે, પરંતુ સમયાંતરે નીલમબહેનને મનોજભાઈ સાથે વાતો થાય છે.
તારીખ ૩૧ જુલાઈના રોજ રાતના સમયે નીલમબહેન અને તેમનો ભત્રીજો જય ઘરે હાજર હતાં તે દરમિયાનમાં થલતેજ ગામમાં આવેલ ઠાકોરવાસમાં રહેતા પ્રકાશ કમલેશભાઈ ઠાકોર, અિજતભાઈ ઠાકોર, હિતેશ ઠાકોર હથિયારો લઈને ઘરે આવ્યા હતા અને કોઈ પણ કારણ વગર નીલમબહેનના ઘરમાં તોડફોડ શરૂ કરી દીધી હતી તથા નીલમબહેનને બીભત્સ ગાળો બોલવા લાગ્યા હતા.
તે દરમિયાન બે અન્ય યુવક આવ્યા અને જયને માર મારવા લાગ્યા હતા તથા કહેતા હતા કે તારા પપ્પા ક્યાં છે, મારે તારા પપ્પા પાસેથી રૂપિયા લેવાના લેવાના છે. આમ કહીને બીભત્સ ગાળો બોલી તેમણે જયને ગડદાપાટુનો માર માર્યો હતો.
ત્યારબાદ ત્રણ યુવકો જયને જબરદસ્તી કારમાં બેસાડી અપહરણ કરીને લઇ ગયા હતા. જયને કારમાં હિતેશ ઠાકોરે તલવાર બતાવીને કહ્યું કે તારા પપ્પા સાથે મને વાત કરાવ અથવા તો તું તારા પપ્પાને અહીંયાં બોલાવ, મારે પૈસા લેવાના છે. આમ કહીને તેણે જયને ઢોર માર માર્યો હતો અને જાનથી મારી નાખવાની ધમકી આપી હતી.
ત્યારબાદ હિતેશ ઠાકોર અને તેના સાથીદારોએ જયને અલગ અલગ જગ્યાએ લઈ જઇ ઢોર માર માર્યો હતો તથા બોપલબ્રિજ પાસે ઉતારીને ભાગી ગયા હતા. તે પછી જયે નીલમબહેનને જાણ કરતાં તાત્કાલિક તેઓ બોપલબ્રિજ પહોંચી ગયાં હતાં.
નીલમબહેને સોલા પોલીસમાં ત્રણ યુવકો વિરુદ્ધમાં અપહરણ તેમજ જાનથી મારી નાખવાની ધમકી આપવાની ફરિયાદ નોંધાવી છે. આ અંગે સોલા પોલીસે હાલ ગુનો નોંધીને આરોપીઓની શોધખોળ હાથ ધરી છે.