વિશ્વના ઘણા દેશો કોરોના વાયરસની રસી તૈયાર કરવાની રેસમાં સામેલ છે. દરમિયાન USAના અધિકારીઓએ ભય વ્યક્ત કર્યો છે કે જો ચીન પ્રથમ કોરોના વાયરસની રસી તૈયાર કરી લેશે તો તે તેનો ઉપયોગ આર્થિક લાભ અને રાજકીય લાભ મેળવવા માટે કરી શકે છે.
ચીન જાણે છે કે જે દેશ પ્રથમ અસરકારક રસી પેદા કરશે તે વિશ્વ પર રાજ કરશે
વિશ્વ ચીની બનાવટની રસી ઉપર વિશ્વાસ કરશે કે કેમ તે અંગે પ્રશ્ન
વિશ્વના ઘણા દેશો એકબીજા સાથે માહિતી શેર કરીને કોરોના રસી પર કામ કરી રહ્યા છે. એવામાં USA અને ચીન ફક્ત પોતાના જ સંશોધન ઉપર રસી બનાવવાનો પ્રયાસ કરી રહ્યા છે. પોલિટિકોના અહેવાલ મુજબ USAના રાષ્ટ્રીય સુરક્ષા સાથે સંકળાયેલા એક અધિકારીએ કહ્યું- "ચીન જાણે છે કે જે દેશ પ્રથમ અસરકારક રસી પેદા કરશે તે વિશ્વ પર રાજ કરશે."
સંભવ છે કે ચીને અન્ય દેશોની તુલનામાં પહેલેથી જ રસી તૈયાર કરવાનું કામ શરૂ કરી દીધું હોય
પેન્ટાગોન અને CIAના ભૂતપૂર્વ અધિકારી મેટ ક્રોનીગે કહ્યું - 'ઘણી વખત ચીન તરફથી મોકલવામાં આવતી સહાય પાછળ કેટલાક અન્ય હિતોનો સમાવેશ થાય છે. તેથી, તેઓ રસીનો ઉપયોગ દુનિયામાં પોતાનો પ્રભાવ વધારવા અને અમેરિકાને પાછળ ધકેલવા માટે કરી શકે છે. એપ્રિલમાં ચીને કહ્યું હતું કે કોરોના વાયરસ રસીના પ્રારંભિક અજમાયશનાં પરિણામો સારા આવ્યા છે.મહત્વની વાત એ છે કે કોરોના વાયરસ ચીનથી જ ફેલાયો હતો. તેથી સંભવ છે કે ચીને અન્ય દેશોની તુલનામાં પહેલેથી જ રસી તૈયાર કરવાનું કામ શરૂ કરી દીધું હોય. આ ઉપરાંત વુહાનથી કોરોના વાયરસના ફેલાવા વિશે વિશ્વભરમાંથી સવાલો ઉભા થયા છે. આવી સ્થિતિમાં જો ચીન પ્રથમ રસી તૈયાર કરે છે તો તે અન્ય દેશોને પૂરી પાડીને તેની છબી સુધારવાનું કામ કરી શકે છે.
અન્ય દેશોની ડીઝાઇન અને સંશોધનો ચોરી લેવા માટે ચીન કુખ્યાત
જો કે USAની નેશનલ સિક્યુરિટી સાથે સંકળાયેલા એક અધિકારીનું માનવું છે કે રસીના નિર્માણ અંગે ચીનને હજી સુધી કોઈ સફળતા નથી મળી. પરંતુ અધિકારીએ કહ્યું- 'આ ચીનની પેટર્ન છે કે તે અન્યની વસ્તુઓની ડીઝાઇન અને સંશોધન ચોરી કરવાનો પ્રયાસ કરે છે.'જો ચીન વડે રસી પ્રથમ તૈયાર કરવામાં આવે તો આંતરરાષ્ટ્રીય સંબંધોથી વધુ આર્થિક અસર જોવા મળી શકે છે. એસોસિયેશન ઓફ અમેરિકન મેડિકલ કોલેજના મુખ્ય વૈજ્ઞાનિક અધિકારી રોસ મેકીન કહે છે કે જે દેશ રસી પ્રથમ તૈયાર કરશે તે દેશ તેની પોતાની વસ્તી સુરક્ષિત કરનારો પ્રથમ દેશ બની જશે. આ કારણે તે દેશમાં અર્થવ્યવસ્થા સંપૂર્ણપણે ખુલી જશે.
જો કે, CIAના ભૂતપૂર્વ અધિકારી મેટ ક્રોનીગ વિશ્વ ચીની બનાવટની રસી ઉપર વિશ્વાસ કરશે કે કેમ તે અંગે પ્રશ્નો ઉભા કરે છે. તાજેતરમાં ચીને ઘણા દેશોમાં ખરાબ ગુણવત્તાનાં તબીબી ઉપકરણો મોકલ્યા હતા.