વ્હાઇટ હાઉસના દરવાજા ખોલીને હવે કોણ નવા રાષ્ટ્રપતિ બનશે, તે આગામી 10 દિવસમાં જાહેર થઇ જશે. જો કે તેમ છતાં પણ હજી ભારતીય-અમેરિકનમાં આજે પણ નવા રાષ્ટ્રપતિને લઇને આશાઓ છે.
ભારતીયો આજે પણ નવા રાષ્ટ્રપતિ ભારતીયો માટે કેટલાક હળવા નિયમો બનાવે તેની માંગ કરે છે.
નવા રાષ્ટ્રપતિ 3 નવેમ્બરે ચૂંટાઇ જશે. ભારતીયો પોતાની નાગરિકતા અને રહેવાસ માટે હળવા નિયમની આશા રાખી રહ્યા છે. નવા રાષ્ટ્રપતિ કોરોનાને કારણે સર્જાયેલી આર્થિક મંદીમાંથી દેશને જલદી બહાર લાવે તેવી આશા સેવી રહ્યા છે.
અમેરિકામાં હાલ આશરે 42 લાખ 60 હજાર જેટલા ભારતીયો વસે છે અને તેઓ અમેરિકાના નવા રાષ્ટ્રપતિ પાસે કેટલીક મહત્વની આશાઓ રાખી રહ્યા છે. અમેરિકામાં હાલ ચુંટણીનો માહોલ જામ્યો છે. એક તરફ હાલના રાષ્ટ્રપતિ ડોનાલ્ડ ટ્રમ્પ અને બીજી તરફ ડેમોક્રેટીક પાર્ટીના ઉમેદવાર જોઈ બાયડન બન્ને એડી-ચોટીનું જોર લગાવી રહ્યા છે. એટલુ જ નહીં બન્ને ઉમેદવારો ભારતીયોને પણ રીઝવવા માટે કેટલાક વચનો આપી રહ્યા છે.
ટેક્સમાં રાહત મળે તેવી માંગ કરી રહ્યા છે ભારતીયો
અહીં વસતા ભારતીયો નવા રાષ્ટ્રપતિ પાસેથી હાલની આર્થિક મંદી જલદીથી દુર થાય અને નોકરીયાતોને નોકરી મળે તેમ જ કેટલાક પ્રકારના ટેક્સમાં રાહત મળે તેવી માંગ કરી રહ્યા છે.
એક તરફ અહીં વસતા ભારતીયોની સંખ્યા 42 લાખ જેટલી જાહેર કરવામાં આવે છે. જ્યારે અહીં અમેરિકામાં સંખ્યાબંધ ભારતીયો ગેરકાયદેસર અથવા H1B અને L1 જેવા વિઝા સ્ટેટસ પર રહેતા હોવાથી તેના નિયમોમાં પણ હળવાશ નવી સરકાર લાવે તેવી આશા રાખી રહ્યા છે. છેલ્લા 1 વર્ષમાં અમેરિકામાં H1B વિઝા ધારકોને ભારે મુશ્કેલીનો સામનો કરવો પડી રહ્યો છે.
ઉપરાંત જો વાત કરીએ તો અહીં એવા કેટલાય ભારતીયો છે કે જે પોતાના અમેરિકન સ્ટેટસ માટે કાયદાકીય લડત ચલાવે છે. ત્યારે આવા ભારતીયો નવી સરકાર પાસે ઇમીગ્રેશનના નિયમો હળવા થાય તેવી આશા રાખે છે.
ભારતીયો હાલની સરકારના કેટલાક નિયમોથી ત્રસ્ત છે
જે રીતે છેલ્લા 2 વર્ષથી ભારત અને અમેરિકાના સંબંધો વધી રહ્યા છે અને બન્ને દેશ એક-બીજાના લોકોની સંસ્કૃતિ અને લોકશાહીની પ્રશંસા કરી રહ્યા છે અને બન્ને દેશના વડા પોતાને એકબીજાને પોતાના મિત્રો બતાવે છે, ત્યારે બીજી તરફ જો અમેરિકામાં વસતા ભારતીયોની વાત કરીએ તો તેઓ હાલની સરકારના કેટલાક નિયમોથી ત્રસ્ત છે અને એટલે જ નવી સરકાર જેની પણ આવે; ડોનાલ્ડ ટ્રમ્પ અથવા જોઈ બાયડન તેની પાસે આશા રાખી રહ્યા છે.