અમેરિકા જેવા ખરા અર્થમાં લોકશાહી ધરાવતા દેશમાં પણ હવે ચૂંટણીમાં પણ ગેરરીતિ થવા લાગી છે. તાજેતરમાં અમેરિકાના રાષ્ટ્રપ્રમુખપદની ચૂંટણીમાં ડોનાલ્ડ ટ્રમ્પ વિરુદ્ધ જો બિડેનનો જંગ કોઇ સનસનીખેજ રિયલ પોલિટિકલ થ્રિલર જેવો બની ગયો છે.
હવે અમેરિકામાં પણ ભારતની જેમ ચૂંટણીનાં પરિણામની બાબતમાં ઉમેદવારો વચ્ચે આક્ષેપ અને પ્રતિઆક્ષેપનો દોર જોવા મળે છે, જે ખરેખર આશ્ચર્યજનક છે. ભારતમાં જેમ છાશવારે ચૂંટણીના મામલે ઉમેદવારો અને તેમના સમર્થકો અદાલતનાં દ્વાર ખટખટાવે છે તેમ અમેેરિકાની તાજેતરની ચૂંટણીમાં પણ આવા અનેક અણધાર્યા ટર્ન અને ટ્વિસ્ટ આવ્યા છે.
જો કે ડોનાલ્ડ ટ્રમ્પે તો ઘણા સમય પહેલાં તેનો સંકેત આપી દીધો હતો કે આ વખતે અમેરિકાની ચૂંટણીનાં પરિણામ મતદારો નહીં પણ સુપ્રીમ કોર્ટ નક્કી કરશે અને ટ્રમ્પની ભવિષ્યવાણી સાચી પડી રહી છે. હવે તો ટ્રમ્પ કે બિડેન જેવા અમેરિકાના રાષ્ટ્રપ્રમુખપદના ઉમેદવારને પણ છેલ્લા પાટલે બેસી જતાં સહેજ પણ શરમ નડતી નથી અને દુનિયામાં શ્રેષ્ઠ લોકતાંત્રિક સિસ્ટમ તરીકે જાણીતા અમેરિકાની પ્રતિષ્ઠાને કલંક લાગે એટલી હદે વરવી માનસિકતાનાં દર્શન થાય છે.
મતગણતરી દરમિયાન કોઇ ફિલ્મના થ્રિલર ડ્રામા જેવી સ્થિતિ અમેરિકાની ચૂંટણીમાં સર્જાઇ હતી. પેન્સિલ્વાનિયા, જ્યોર્જિયા, મિશિગન અને વિસ્કોન્સિનમાં મતની ગણતરી રોકી દેવામાં આવી હતી. અમેરિકાના રાષ્ટ્રપ્રમુખ ડોનાલ્ડ ટ્રમ્પે ફરી એક વાર મોટો આરોપ લગાવ્યો હતો. તેમણે ટ્વિટ કર્યું હતું કે પેન્સિલ્વાનિયામાં પાંચ લાખ વોટ ગાયબ થઈ ગયા છે. તેઓ (ડેમોક્રેટિક) પેન્સિલ્વાનિયામાં પાંચ લાખ વોટથી આગળ થવા માટે ખૂબ મહેનત કરી રહ્યા છે.
ટ્રમ્પે દાવો કર્યો હતો કે ખૂબ જ નિરાશ એક લોકોનો સમૂહ બીજા સમૂહના લોકોને નિરાશ કરવાનો પ્રયાસ કરી રહ્યાે છે. અમે મોટી ઉજવણીની તૈયારીમાં હતા. અમે જીતી રહ્યા હતા, પરંતુ અચાનક બધું બદલી નાખવામાં આવ્યું. ટ્રમ્પે કહ્યું કે તેઓ ઈચ્છે છે કે મતગણતરી રોકવામાં આવે. તેઓએ કહ્યું તેઓ સુપ્રીમ કોર્ટ જશે. અમારું લક્ષ્ય હવે આ દેશની ભલાઈ માટે અખંડિતતા સુનિશ્ચિત કરવાનું છે. આ એક ખૂબ મોટી ક્ષણ છે. આ આપણા દેશની સાથે એક મોટી છેતરપિંડી છે. અમે ઈચ્છીએ છીએ કે કાયદાનો યોગ્ય રીતે ઉપયોગ કરવામાં આવે. તેથી અમે સુપ્રીમ કોર્ટ જઈ રહ્યા છીએ.
બીજી વાત એ કે આ જંગે રાજકારણીઓની અસલી જાતને પણ ઉઘાડી પાડી દીધી હતી. ટ્રમ્પે મતદાન પછી જે ધમપછાડા કર્યા એ જોયા પછી ટ્રમ્પ આપણા ત્યાંના કોઈ રાજકારણી જેવા જ લાગ્યા. હજુ મતગણતરી પૂરી નહોતી થઈ ત્યાં તો ટ્રમ્પે વ્હાઈટ હાઉસમાં ઊભા ઊભા જ પોતે જીતી ગયા છે એ જાહેર કરી દીધું હતું. અમેરિકાના તમામ સ્ટેટમાં ગવર્નર હોય છે કે જે સર્વેસર્વા ગણાય છે અને સાથે-સાથે એસેમ્બ્લી હોય કે જેમાં પ્રજાના પ્રતિનિિધ હોય. ગવર્નર અને એસેમ્બ્લી બંને જાહેર કરે એ જ પરિણામ માન્ય ગણાતું હોય છે. ટ્રમ્પે કોઈ જાહેરાત વિના જ પોતાની જાતે પોતાને વિજેતા જાહેર કરી દીધા. એ તો ઠીક પણ પછી બિડેનની તરફેણમાં મત પડવા માંડ્યા એજોયા પછી તો આપણા નેતાઓ જ યાદ આવી ગયા.
આપણે ત્યાં હારેલા નેતાઓ ચૂંટણીમાં ગરબડ થઈ એવાં રોદણાં રડવા બેસી જતા હોય છે. કંઈ ના મળે તો છેવટે ઈવીએમમાં ગેરરીતિ થયાનું બહાનું તો હાથવગું હોય જ છે. ટ્રમ્પે ટિપિકલ એ જ સ્ટાઈલમાં બિડેનના માણસો ફ્રોડ કરી રહ્યા છે એવું એલાન કર્યું હતું અને પછી તાત્કાલિક મતગણતરી બંધ કરાવવાનું એલાન કરી દીધું હતું. અમેરિકામાં સ્ટેટ સ્વતંત્ર છે ને પ્રમુખ હોય કે બીજું કોઈ હોય, કોઈની સાડાબારી રાખતાં નથી. તેથી ટ્રમ્પના ફતવાની અસર ના થઈ અને ટ્રમ્પે સુપ્રીમ કોર્ટમાં જવાની ધમકી આપી. એ ધમકીની પણ અસર ના થઈ એ અલગ વાત છે પણ ટ્રમ્પે જે ત્રાગાં કર્યાં એ અભૂતપૂર્વ છે.