ભારત યાત્રા / અમેરિકાના ઉપરાષ્ટ્રપતિ જેડી વાન્સ પરિવાર સહિત આજથી ચાર દિવસ માટે ભારતના પ્રવાસે, જાણો શું છે શિડ્યૂલ

અમેરિકાના ઉપરાષ્ટ્રપતિ જેડી વાન્સ તેમના પરિવાર સાથે ભારતની 4 દિવસની મુલાકાતે આજે નવી દિલ્હી પહોંચશે. આ દરમિયાન તેઓ વડા પ્રધાન નરેન્દ્ર મોદીને મળશે અને વેપાર, ટેરિફ, પ્રાદેશિક સુરક્ષા અને એકંદર દ્વિપક્ષીય સંબંધોને આગળ વધારવાના માર્ગો સહિત અનેક મુખ્ય મુદ્દાઓ પર પણ ચર્ચા કરશે. ત્યારબાદ સાંજે રાત્રિભોજનનું આયોજન કરવામાં આવશે.

જેડી વાન્સ અને તેમના પત્ની ઉષા વાન્સના દિલ્હી આગમનને ધ્યાનમાં રાખીને રાષ્ટ્રીય રાજધાનીમાં સુરક્ષા વ્યવસ્થા વધારી દેવામાં આવી છે. અમેરિકાના ઉપરાષ્ટ્રપતિ, તેમની પત્ની ઉષા અને તેમના ત્રણ બાળકો - ઇવાન, વિવેક અને મીરાબેલ - સોમવારે સવારે 10 વાગ્યે પાલમ એરપોર્ટ પર પહોંચશે.

ટેરિફ અને બજાર ઍક્સેસ સહિતના અનેક મુદ્દાઓ પર થશે વાતચીત

અમેરિકાના રાષ્ટ્રપતિ ડોનાલ્ડ ટ્રમ્પે ભારત સહિત લગભગ 60 દેશો સામે વ્યાપક ટેરિફ શાસન લાદવાનું મુલતવી રાખ્યાના થોડા અઠવાડિયા પછી વેન્સ ભારતની તેમની પ્રથમ મુલાકાત લેશે. ભારત અને અમેરિકા હવે દ્વિપક્ષીય વેપાર કરારને અંતિમ સ્વરૂપ આપવા માટે વાટાઘાટો કરી રહ્યા છે, જેમાં ટેરિફ અને બજાર ઍક્સેસ સહિતના અનેક મુદ્દાઓને આવરી લેવામાં આવશે.

સ્વામિનારાયણ અક્ષરધામ મંદિરની મુલાકાત

દિલ્હી પહોંચ્યાના થોડા કલાકો પછી, વાન્સ અને તેમનો પરિવાર સ્વામિનારાયણ અક્ષરધામ મંદિરની મુલાકાત લેશે. સ્વામિનારાયણ અક્ષરધામ મંદિર ખાતે અગાઉથી સુરક્ષા વ્યવસ્થા કરી દેવાઇ છે. , પરિસરની સંપૂર્ણ તપાસ કરવામાં આવી છે, અને મુલાકાતના સમયે પણ ચુસ્ત સુરક્ષા બંદોબસ્ત રહેશે. તેઓ પરંપરાગત ભારતીય હાથથી બનાવેલી વસ્તુઓ વેચતા 'શોપિંગ કોમ્પ્લેક્સ'ની પણ મુલાકાત લઈ શકે છે. દિલ્હી ઉપરાંત, વાન્સ તેમના પરિવાર સાથે જયપુર અને આગ્રા પણ જશે. યુએસ સંરક્ષણ મંત્રાલય અને વિદેશ મંત્રાલયના અધિકારીઓ સહિત ઓછામાં ઓછા પાંચ વરિષ્ઠ અધિકારીઓ વાન્સ સાથે ભારત આવે તેવી શક્યતા છે.

આ પણ વાંચોઃ

ભયાનક સાયક્લોન એક્ટિવ! તોફાની વરસાદ અને વાવાઝોડા માટે રહો તૈયાર

PM મોદી દ્વારા વેન્સનું સ્વાગત

પ્રધાનમંત્રી નરેન્દ્ર મોદી સોમવારે સાંજે 7 લોક કલ્યાણ માર્ગ ખાતેના તેમના સત્તાવાર નિવાસસ્થાને ઉપરાષ્ટ્રપતિ વાન્સનું સ્વાગત કરશે. આ બેઠકમાં, ભારત-અમેરિકા વેપાર કરારની ચર્ચા કરવા ઉપરાંત, બંને લોકશાહી દેશો વચ્ચેના વ્યૂહાત્મક અને આર્થિક સંબંધોને વધુ ગાઢ બનાવવાના માર્ગો પર વિચાર કરવામાં આવશે.

જયપુરની મુલાકાત

વાન્સ 21 એપ્રિલે જયપુર જશે અને 24 એપ્રિલ સુધી ત્યાં રહેશે. 22 એપ્રિલની સવારે, તેઓ તેમના પરિવાર સાથે પ્રખ્યાત આમેર પેલેસની મુલાકાત લેશે. ત્યાં તેમનું પરંપરાગત રાજસ્થાની સ્વાગત કરવામાં આવશે, જેમાં તેઓ જોધપુરી પાઘડી પહેરશે અને લોક નૃત્યો, કઠપૂતળીના શો, પરંપરાગત પોશાક અને સ્થાનિક ભોજનનો આનંદ માણશે. દરમ્યાન તેઓ રાજસ્થાનના મુખ્યમંત્રી ભજનલાલ શર્મા અને રાજ્યપાલ હરિભાઉ બાગડેને પણ મળશે. 23 એપ્રિલે તેઓ આગ્રા જશે અને તાજમહેલ જોશે. લગભગ ત્રણ કલાક ત્યાં રહ્યા પછી, તેઓ જયપુર પાછા ફરશે અને સિટી પેલેસની મુલાકાત પણ લેશે. વાન્સ સોમવારે રાત્રે દિલ્હીથી રવાના થવાની ધારણા છે અને ત્યારબાદ તે જયપુર અને આગ્રા જશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ