યુએસ ટ્રેઝરી ડિપાર્ટમેન્ટે કોંગ્રેસને સુપરત કરેલા અહેવાલમાં એવું જણાવ્યું છે કે રોનાની ત્રીજી લહેર છતાં પણ ભારતીય અર્થવ્યવસ્થા મજબૂત બની છે.
ઈન્ડીયન ઈકોનોમી પર અમેરિકી ટ્રેઝરીનો રિપોર્ટ
ઈન્ડીયન ઈકોનોમીમાં ત્રીજી લહેર પછી મજબૂત બની
અર્થતંત્રમાં ફરી એકવાર સુધારો થઇ રહ્યો છે
કોરોના મહામારીએ આખી દુનિયાની અર્થવ્યવસ્થાને હચમચાવી નાખી હતી. હાલ અર્થતંત્રમાં ફરી એકવાર સુધારો થઇ રહ્યો છે. કોરોનાની ત્રીજી લહેર બાદ ભારતીય અર્થવ્યવસ્થાએ પણ ઝડપથી પુનરાગમન કર્યું છે.
યુએસ ટ્રેઝરી ડિપાર્ટમેન્ટના રિપોર્ટમાં શું કહેવાયું
યુએસ ટ્રેઝરી ડિપાર્ટમેન્ટે કોંગ્રેસને સુપરત કરેલા અહેવાલમાં આ વાત કહી છે. ટ્રેઝરીએ તેના અર્ધવાર્ષિક અહેવાલમાં જણાવ્યું હતું કે ભારતમાં બીજી લહેરે 2021 ના મધ્ય સુધીમાં વિકાસ પર ભારે દબાણ સર્જ્યું હતું જેને કારણે આર્થિક રિકવરીમાં વિલંબ થયો હતો પરંતુ હવે પાછી આર્થિક રિકવરી પાટે ચડી છે.
સરકારે 2021 માં રોગચાળા સામે અર્થવ્યવસ્થાને આર્થિક સહાય આપી
રિપોર્ટમાં કહેવામાં આવ્યું છે કે સરકારે 2021 માં રોગચાળા સામે અર્થવ્યવસ્થાને આર્થિક સહાય આપવાનું ચાલુ રાખ્યું હતું. આરબીઆઈના પ્રયત્નોનો ઉલ્લેખ કરતા ટ્રેઝરીએ કહ્યું કે રિઝર્વ બેંક ઓફ ઇન્ડિયાએ મે 2020 થી તેના મુખ્ય નીતિગત દરો 4 ટકા પર યથાવત રાખ્યા છે. તેમણે ગ્રોથને પ્રોત્સાહન આપવામાં પણ સાથ આપ્યો હતો.
યુએસ ટ્રેઝરીએ ભારતીય વેક્સિનેશનના કર્યાં વખાણ
યુએસ ટ્રેઝરીએ શુક્રવારે ભારતના રસીકરણ પ્રયત્નોની પ્રશંસા કરતા કહ્યું હતું કે રસીકરણ રોલઆઉટમાં વેગ સાથે ગયા નાણાકીય વર્ષના બીજા છમાસિક ગાળામાં આર્થિક પ્રવૃત્તિમાં સુધારો થયો છે. 2021 ના અંત સુધીમાં, ભારતની લગભગ 44 ટકા વસ્તીને સંપૂર્ણ રસી આપવામાં આવી હતી. ભારતે 2022 ની શરૂઆતમાં કોવિડ -19 ના ઓમિક્રોન વેરિએન્ટનો સામનો કરવો પડ્યો હતો, પરંતુ મૃત્યુની સંખ્યા ઘણી ઓછી રહી હતી.